[1] Namticha Anaaniyaas jedhamu tokkoo tu ture; inni niitii isaa Safiiraa wajjiin wal tahee ti, lafa qaban takka gurgurate.
[2] Horii isaa ammoo, niitiin isaa tiis sirritti odoo beeytuu, hanga tokko irraa dhooyfatee, waan hafe fidee ti miila ergamootaa dura kaaye.
[3] Phexiroos hogguus, “Yaa Anaaniyaas, ati Ruuhal Qudus duratti kijibuuf, ammaas horii araddaa tee itti gurgurte keeysaa hanga tokko akka dhooyfattuuf, maaliif Sheeyxaanni qalbii tee si guute?
[4] Qabeenyi kee kun odoo hin gurgurin dura kee ti ture, eega gurgurtees maallayni kee tuma turee mitii? Eegasuu akkamitti qalbii tee keeysatti waan tana godhuuf yaadde? Ati namoota duratti odoo hin tahin, Rabbi duratti kijibdee bar!” jedheeni.
[5] Anaaniyaas dubbii tana akkuma dhagayeeni, lafa dhawee ti du'e; warri tana dhagayan hundi niis, ni baaragan.
[6] Dargaggoonni ammoo dhufanii ti, reefka isaa fuudhanii, geeysanii ti awwaalan.
[7] Kun tahee, akka za'aa sadihii booddee, niitiin isaa waan tahe odoo hin beekin dhufte.
[8] Phexiroos ammaas, “Mee natti himi, araddaa teeysan dhugumaan hammanumatti gurgurtanii?” jedheeni; isiiniis, “Eeyye, nuti hammasumatti gurgurre” jetteeni.
[9] Phexiroos hogguus, “Ruuhaa Gooytaa fitinuuf, isin maaliif wal taatan? Warri jaarsa kee awwaalan kunoo, amma balbala dura jiru, siis akkasumatti gadi si baasu!” isiin jedhe.
[10] Isiiniis hogguusuma miila isaa jalatti lafa dhooytee ti duute; dargaggoonni suniis ol seenanii akka duute agarraan, gadi baasanii ti jaarsa isii cinaatti isiis awwaalan.
[11] Waldayan amantootaa guutummaatti, warri tana dhagayan hundi niis ni baaragan.
[12] Hogguus milikkinninii fi baasni hedduun harka ergamootaa tiin ummata san jiddutti ni hojjatama ture, amantoonni hundi niis hulluuqoo Solomoonitti wal ni gahu turan.
[13] Warra biraa keeysaa ammoo, namni tokko illeen isaanitti makamuuf ija hin jabaanne; haa tahu malee, ummata duratti kabajaa ni qabu turan.
[14] Kana hundumaa irrattiis warri Gooftatti amanan, dhiiraa fi dubartiin hoddomaachaatuma deeman.
[15] Hogguu Phexiroos karaa irra dabru, gaadidduun isaa illeen isaan keeysaa hanga tokko irra akka buutuuf jecha, dhukkubsattoota wasaasaa fi saleenaan fidanii ti karaa irra kakaayan.
[16] Mandaroota naannawa Yerusaaleem irraa, namoonni hedduun, dhukkubsattootaa fi warra ruuhaanonni hamoon rakkisan, walitti qabanii ni fidu turan; warri geeyfaman hundi niis ni aafihamu turan.
[17] Angafni lubootaa ammoo warra Saduuqotaa keeysaa murna isa gargaaran wajjiin, hinaaffaan guutamanii ti, ergamoota irratti ka'an;
[18] isaaniis qaqqabanii ti mana hidhaatti galchan.
[19] Maleeykaan Rabbii Gooytaa ammoo, halkan keeysa balbaloota mana hidhaa san banee, isaan gadi baasee ti,
[20] “Deemaa Beeytal Maqdas keeysa dhaabbadhaa tii, ilmii qoowlii jireenyaa tana hundumaa, ummatatti himaa!” isaaniin jedhe.
[21] Isaaniis qoowlii tana dhagayanii, akkuma lafti bariiteen Beeytal Maqdas seenanii ti barsiisan. Angafni lubootaa tii fi warri isa gargaaraniis ni dhufan, ammaas qondaalota yaa'ii ummata Israa'el hunda walitti yaamee ti, ergamoota warra hidhaman san fichisiisuuf gara mana hidhaa sanitti erge.
[22] Warri ergaman hogguu mana hidhaa dhufan, achi keeysaa isaan dhabnaan, deebi'anii ti warra isaan ergetti gabaasan.
[23] “Manni hidhaa akka gaaritti jabeeyfamee cufamee, waardiyyoonni niis balbala hunduma dura dhadhaabbatanii ti agarre; hogguu mana banne ammoo, nama tokko illee keeysatti hin agarre!” jedhan.
