[1] Ayyaanni guyyaa shantammeeysaa kan Phenxeqostee jedhamu hogguu gahe, hundinuu isaanii tuu bakka takkatti walitti qabamanii ti turan.
[2] Dingatuma didirrisni samii irraa, akka bubbee bubbiftutti dhagayamee, mana isaan keeysa jiran guute.
[3] Waan kanneen akka arraba ibiddaa fakkaataniis isaanitti mullatan, gargar babahanii tiis, ammaas hunduma isaanii irra tokko tokkoon tattaa'an.
[4] Hogguus hundi isaanii tuu Ruuhal Qudusiin guutamanii ti; akkuma Ruuhaan dubbachuu isaaniif kannetti, afaan adda addaa tiin dubbachuu jalqaban.
[5] Yihudoonni Rabbi sodaatan kanneen Yerusaaleem keeysa jiraatanii fi kanneen saba biyya lafaa hundumaa keeysaa dhufaniis achi turan.
[6] Didirrisa kana dhageenyaan, hundinuu walitti qabaman; warri Ruuhal Qudusiin guutaman kun, adduma addaan, afaan isaanii hundumaan dubbachuu isaanii dhageenyaan, ajaa'ibanii waanuma jedhan wallaalan.
[7] Birratanii ti haalaan ajaa'ibanii, “Warri dubbachaa jiran kun hundinuu warruma Galiilaa tii mitii?” jedhan.
[8] Dabalanii ammaas, “Eegasuu nuti hundinuu addumaan, akkamitti afaanuma itti ababneen dhageenya ree?
[9] Nuti warri Phaartee, warri Meediyaa, warri Elaam, Mesophotaamiyaa warri jiraannuus, warri Yihudaa, Qaphadooqiyaa, Phonxoosii fi Asiyaa tiis,
[10] nuti warri Firiigiyaa tii fi Phamfiliyaa, ammaas Misraa fi kutaa Liibiyaa keeysaa naannoo Qareenaa, warri laaluuf Roomaa dhufnees, Yihudoonninii fi ammaas warri amantii Yihudaa fudhataniis,
[11] nuti warri Qareexisii fi Araboonni niis, isaan kanneen hojii quduraa Rabbii, afaan keenyaan odoo himanii ti dhageenya” jedhan.
[12] Hundi isaanii birratanii waan godhan wallaalanii ti, “Tun maaluma tahinna?” waliin jedhan.
[13] Warri kaan ammoo, “Isaan kun daadhii quufanii ti jiru” jedhanii ti itti qoosan.
[14] Hogguus Phexiroos warra kudha tokkoo wajjiin dhaabbatee, sagalee isaa ol fudhatee, namootatti dubbachutti ka'e, “Isin yaa warra Yihudootaa, warri Yerusaaleem jiraattaniis hundinuu, mee hubadhaa, dubbiin tiyyaas isiniif haa galtu!
[15] Jarreen kun kan farshaanan isinitti hin fakkaatin; amma ganama, za'aa sagleeysa!
[16] Wanni asitti tahe kun ammoo, waan Rabbi afaan nabi Yo'eliin dubbatee dha;
[17] ‘Guyyaa gara dhumaatti akkana ni taha jedha Rabbi, nama hundumaaf ruuhaa kiyya niin kanna, ilmaan keeysan dhiiraa fi dhalaan raajii ni dubbatu; dargaggoonni keeysan mullata ni arku, manguddoonni keeysaniis manaama ni manaamu.
[18] Eeyye, guyyoota sanitti hojjatoota kiyya warra dhiiraa tii fi dubartiif ruuhaa kiyya niin kanna, raajiis ni dubbatu.
[19] Waan ajaa'ibaa ol samii irratti, milikkitaas gadi lafa irratti, dhiigaa fi ibidda, aara lafaa buk jedhuus niin agarsiisa;
[20] guyyaan Gooftaa dhaa, guddichinii fi ajaa'ibsiisaan odoo hin dhufin dura, aduun dukkanatti, jiini niis dhiigatti ni jijjiiramu.
[21] Maqaa Gooftaa kan yaammatu hundinuu ammoo najaa dha baha’ jedhe.
[22] “Isin yaa warra Israa'el, dubbii tana dhaggeeyfadhaa! Rabbi, Yesuus nama Naazireet kanaan, hojii amrii isaa, baasaa fi milikkita adda addaa kanneen isin beeytan, isin jiddutti hojjachuu isaa tiin fudhatamaa dha isa godhe.
[23] Namtichi kun akka Rabbi duraan dursee akeeka isaa herregetti, ammaas akka beekumsa bara baraa isaattiis dabarfamee ti kanname; isin ammoo harka warra Rabbi hin beeyneen muka irratti fanniftanii ti isa ajjeeftan.
