[1] Yaa kabajamaa Tewofilos! Kitaaba duraa keeysatti, waan Yesuus hojjachuu fi barsiisuu jalqabe hundumaa,
[2] kanneen jalqabumaa kaasee, hanga guyyaa inni, eega ergamoota ifii filate, Ruuhal Qudusiin ajaje booddee, gara samii ol itti fudhatametti tahanii dha.
[3] Yesuus dararamaa fi du'a isaa booddee ammaas jiraataa akka tahe, deddeebi'ee haala nama hin mamsiifneen isaanitti if mullise. Guyyaa afurtamaaf akka isa arkan godhee, waa'ee Mootummaa Rabbii tiis isaanitti dubbate.
[4] Isaanii wajjiin odoo jiruu, “Abdii Abbaan kiyya isiniif kanne, kan ana irraa dhageeysan san eeggadhaa malee, Yerusaaleemii hin bahinaa!” jedhee ti isaan ajaje.
[5] Itti dabalee tiis, “Yohannis bishaaniin cuuphe, isin ammoo dhihuma tanatti, Ruuhal Qudusiin cuuphamuuf jiraattu” jedheeni.
[6] Isaan hogguu achitti walitti qabaman, “Yaa Gooftaa, wayta tana Israa'eliif mootummaa ni deebiftaafii?” jedhanii ti gaafatan.
[7] Inni ammoo deebisee, “Wayta yookiin manziila Abbaan amrii isaa tiin murteeyse, beekuun isiniif hin kannamne.
[8] Isin ammoo, Ruuhal Qudus hogguu isin irratti bu'u, humna ni arkattu; Yerusaaleem keeysatti, Yihudaa hundumatti, ammaas Samaariyaatti, hanga daangaa lafaattiis raga-baatuu tiyya taatu” isaaniin jedhe.
[9] Akkuma jecha kana afaanii fixateen, oduma isaan daawwatanii samitti ol fudhatame; duumeeysi itti marsee ti, ija isaanii duraa dhooyse.
[10] Oduma isaan ija itti dhaabanii gara inni deeme samii keeysa laalaa jiranii, kunoo, namoonni uffata adaadii uffatan lama isaan cinaa dhadhaabbatanii ti,
[11] “Isin yaa warra Galiilaa, maaliif dhadhaabbattanii samii keeysa ol laaltan? Yesuusummaan, isin biraa samitti ol fudhatame kun, akkaatuma inni itti samitti deemee agartan kanatti, ammaas akkasumatti deebi'ee ti dhufa” jedhaniin.
[12] Kana booddee ergamoonni Gaara Ejersaa irraa, gara Yerusaaleemitti deebi'an; gaarii sun mandaricha irraa deemsa guyyaa Sanbataa, jechuun hanga kiilo metrii tokkoo ti fagaata ture.
[13] Hogguu deebi'an magaalaa seenan, ammaas mana duraan keeysa turan, kan qallaa gubbaa jirutti galan. Isaaniis Phexiroos, Yohannis, Yaaqoob, Indiriiyaas, Filiphoos, Toomaas, Bartolomewos, Maatewos, Yaaqoob ilma Alfewos, Simoon kan hinaafticha jedhamuu fi Yihudaa ilma Yaaqoob turan.
[14] Ergamoonni kun hundinuu wal tahuu dhaan, dubartootaa fi, Maariyaam haadha Yesuus, ammaas obboleeyyan isaa wajjiiniis, kadhataaf if kannanii ti turan.
[15] Jidduu san Phexiroos, walgahii amantoota hanga nama dhibbaa fi diiydam tahan keeysa dhaabbatee ti,
[16] “Yaa obboleeyyan koo, Qoowliin Kitaabaa tan Ruuhal Qudus duraan dursee afaan Daawwidiin, Yihudaa laalchisuun dubbate, raawwatamtee ti jirti; inni kunoo, warra Yesuus qaban dura deemee ti agarsiise.
[17] Inni nu wajjiin lakkaawamee, hojii tana keeysattiis, qoodni tajaajilaa kannamee tiif ture.
[18] Namtichi kun, horii jallina hojjatee arkate saniin lafa bitate; akkuma jirutti dhaabbatumaan lafa dhawwee ti, bakka lamatti gargar tarsa'e; marrimaan isaa tiis keeysaa faca'e.
[19] Dubbiin tuniis warra Yerusaaleem jiran hundumaa biratti ni beekamte, dachi saniis afaan isaanitti ‘Akeldaamaa’ jedhamti; hiikkaan isaa tiis ‘Dachii dhiigaa’ jechuu dha.
[20] Kitaaba Faarfannaa keeysatti, ‘Qe'een isaa haa ontu, namni keeysa jiraatuus tokko illeen hin arkamin!’ Ammaas, ‘Hojii isaaf qoodamte, kan biraa haa fudhatu’ kan jedhu barreeyfamee ti jira.
[21] “Kanaaf jecha zamana Yesuus Gooftaan, nu jidduu jiraachaa ture hundumaa, namoota nu wajjiin turan keeysaa tokko,
[22] Kan eega cuuphaa Yohannisii jalqabee, hanga guyyaa Gooftaan itti nu biraa ol fudhatametti, nu jidduu turee tu, nu wajjiin raga-baatuu du'aa ka'uu isaa tahuun irra jira” jedhe.
[23] Hogguusuma maqaa nama lamaa dhiheeysan; isaaniis Yoseef kan Baarsaabaas yookiin Yusxoos jedhamee yaamamuu fi, ammaas Maatiyaas nama jedhamu turan.
[24] Warri walitti qabaman sun ammaas, “Yaa Gooftaa, ati kan garaa nama hundumaa beeytu, isaan kana lamaan keeysaa kan ati filatte mullisi!
[25] Hojii tana irraa qooda fudhatee ergamaa tahee, bakka Yihudaan dhiisee irraa bakka isaatti deeme tana, haa fudhatuu” jedhanii ti kadhatan.
[26] Hogguus isaan lamaaniif hixaa darbinaan, hixaan Maatiyaasiif bahe; akkasitti inni ergamoota kudha tokkowwan sanitti dabalame.