[1] Ergaan tun ana Phaawulos, gabricha Yesuus Kiristoos, kan ergamaa tahuuf yaamamee, Oduun Gammachuu Rabbii akka beekamtu godhuuf addatti baafameen katabamte.
[2] Oduun Gammachuu tuniis, tan Rabbi duraan dursee karaa nabiyyoota isaa tiin Barreeyfama Qulqulluu keeysatti abdachiise.
[3] Kuniis waa'ee Ilma isaa kan akka dhaloota namummaatti shanyii Daawwid keeysaa dhufu ture.
[4] Akka ruuha qulqullummaatti warra du'an keeysaa ka'uu dhaan Yesuus Kiristoos Gooftaan keenya Ilma Rabbii tahuun isaa qiwwaan beeysifamee ti jira.
[5] Ulfina maqaa isaa tiif saboota hundumaa keeysatti ajajamuu amantii akka fidnuuf ni'imaa fi ammaas ergamummaa karaa isaa tiin fudhannee ti jirra.
[6] Isin warri Yesuus Kiristoosiif kannamuuf yaamamtaniis wajjumaan as keeysatti lakkaawamtanii ti jirtu.
[7] Ammaas isin warra Rooma jiraattan, kanneen Rabbi jaalatee akka qulqulloota taataniif isin yaame hundumaa fuu, “Rabbi Abbaan keenya, Gooftaan keenya Yesuus Kiristoosiis ni'imaa fi nagayaas isiniif haa kannu!” jedhee tiin nagaya kiyya isiniif dhiheeysa.
[8] Duraan dursee, amantiin teeysan guutummaa biyya addunyaatti waan beekamteef, hunduma keeysaniif jecha, Yesuus Kiristoosiiniin Rabbii kiyya galateeyfadha.
[9] Rabbi inniniin ani Oduu Gammachuu Ilma isaa lallabuu dhaan garaa kiyya guutuun kaadamu, ani wayta hundumaa akkaan isin yaadadhu ragaa kiyya.
[10] Kadhata kiyya keeysatti wayta hundumaa, fedhii Rabbii tahee dhuma irratti wayta ammaa tana dhufee isin arkuuf akka na dandeeysisuun kadhadha.
[11] Ani isin arkee, kannaa ruuhaa tiis isiniin gahee, akka isin ittiin jabaattan kajeellaan qaba.
[12] Tuniis, anaa fi isin amantii teenya jechuun, amantii tiyyaa fi teeysaniin akka wal jajjabeeysinuufi.
[13] Yaa obboleeyyan koo, wayta hedduu gara keeysan dhufuu akeekuu kiyya akka beeytan niin fedha; ammoo wayta hundumaa hanga ammaatti ittifamee tiin jira. Saboota saba Israa'el hin tahin warra biraa keeysatti akkumaan hojjadhe, hojii firii qabdu isin jidduttiis hojjachuun fedhaan ture.
[14] Ani saba hundumaa fuu, warra Giriigotaa tii fi warra Giriigota hin tahiniifiis, warra beekumsa qabanii fi warra wallaaloofiis, dirqamaan itti gaafatamuu qabuu tu ana irra jira.
[15] Kanaaf jechaan, ani isin warra magaalaa Roomaa jiraattanitti Oduu Gammachuu lallabuuf hedduun hawwa.
[16] Ani wangeelatti hin qaanfadhu, wangeelli warra amantii qaban hundumaa kan najaa baasu, humna Rabbii ti; najaatni kuniis dura warra Yihudaafi, akkasumatti ammaas saboota hundumaaf kanname.
[17] Qaceelummaan Rabbi biraa taatees, wangeela keeysatti mullatee ti jirti; tuniis jalqaba irraa hanga dhumaatti qaceelummaa amantii dhaan taatee dha. Kitaaba keeysatti, “Namni qaceelaan amantiin jiraata” jedhamee barreeyfamee ti jira.
[18] Lolli Rabbii, Rabbi-dhablee fi dilaawoo hamoo hundumaa irratti, samii irraa ni mullata; isaan jallina isaanii tiin dhugaa gadi hacuucu.
[19] Waa'ee Rabbii, wanni beekamuun male isaaniif ifa godhame; kanaas Rabbumaa tu isaan agarsiise.
[20] Zaatni Rabbii kan hin mullanne tahu illee, uumama addunyaa irraa jalqabee qiwwaan isaa tan abad, haalli Rabbummaa isaa tiis uumaa isaa keeysatti zaahiritti mullatee ti jira. Kana waan taheef jecha, Banii Aadam waan itti sababatu hin qabu.
[21] Rabbi oduma beekanii, akka Rabbummaa isaatti ulfina hin kannineef, hamdiis isaaf hin galchine; ammoo yaada isaanii tiin waan maalaa-yaanii duukaa dha bu'an, duudaan qalbii isaanii tiis ni dukkaneeyfamte.
[22] Hikma-qabeeysa oduma ifiin jedhanii ti gowwooman.
[23] Ulfina durrii Rabbii hin duunee, bifa nama du'utti, bifa shimbirrootti, bifa bineensa miila afuritti, bifa warra lafa irra munyuuqanittiis ni jijjiiran.
[24] Eegasuu Rabbi kajeellaa qalbii isaanititti, shahawaa najisummaatti qaama isaanii wal fafeeysuttiis dabarsee ti isaan kanne.
[25] Isaan, dhugaa Rabbii sobatti jijjiiranii ti jiru; Rabbi kan hundumaa uume dhiisanii ti waan uumame ibaadan. Rabbi ammoo bara baraaf galateeyfamaa dha! Aammiin.
[26] Sababa kanaaf jecha, Rabbi kajeellaa nama sablisutti dabarsee ti isaan kanne; dubartoonni isaanii illeen, karaa ittiin fedha foonii tiif dhiiratti ida'aman kan uumamaan kannameef dhiisanii ti, gara waan uumamaan isaaniif hin kannaminitti jijjiiratan.
[27] Warri dhiiraa tiis akkasumatti karaa ittiin fedha foonii tiif dubartitti ida'aman, kan uumamaan kannameef dhiisanii, wal-kajeellaa dhaan gubatanii ti jiru; warri dhiiraa tiis wal fafeeysanii, jallina isaanii tiif adaba isaan barbaachisu arkatanii ti jiru.
[28] Kana malees, beekumsa Rabbii qabaachuu illeen barbaachisaa waan isaanitti hin fakkaatiniif, waan godhuun isaan irra hin jirre akka godhaniif, Rabbi hangullaa gad-dhiifamtutti dabarsee ti isaan kanne.
[29] Isaaniis mujrimummaa, hammeenya, bolola, sharrii hundumaan guutamanii ti turan. Hinaaffaan guutamanii, nama ajjeesu, dubbii nama barbaadu, ni gowwoomsu, histii godhu, ni hamatu;
[30] maqa nama balleeysu, Rabbi ni jibbu, humnaan nama irratti ka'u, if irra dhawu, if dhaadatu, karaa sharrii ti uumu, haadhaa fi abbatti aaqqawu.
[31] Qalbii hin qaban, wa'ada diigu, jaalala hin qaban, rahamata hin qaban.
[32] Seera qaceelaa Rabbii oduma beekanii, warri kana hojjatuus du'uun akka isaan irra jiru beekaa, kana hundumaa godhuuf itti fufu; kanneen qofa odoo hin tahin, ammaas warra kanneen godhuufiis fudhatama kannu.