[1] Baruma san keeysa Herodis mootichi, warra miseensa waldaya kiristaanaa turan keeysaa, hanga tokko irra, irree cimtuu irra kaayee ti ture.
[2] Yaaqoob obboleeysa Yohannis, habalee dhaan morma irraa qaarsise.
[3] Tun Yihudoota gammachiisuu agarraan, ammaas dabree ti Phexiroosi qabsiise. Yeroon saniis wayta ayyaana Qiinxaa Maattiraat itti ayyaaneffatan ture.
[4] Herodis hogguu Phexiroos qabe mana hidhatti isa galchee ti, eeggaa isaa tiif, waardiyyoota murna afuritti, dabarsee ti isa kanne. Tanaas wanni godheef, Ayyaanni Bira Dabruu eega dabre booda, ummata duratti isa dhiheeysuu barbaadee ti.
[5] Akkasitti Phexiroos mana hidhaa keeysatti eeggama ture, waldayan kiristaanaa ammoo odoo gargar hin kutin, Rabbi ni kadhattiif turte.
[6] Halkanuma silaa Herodis Phexiroos dhiheeysu san, Phexiroos shanshalata lamaan hidhamee, loltuu lama jidduu ni rafa ture; waardiyyoonni niis balbala mana hidhaa dura dhaabbatanii ni eegu turan.
[7] Kunoo, dingatuma maleeykaan Gooftichaa mullate; nuurri tokkoos mana hidhaa ni ibse. Maleeykaan suniis cinaacha Phexiroos hurutee ti hirriibaa dammaysee, “Dafii ka'i!” jedheeni; hogguusuma shanshalanni inni ittiin hidhame harka isaa irraa bubu'e.
[8] Maleeykichi ammaas, “Hidhadhu, kophee tee tiis kaayadhu!” jedheeni. Phexiroosiis ka'ee ti hidhatee, kophee isaa tiis kaayate; maleeykichi ammaas, “Huccuu tee uffadhuu tii ana duukaa bu'i!” isaan jedhe.
[9] Phexiroos mana hidhaa keeysaa bahee ti, maleeykicha duukaa qaceele. Haa tahu malee, wanni maleeykaan Gooftaa godhe sun, dhugaa tahuu hin beeyne, waanuma mullata arke itti fakkaate.
[10] Hogguu isaan waardiyyoota warra duraa tii fi ammaas warra lammadaa biraas dabran, karra sibiilaa tan magaalaatti baaftutti dhufan. Karriti niis oduma namni hin tuqin ifumaaf isaaniif banamte. Isaaniis gadi bahanii ti karaa tokko irra hanga takka eega deeman booddee, maleeykichi dingatuma Phexiroos irraa if dahe.
[11] Phexiroos hogguu if bayyannate, “Gooftichi maleeykaa isaa ergee, harka Herodisii fi harka Yihudoota warra hamaa na irratti yaadan hundumaa jalaa na eewale, ammaaan tanaan mirkanii dhaan beeke” jedhe.
[12] Phexiroos tana akkuma hubateen, gara mana Maariyaam haadha Yohannis yookiin Maarqos jedhamuu ti dhaqe; achitti namoonni hedduun walitti qabamanii kadhachaa ti turan.
[13] Hogguu Phexiroos balbala karraa dhadhawe, intala Roodaa jedhamtu takkaa tu jalaa owwaatte.
[14] Isiiniis Phexiroos tahuu sagalee isaa tiin beeytee ti, gammachuun hulaa irraa banuu dhiiftee ti, fiiydee ol seentee ti, “Phexiroos karra dura dhaabbata!” jettee ti himte.
[15] Warri dhagayan ammoo, “Ati ni maraatte fakkaatta” isii dhaan jedhan. Isiin ammaas, “Lakkii isumaa” jettee ti falamte. Hogguus isaan, “Tariihuu maleeeykaa isa eegu taha” jedhan
[16] Phexiroos ammoo balbala karraa dhadhawuu itti fure; balbalicha hogguu bananii, Phexiroos arkan, baasuma itti taate.
[17] Callisanii akka isa dhaggeeyfataniif harkaan milikkita isaaniif kanne; Gooftichi mana hidhaa keeysaa akkamitti akka isa baase isaanitti odeeysee ti, “Dubbii tana Yaaqoobii fi obboleeyyanitti himaa!” jedhee, bahee ti bakka biraa dhaqe.
[18] Bariinaan lafa buunaan waariyyoonni, Phexiroos akkam tahe irratti, hedduu dha shoorarkaawanii muddaman.
[19] Herodisiis Phexiroos barbaachisee dhabnaan, waardiyyoota Phexiroos eeguuf ramadamanii turan san xiinxalee ti, haa ajjeefamanii jedhee ti itti ajaje. Kana booddee Herodis Yihudaadhaa Qiisaariyaatti gadi bu'ee ti, hanga takka achi taa'e.
[20] Herodis warra Xiiroosii fi Sidoonitti dallanee ti ture; isaan ammoo wal tahanii mana isaa dhaqanii ti, Bilaasxos kaadamaan mana mootichaa sun, Herodisitti dhihaatee akka isaan araarsuuf gaafatu, tole isa jechisiifatan; wanni tana godhaniifiis, ummanni isaanii, midhaan nyaataa kutaa Herodis bulchu keeysaa waan arkataniif jecha ture.
[21] Guyyaa beelama isaanitti Herodis uffata mootummaa uffatee, bakka ol-ka'aa isaaf qophaawe irra taa'ee ti, isaanitti dubbate.
[22] Namoonni hogguus sagalee isaanii ol fudhatanii ti, “Kun sagalee namaa tii miti, sagaluma Rabbii ti malee” jedhanii ti isa faarsan.
[23] Ulfina kana Rabbiif dabarsee waan hin kanniniif jecha, hogguusuma maleeykaan Gooytichaa isa dhawe; akkasitti Herodis raammawee ti du'e.
[24] Qoowliin Rabbii ammoo guddachaa, baballachaa ti deemte.
[25] Baarnaabaasii fi Saa'ol, hojii itti ramadaman san raawwatanii ti Yerusaaleem irraa deebi'an; ammaas Yohannis kan Maarqos jedhamuus, ifiin wajjiin fidan.