[1] Phaawulosii fi Baarnaabaas magaalaa Iqooniyuumittiis mana sagadaa warra Yihudootaa seenanii akka gaaritti lallabanii ti turan; akkasitti Yihuudotaa fi Giriigota keeysaa hiis namoonni hedduun ni amanan.
[2] Yihudoonni warri hin amanin ammoo, namoota warra saba qomoo Israa'el hin tahinitti, yaada hamaa naquu dhaan obboleeyyan irratti isaan kaasan.
[3] Akkasumaanuu ergamoonni wayta dheeraaf achuma taa'anii ti, ija-jabummaa dhaan Gooftaa Yesuus lallaban; Gooftaaniis milikkinninii fi baasni adda addaa harka isaanii tiin akka raawwatamu godhuu dhaani, qoowlii ni'imaa isaa mirkaneeyse.
[4] Haa tahu malee, ummanni mandarichaa sun gargar babahan; hangi tokko Yihudootaan wajji tahan, warri kaan ammoo gara ergamootaa ti goran.
[5] Wayta sabni qomoo Israa'el hin tahinii fi Yihudoonni niis, hooggantoota isaanii wajjiin, ergamoota san miidhuu fi dhagaa dhaan isaan rukutuuf yaalii godhan.
[6] Ergamoonni ammoo dubbii tana dhagayanii ti, mandaroota Lisxiraa tii fi Darbee kanneen Liqaa'oniyaa keeysa jiranitti, ammaas biyya ollaa san jiranitti jalaa baqatan.
[7] Achittiis Wangeela lallabuu ittuma furan.
[8] Magaalaa Lisxiraa keeysa namticha dhalootuma irraa kaasee naaffate, kan miillan isaa tiin takkaa tuu deemee hin beeyne tokkoo tu achi jira ture.
[9] Namtichi kun waan Phaawulos jedhu dhaggeeyfachaa ti ture; hogguus Phaawulos ija isatti dhaabee ti, akka inni fayyifamuuf amantii qabu arkee.
[10] Hogguusuma sagalee guddoo dhaan, “Ka'ii diriirii miila kee tiin dhaabbadhu!” jedheeni; namtichi niis utaalee ka'ee ti, asii fi achi deddeeme.
[11] Ummanni achi turan waan Phaawulos hojjate hogguu arkan, sagalee isaanii ol fudhatanii afaan Liqaa'oniyaa tiin, “Waaqayyoliin namoota fakkaatanii gadi nutti bu'anii ti jiru” jedhanii ti dubbatan.
[12] Baarnaabaasiin, Zeos jedhan, Phaawulosiin ammoo inni dubbataa waan taheef jecha, akka ergamaa waaqayyolii isaaniititti, Hermees jedhanii ti isa moggaasan.
[13] Lubni Zeos, kan galmi isaa mandaricha irraa waa xiqqo ala ture tokko, korommii fi daraaraa gara karra mandarichaa fidee ti, ummataan wajjiin ergamoota saniif aarsaa dhiheeysuu dha barbaade.
[14] Ergamoonni Baarnaabaasii fi Phaawulos hogguu tana dhagayan, uffata isaanii tarsaasanii iyyaa gadi orihanii ti ummata keeysa seenanii,
[15] “Yaa ormana, maaliif waan kanneen hojjattu? Nuti waaqayyolii miti, namootuma akka keeysanii ti. Waan maalaa yaanii kanneen ibaaduu dhiiftanii, gara Rabbii Jiraataa akka deebitaniif jecha Oduu Gammachuu dhaa isiniif fidne; Rabbi, samii, dachii fi bahariis, ammaas waan isaan keeysa jiran hundumaa kan uumee dha.
[16] Dhaloottan dabran keeysatti ummanni biyya addunyaa irraa hundinuu karuma ifii fedhan akka deeman isaan itti dhiise.
[17] Haa tahu malee, inni ragaan maletti if hin dhiifne. Samii irraa rooba isiniif roobsee, firii midhaanii tiis wayta isaaniititti bilcheeyse. Sooraas isiniif kannee ti, qalbii teeysaniis gammachuu dhaan guute; waan gaarii kanneen hundumaa godhuu isaa tiiniis jiraachuu isaa mullisee ti jira” jedhaniin.
[18] Ergamoonni tana hundumaa isaanitti himan illee garuu, jarri aarsaa akka hin dhiheeysine dhoorkuun hedduu dha isaan dibe.
[19] Hogguus ammoo Yihudoonni mandaroota Anxookiyaa tii fi Iqooniyuum irraa dhufan tokko, ummata san yaada ifii qaban fudhachiisuu dhaan, Phaawulos dhagaa dhaan rukutanii, waan du'e seehanii ti, magaalaa keeysaa alatti gadi isa shoroysan.
[20] Wayta amantoonni dhufanii isaan marsan ammoo, Phaawulos lafaa ka'ee ti magaalaa seene; guyyaa borumtii dhaa ammaas Baarnaabaasiin wajjiini magaalaa Derbeetti deeme.
[21] Phaawulosii fi Baarnaabaas magaalaa Derbeetti Wangeela lallabuu dhaan, namoota hedduu barattoota eega godhan booddee, mandaroota Lisxiraa tii fi Iqooniyuum irraa gara Anxookiyaa biyya Phisiidiyaatti deebi'an.
[22] Isaan amantoota qalbii jajjabeeysaa ti, amanti tiis jiraachuu akka itti fufanii fi, ammaas balaa hedduu keeysa dabarree Mootummaa Rabbii seenuu tu nu irra jira jedhanii ti gorsan.
[23] Ergamoonni waldayoota hundumaa fuu matumatti manguddoota ni shuuman, soomananii eega kadhatan booddees, amantoota san hundumaa harka Goofticha itti amananitti hadaraa dha kannan.
[24] Isaan eegasii kutaa Phisiidiyaa keeysa dabranii ti, kutaa Phamfiliyaa dhaa dhufan.
[25] Phergeettiis qoowlicha lallabanii ti gara magaalaa Ataaliyaa ti gadi bu'an.
[26] Achii ka'anii ti doonii dhaan, gara Anxookiyaa biyya Sooriyaa, bakka hojii raawwatan tanaaf ni'imaa Rabbitti hadaraa kannamanitti deebi'an.
[27] Wayta Anxookiyaatti galan, amantoota waldaya sanii walitti yaamanii ti, waan Rabbi isaanii wajjiin dalage hundumaa, ammaas akkaataa inni saba qomoo Israa'el hin tahiniif, hulaa amantii dhaa baneef itti gabaasan.
[28] Achittiis wayta dheeraa dha amantoota wajjiin dabarsan.