[1] Bara san lakkooysi barattoota Yesuus hoddomaachaa ti deeme, Yihudoonni afaan Giriigii dubbataniis, warra Yihudoota irratti guunguman; kuniis, gursummeeyyiin isaanii gargaarsa guyyuu arkachuun isaan irra turetti, waan dagatamaniif tahe.
[2] Hogguus ergamoonni kudha lamaan, amantoota hunda walitti yaamanii ti, “Nuti Qoowlii Rabbii lallabuu dhiifnee, kaddaamota sooraa tahun nu irra hin jiru.
[3] Kanaaf jecha yaa obboleeyyan keenya, namoota hojii tana irratti shuumnu torba, kanneen maqaa gaarii qaban, warra Ruuhal Qudusii fi hikmaa dhaaniis guutaman, isinuma keeysaa barbaadaa filaa!
[4] Nuti ammoo, kadhataa fi lallaba Qoowlii Rabbii tiif fardeeyfannee if kannina” jedhaniini.
[5] Yaadni ergamoonni dhiheeysaniis ummata san hunda ni gammachiise, akkasitti Isxifaanos nama jedhamu, nama amantii fi Ruuhal Qudusiin guutame, akkasumatti ammaas Filiphoosii fi Phirokoros, Niqaanoor, Ximoonaa, Pharmenaa, Niqolaawos nama biyya Anxookiyaa kan amantii warra Yihudootaa fudhatee turees filanii ti dhiheeysan.
[6] Isaan kanneen hunda ergamoota duratti dhiheeysan; ergamoonni niis hogguus Rabbi kadhatanii, harka isaanii mataa jaraa hunda irra kakaayan.
[7] Qoowliin Rabbii baballachaa ti deemte, lakkooysi barattootaa Yerusaaleem keeysatti hedduu dha dabalamaa deeme; luboota keeysaa hiis hedduun amantii ni fudhatan.
[8] Isxifaanos ni'imaa fi humna Rabbii tiin guutamee, baasaa fi milikkita gurguddaa namoota jiddutti agarsiise.
[9] Hogguus murni biyya Qareenaa tii fi Iskindiriiyaa, warri mana sagadaa kanneen hurrii bahanii jedhamuu tokko, ammaas warra biyya Kiilqiyaa tii fi Asiyaa irraa dhufan wajjiin ka'anii ti, Isxifaanositti falaman.
[10] Haa tahu malee, ruuhaa fi hikmaa Isxifaanos ittiin dubbateen dura dhaabbachuu hin dandeenye.
[11] Ammoo harka lafa jalaa tiin namoota, “Isaa Musee fi Rabbi arrabsuu dhageenyee ti jirra” jedhan irratti kaasan.
[12] Akkasitti ummataa fi manguddoota biyyaa, ammaas barsiisota seeraa tiis irratti kakaasanii ti, Isxifaanos qabanii, shorroysaa yaa'ii duratti isa dhiheeysan.
[13] Ragaa kijibaa tiis kanneen, “Namtichi kun wayta hundumaa, nama bakka qulqulluu tanaa fi seera Musee tiin mormuu gonkumaa dhiisuu miti.
[14] ‘Yesuus, namtichi biyya Naazireet kun, bakka tanaas balleeysuuf taa'a, ammaas aadaa Museen nutti dabarsees jijjiiruuf deema’ jechaa isaa dubbatu dhageenyee ti jirra” jedhan.
[15] Warri yaa'ii keeysa turan hundinuu, ija itti dhaabanii Isxifaanos hogguu daawwatan, fuulli isaa fuula maleeykaa Rabbii fakkaatee ti arkan.