[24] Alaqaan waardiyyaa Beeytal Maqdasii fi, luboonni angafoonni tana dhagayanii, maaluma tahan laata jechuun fajaajawanii ti turan.
[25] Eegas namtichi tokko dhufee ti, “Namoonni isin mana hidhaatti galchitan sun, kunoo Beeytal Maqdas keeysa dhaabbatanii ummata barsiisaa ti jiru” jedhee ti isaanitti hime.
[26] Hogguus alaqaan waardiyyaa Beeytal Maqdas, namoota isaa wajjiin deemee ti, jara gara yaa'itti isaan fide; ammoo ummanni dhagaa dhaan nu rukuta jedhanii waan sodaataniif jecha, xabii kaasinii hin daararkeeysine.
[27] Ergamootaas fidanii ti yaa'ii dura dhaabbachiisan. Hogguus angafni lubootaa gaaffii dhaan isaan xiinxalee,
[28] “Nuti maqaa kanaan akka hin barsiifne, gadi jabeeysinee isin ajajnee ti jirra, isin ammoo barsiisa keeysaniin Yerusaaleem waliin geeysanii ti jirtu; dabartanii ammaas dhiiga namticha kanaa nu irratti fiduu dha barbaaddu!” jedhaniin.
[29] Phexiroosii fi ergamoonni warri kaaniis deebisanii, “Nuti namaaf ajajamuu irra, Rabbiif ajajamuu tu nu irra jira.
[30] Rabbiin abbootii teenyaa, Yesuus, isin muka irratti fanniftanii ajjeeftan san, du'aa kaasee ti jira.
[31] Rabbi toowbaa fi oomfii dilii Israa'eliif kannuuf jecha, hoogganaa fi naja-baasoo godhee, gara harka mirga isaatti kabajaan ol isa kaasee ti jira.
[32] Nuti ammoo dubbii tana hundumaaf ragaa dha, Ruuhal Qudus, Rabbi warra isaaf ajajamaniif kannees, akkasumatti ragaa dha baha” jedhan.
[33] Warri yaa'ii irra turan tana dhageenyaan, aarri garaan isaan gubannaan, ergamoota ajjeesuu barbaadan.
[34] Haa tahu malee, yaa'uma san keeysa, Fariisticha barsiisaa seeraa, kan maqaan isaa tiis Gamaali'el jedhamu, kan ummata hundumaa birattiis kabajaa qabu tokkoo tu ture. Namtichi kun ka'ee dhaabbatee ti ergamoonni sun wayta gabaabduuf akka gadi baafaman ajaje.
[35] Hogguus yaa'ii dhaan, “Yaa namoota Israa'el, waan jarreen kana gootan irratti if eeggadhaa!
[36] Kanaan duraas Toyidaas ka'ee, akka nama jiruu tokko if goggoonaan, hanga nama dhibba afurii tokko isa duukaa dha bu'an; ammoo inninuu ni gorra'ame, warri isa duukaa deemaniis bittinfamnaan, bilaashumatti hafte.
[37] Akkasuma kanatti ammaas, Yihudaan namtichi biyya Galiilaa, bara lakkooysa ummataa san ka'ee, namoota hedduu dogoggorsiisee if duukaa buusee ti ture; inni niis harka namaatti duunaan, warri duuka-buutuu isaa tiis ni bittinnaawan.
[38] Haala amma dhalate kana irrattiis wanniniin isiniin jedhu, haa deemanii jara kanneen gadi dhiisaa! Akeekni isaanii yookiin hojiin isaanii tun, yaaduma namaa yoo taate, baduun isii tuu hin hafu.
[39] Waan Rabbi biraa dhufe yoo taate ammoo, jara kanneen balleeysuu hin dandeeysan; ifuma keeysanii fuu Rabbiin odoo morkitanii akka hin arkamneen isin yaadachiisa” isaaniin jennaan, yaa'ichi gorsa Gamaali'el ni dhagaye.
[40] Achi irratti warri yaa'ii taa'an ergamoota ol yaamanii ti garafanii, maqaa Yesuusiin akka hin dubbannees dinniinanii ti gadi isaan dhiisan.
[41] Ergamoonni hogguus, ulfina maqaa isaa tiif jecha, sablachuuf waan carraa arkataniif, gammachuuni yaa'icha biraa gadi bahan.
[42] Ergamoonni guyyuu Beeytal Maqdas keeysatti, mana tokkoo kaanittiis dabraa barsiisaa, ammaas Yesuus, Masiihi akka tahe Oduu Gammachuu himuu irraa gargar hin kutne.