[1] Magaalaa Qiisaariyaa keeysa namticha Qorneelewos jedhamu tokkoo tu ture; inni murna waraana Roomaa kan Ixaaliqaa jedhamee yaamamu irratti abbaa dhibbaaleeysaa ti ture.
[2] Inni nama Rabbiif bulee, haaskaa isaa hundumaa wajjiiniis Rabbi sodaatu ture; warra miskiinaas hedduu dha gargaara; wayta hundumaa Rabbuma kadhachaa ti ture.
[3] Gaaf tokko toora za'aa sadihii waaree booda mullata zaahir tahe keeysatti, maleeykaan Rabbii tokko itti ol seenee, “Yaa Qorneelewos!” kan isaan jedhu arke.
[4] Qorneelewos hogguus rifaatuun isa laalee sodaachaa ti, “Tuni maaluma yaa Gooftaa?” jedhee ti isa gaafate. Hogguus maleeykichi, “Kadhanni kee tii fi sadaqaan tee tiis, ol fuula Rabbii duratti siif yaadataman.
[5] Ammumaan tana namoota Yopheetti ergii, namticha Simoon Phexiroos jedhamu tokko fichisiisi.
[6] Inni niis bahar qarqara, mana namticha Simoon jedhamu goga-duuyduu dhaa qubatee ti jira” jedheeni.
[7] Maleeykichi isatti dubbate eega deeme booddee, kaadamtoota isaa keeysaa nama lama, ammaas loltuu amanamoo isa eegan keeysaa hiis tokko yaamee ti,
[8] waan hundumaa isaanitti himee, Yopheetti isaan erge.
[9] Isaaniis amnaaf karaa seenanii guyyaa borumtii dhaa magaalaa Yopheetti dhihaatan. Phexiroos waaree toora za'aa kudha lammeeysatti kadhataaf jecha, wixina mana isaanii gubbatti ol bahe.
[10] Hogguus Phexiroos beelawee ti, waan nyaatu barbaade; haa tahu malee, oduma nyaata isaaf qopheeysutti jiranii ti mullata tokko arke.
[11] Bantiin samii banamtee wanti akka huccuu guddoo xarzii afraniin hidhamte takka lafaatti odoo gadi buufamtuu ti arke.
[12] Makluuqni miila afur qaban, kanneen lafa irra munyuuqan, qilleensa keeysa warri bararaniis, hundinuu huccuu san keeysa turan.
[13] Sagaleen takkaas ammaas, “Yaa Phexiroos ka'ii, qaqqalii tii nyaadhu!” jettee ti itti dubbatte.
[14] Phexiroos ammoo, “Hin tahu, yaa Gooftaa, waan xaahara hin tahinii fi najisa, ani gonkumaa nyaadhee hin beeku” jedheeni.
[15] Ammaas sagaleen marraa lamadaa itti deebitee ti, “Waan Rabbi xaahara godheen, ati najisa hin jedhiniin!” jetteeni.
[16] Wanni tun marraa sadih tahe, wanti akka huccuu guddoo suniis hatattamaan ol fuudhamtee ti samitti ol deebite.
[17] Phexiroos, hiikkaan mullata arke kanaa maal akka tahe, qalbii isaa keeysatti odoo yaadaan itti cinqamaa jiruu, kunoo, ormi Qorneelewos biraa ergaman san, mana Simoon iyyaafachaa dhufanii, balbala isaa dura gayanii ti dhadhaabbatu.
[18] “Namtichi keeysummaa kan Simoon Phexiroos jedhamu tokko, mana kana jiraa laata?” jedhanii ti yaamanii gaafatan.
[19] Phexiroos, maalummaa mullata sanii irratti odoo yaadaa jiruu, Ruuhal Qudus, “Kunoo jarri sadeen tokko alaa si barbaaduu;
[20] ka'ii tii gadi bu'i! Kan isaan erga ana waan taheef jecha, mamiin takkaan maletti isaan duukaa deemi!” isaan jedhe.
[21] Phexiroos jaraatti gadi bu'ee ti, “Namni isin barbaaddan anumaa; isin hoo maaliif jecha dhuftan?” jedhee ti isaan gaafate.
[22] Isaaniis ammaas, “Namticha Qorneelewos jedhamu nama qaceelaa Rabbi sodaatu, ummata Yihudaa hunduma biraa tiis nama maqaa gaarii qabu, abbaa dhibbaaleeysaa kan tahe tokkoo tu, nu erge; maleeykaan qulqulluun, akka Qorneelewos nama sitti ergee mana isaatti si yaamsisee, waan ati isatti himtu si irraa haa dhagayuuf ajajee ti ture” jedhanii ti jawaaba deebisan.
