[1] Kana booddee Phaawulos magaalaa Ateenaa gadi dhiisee ti deemee, magaalaa Qorontoos dhaqe.
[2] Achittiis namticha Aqiilaa jedhamu, Yihudii biyya Phonxoositti dhalate tokkoon wajjiin wal qunname. Namtichi kun dhiheenya kana niitii isaa Phirisqillaa wajjiin, Kilaawudiiyos mootichi biyya Xalyaan, Yihudiin hundinuu magaalaa Roomaa keeysaa akka bahan waan ajajeef jecha, Rooma gadi dhisee ti dhufe; Phaawulosiis isaan kana laaluuf dhaqe.
[3] Dalagaan isaanii aaynaa takka waan taateef, Phaawulos isaan wajji taa'ee ti hojjate; dalagaan isaanii tiis dukkaana hodhuu dha ture.
[4] Sanbatuma jirutti ammaas mana sagadaa Yihudootaa dhaqee, Yihudootaa fi Giriigota amantii fudhachiisuuf isaanii wajjiin ni falama ture.
[5] Siilaasii fi Ximotewoos Maqedooniyaa irraa wayta Qorontoos dhufan, Phaawulos hojuma qoowlicha lallabutti if kannee, Yesuus, Masiihicha tahuu isaa Yihudootaaf ragaa bahaa ti ture.
[6] Jarri isaan morman, hogguu isa arrabsan ammoo, inni uffata isaa hurgufatee ti, “Dhiiyni keeysan mataa keeysan irra haa tahu, ani tana irraa xaahara; kanaaf ani ammaa kaasee gara saba qomoo Israa'el hin tahinii deemuu kiyya” isaaniin jedhe.
[7] Eegas achii ka'ee deemee ti, mana namticha Tiitoos Yusxoos jedhamu, nama ibaadaa Rabbii qabu, kan manni isaa mana sagadaa Yihudootaa cinaa ti dhaqe.
[8] Kiriisphoos alaqaan mana sagadaa sanii tiis, haaskaa isaa hundumaa wajjiin Gooftatti amane; warra Qorontoos keeysaahiis hedduun isaanii lallaba Phaawulos dhagayanii ti amananii cuuphaman.
[9] Gooftaan gaaf tokko halkan mullataan Phaawulosiin, “Hin sodaatin dubbadhu, niis hin callisin!
[10] Ani waaniin si wajji jiruuf jecha, nam tokko illeen sitti ka'ee si miidhuu hin dandayu; ani bar kunoo, mandaruma kana keeysaa namoota hedduu dhaan qabaa” jedheeni.
[11] Phaawulosiis akkasitti, Qoowlii Rabbii isaan barsiisaa ti, bara tokkoo fi ji'a jaha isaan bira ture.
[12] Bara Gaalii'on bulchaa Akaayyaa tahee ture ammoo, Yihudoonni bakka takkaa ka'anii Phaawulos qabanii ti yaa'ii duratti isa dhiheeysanii,
[13] “Namtichi kun, karaa seeraan faalaa taheen Rabbi ibaadaa jechaa namoota fudhachiisaa jira” jedhanii ti isa kasasan.
[14] Phaawulos ammoo dubbachuuf hogguu ka'u, Gaalii'on Yihudotaan, “Dubbiin tun silaa tan waa'ee yakka hojjatamee yookiin badii godhamee odoo taate, yaa Yihudoota, ani isiniif obsuun qabaan ture.
[15] Amma ammoo, falamaan teeysan waa'ee jechootaa tii fi maqaalee, ammaas waa'ee seera keeysanii eega taate, isinummaan fixadhaa malee, ani dubbii tanatti firdii kannuu hin barbaadu” jedhee ti,
[16] mana murtoo keeysaa isaan gadi yaase.
[17] Eegas warri achi turan hundinuu, Sostenees namticha alaqaa mana sagadaa ture san qabanii ti, mana murtoo duratti tuman; Gaalii'on ammoo tana hundumaa huu humaattuu hin lakkooyne.
[18] Phaawulos amantoota Qorontoos bira guyyaa hedduu dabalee eega bubbule booddee, nagaya isaanitti dhaammatee ti, Phirisqillaa fi Aqiilaa wajjiin markabaan Sooriyaa dhaquuf ka'e; Phaawulos qodha godhe waan qabuuf jecha, Kancheriyaa bakka buufata markabaatti rifeensa mataa isaa haaddate.
[19] Magaalaa Efesoon hogguu gahan, Phirisqillaa fi Aqiilaa bakka takkatti dhiisee ti, ifiif mana sagadaa dhaqee, Yihudootaa wajjiin falamaa ti dubbate.
[20] Hogguu isaan Phaawulos dabalee akka isaan bira turuuf kadhatan; inni ammoo hin fudhanne.
[21] “Yoo Rabbi jedhe isinittiin deebi'a” isaaniin jedhee, nagaya isaanitti dhaammatee, markabaan Efesoonii ka'ee ti deeme.
[22] Magaalaa Qiisaariyaa hogguu gahe Yerusaaleem dhaqee ti, waldaya kiristaanaa nagaya gaafate; dabree Anxookiyaa biyya Sooriyaatti gadi bu'e.
[23] Achiis hanga takka tutturee ka'ee ti, kutaa Galaatiyaa tii fi Firiigiyaa keeysa bakka takkaa taanitti dabraa ti irraa naannawuu dhaan, amantoota hundumaa jajjabeeyse.
[24] Wayta san namticha Apholos jedhamu, Yihudii magaalaa Iskindiriiyaatti dhalate tokkoo tu, magaalaa Efesoon dhufe; inni nama hayyummaa qabuu fi Kitaabotaas akka gaaritti nama beeku ture.
[25] Inni namuma cuuphaa Yohannis qofa beeku tahu illee ammoo, qoowlii Gooftaa tiis hanga takka waan barsiifameef jecha, mirqaana ruuhaa tiis waan qabuuf, waa'ee Yesuus qaceellotti lallabaa, ni barsiisaas ture.
[26] Ija-jabummaan mana sagadaa keeysattiis dubbachutti ka'e. Phrisqiilaanii fi Aqiilaan hogguu isa dhagayan, ifitti isa dhiheeysanii ti, caalatti sirreeysanii karaa Rabbii isa hubachiisan.
[27] Apholos Akaayyaatti dabruu hogguu barbaade, amantoonni isa jajjabeeysanii ti barattoonni Akaayaa jiran akka isa simataniif xalayaas ni barreeysaniif. Inni niis hogguu achi gahe, warra ni'imaa dhaan amantii fudhatan hedduu dha gargaare.
[28] Yesuus Masiihicha tahuu isaa, Kitaabota keeysaa ragaa mirkaneeysu itti as baasaa, zaahiritti Yihudoota afaan qabachiisee ti ture.