[24] Rabbi ammoo hidhaa du'aa irraa isa hiike; inni du'aan qabamee hafuu waan hin dandeenyeef jecha, deebisee ti du'aa isa kaase.
[25] Daawwid waa'ee isaa tiif, ‘Ani wayta hundumaa Goofticha, if birattiin arka, akkaan hin sossoonees inni mirga kiyyaan jira;
[26] tanaaf jecha garaan kiyya gammade, arrabni kiyyaas ni ililche; kanatti dabalee, foon kiyyaas abdachaa ti jiraata.
[27] Lubbuu tiyya bakka warra du'anitti hin dhiiftu, Tokkicha Qulqulluu kee tiis tortorutti dabarsitee hin kannitu.
[28] Karaalee jireenyaa na barsiiftee ti jirta; ana biratti arkamuun kee tiis, gammachuu dhaan na guuta’ jedha.
[29] “Yaa obboleeyyan koo, waa'ee Daawwid abbaa keenyaa, shakkiin maletti isinitti himuun jaaladha; inni du'ee, ammaas awwaalamee tiis jira, qubbiin isaa tiis hanga arraatti illee nu bira jirti.
[30] Inni nabiyyii waan tureef jecha, ammaas Rabbi asara isaa keeysaa tokko, barcuma mootummaa isaa irra akka teeysisu, kakuu dhaan akka isa abdachiise beekee ti jira.
[31] Kanaaf inni, waa'ee du'aa ka'uu Kiristoos duraan dursee arkee ti dubbate, ‘Inni bakka warra du'anitti hin dhiifamne, foon isaa tiis tortorutti hin kannamne’ jedhee ti raajii dubbate.
[32] Yesuus kana, Rabbii tu du'aa kaase; ammaas hundi keenyaa huu tanaaf ragaa dha.
[33] Inni gara harka mirgaa Rabbii Abbaatti ol kaafamuu dhaan, Ruuhal Qudus abdachiifamee ture Abbaa irraa fuudhuu dhaan, waan amma isin agartanii fi dhageeysan kana dhangalaase.
[34] Daawwid, ifiif gara samitti ol hin baane, haa tahu malee, ‘Gooytichi Gooftaa kiyyaan, gara harka mirgaa kiyyaa taa'i,
[35] adawwii tee ejjata miilaa kee tii hangaan siif godhuu’ jedhee dubbatee ti jira.
[36] Tanaaf Rabbi, Yesuusuma isin muka irratti fanniftan kana Gooftaa fi Masiihi akka godhe, Israa'elonni hundinuu, mirkaniin haa beekanii!” jedhe.
[37] Ummanni niis tana dhagayuun, hanga onnetti gadi isaan waraannaan, hogguus Phexiroosii fi ergamoota warra kaaniiniis, “Yaa obboleeyyan keenya, maal haa goonu ree?” jedhan.
[38] Phexiroos ammaas, “Toowbadhaa, diliin teeysan akka oomfii isiniif godhamtuuf, hundi keeysanuu tokko tokkoon, maqaa Yesuus Kiristoositti cuuphamaa; kannaa Ruuhal Qudusiis ni fudhattu.
[39] Abdiin Rabbi abdachiise isinii fi joollee teeysaniifi, warra fagaatanii jiraataniifiis, Rabbiin keenya Gooytichi warra yaamu hundumaafiisi” jedhee ti deebiseef.
[40] Tana malees Phexiroos, jechoota biraa hedduu dhaan, “Balaa dhaloota jallaa kanatti dhuftu jalaa najaa if baasaa!” jedhee ti, jabeeysee isaan gorse.
[41] Warri dubbii isaa fudhataniis ni cuuphaman; akkasitti guyyaa san hanga lubbuu nama kuma sadihiitu isaanitti dabalame.
[42] Amantoonni niis barsiisa ergamootaatti, asoosama tokkummaatti, biddeena kutachuttii fi ammaas kadhatattiis fardeeyfatanii if kannanii ti jiraatan.
[43] Baasaa fi milikkinni hedduun ergamootaan ni godhamu turan, lubbuun namaa hundi niis sodaa dhaan qabamte.
[44] Warri amanan hundinuu bakka takka wajjiin turan, wanni isaan qabaniis, hundinuu qabeenya walii wajjii ti ture.
[45] Araddaa isaanii tii fi qabeenya isaanii gurguranii, horii isaa tiis nama hundumaaf, akka isa barbaachisetti ni hiru turan.
[46] Guyyuu yaada tokkoon, Beeytal Maqdas keeysatti walgayanii, manneen isaaniittiis biddeena kutatanii, garaa arjaa fi gammachuuniis, nyaata isaanii waliin gayanii ni nyaatu turan.
[47] Rabbiif hamdii galchaa, ummata hundumaa durattiis kabajaan fudhatama arkatan; ammaas Gooftaaniis guyyuu, lakkooysa isaanii irratti warra najaa bahan ni dabale.