[23] Phexiroosiis ol isaan naqee ti keeysummeeysise. Guyyaa borumtii dhaa, jarreen isaatti ergamanii wajjiin ka'ee ti deeme; obboleeyyan Yophee jiran keeysaa hiis jarri hammi tokko isaa wajjiin deeman.
[24] Guyyaa itti aanuus Qiisaariyaatti galan; Qorneelewosiis aalii isaa tii fi saahibban isaa walitti yaammatee ti dhufa isaan eegaa ti ture.
[25] Wayta Phexiroos ol seenuu bira gahe, Qorneelewos isa simachuuf jecha bahee ti, miila isaa irratti kufee sagadeef.
[26] Phexiroos ammoo ol isa kaasee ti, “Ka'ii dhaabbadhu, aniis bar namaa!” jedheeni.
[27] Isaan wajjiin dudubbachaa hogguu ol seene, namoonni hedduun achitti walitti qabamanii ti arke.
[28] Isaan kanaaniis ammaas, “Yihudiin tokko, nama qomoo biraa tiin wajjiin wal saahibuu fi mana walii dhaquuniis seeraan dhoorkaa akka tahe, isinuu akka gaaritti beeytan; Rabbi ammoo, nam tokko illeenuu, ati najisa yookiin xaaharaa miti jechuun akkaan hin dandeenye ana agarsiisee ti jira.
[29] Kanaaf jechaan hogguu isin natti ergitan, falamaa takkaan maletti dhufe. Ammaas taanaan maaliif ergitanii akka ana yaamtan baruu dhaan barbaada” jedheeni.
[30] Hogguus Qorneelewos deebisee, “Bultii afuriin dura, waytuma za'aa ammaa tanatti, manuma kiyyatti kadhata waaree booda za'aa sadih irratti godhamu irra odoon jiruu, namtichi tokko uffata adii ficha uffatee ana dura dhaabbatee ti,
[31] ‘Yaa Qorneelewos, Rabbi kadhata kee siif dhagayee ti jira, miskiina gargaaruu keetiis siif yaadatee ti jira.
[32] Ammaas Yopheetti nama ergii, namticha Simoon Phexiroos jedhamu, yaamsisi; inni niis Simoon goga-duuyduu, kan manni isaa bahar qarqara jiru bira, keeysummaa tahee qubatee ti jira’ anaan jedhe.
[33] Kanaaf jechaan aniis hogguusumaan nama sitti erge, fedhaan dhufuun keetiis gaarii dha; ammaas kunoo hundi keenyaa huu, waan Gooftichi sitti nuuf hime hundumaa si irraa dhagayuuf, fuula Rabbii duratti walitti qabamnee ti jirra” jedheeni.
[34] Hogguus Phexiroos jara saniin, “Rabbi akka nama wal hin caalchifne amma anaaf gale.
[35] Saboota biyya addunyaa hundumaa keeysaa, namni Rabbi sodaatu, kan waan haqaa dalaguus fuula Isaa duratti fudhatamaa dha.
[36] Qoowlicha Rabbi ummata Israa'elitti erge, Oduu Gammachuu dhaa, nagaya Yesuus Kiristoosiin lallabamaa ture, isinuu akka gaaritti beeytu; ‘Yesuus Kiristoos kun bar Gooftaa hundumaa tii!’
[37] Cuuphaa Yohannis lallabe booddee Galiilaa jalqabee, biyya Yihudaa hunduma keeysatti waan raawwatamees ni beeytu.
[38] Rabbi, Yesuus nama biyya Naazireet kana Ruuhal Qudusiin muudee humnaan akka isa guute, inni niis naannawee hojii gaarii akka hojjate, Sheeyxaanaan warra ugguramaniis akka fayyise, Rabbi isaa wajjiin akka tahees beekamaa dha.
[39] Nutiis biyya Yihudaa tii fi magaalaa Yerusaaleem keeysattiis, waan Yesuus hojjate hundumaaf raga-baatuu dha; isaaniis muka irratti fannisanii ti isa ajjeesan.
[40] Rabbi ammoo guyyaa sadeeysaa irratti du'aa isa kaasee ti, akka mullatu godhe.
[41] Haa tahu malee, namayyuuf odoo hin tahin, numa warra Rabbi raga-baatuu akka taanuuf duraan file, nu warra eega inni du'aa ka'e booda isaa wajjiin nyaannee dhuynetti mullatee ti jira.
[42] Inni Wangeela Banii Aadamitti akka lallabnuuf, warra lubbuun jiranii fi warra du'an irrattiis taanaan, inni kan Rabbiin daanyaa godhamee herregame tahuu isaa tiis ragaa akka baanuuf nu ajajee ti jira.
[43] Nabiyyoonni hundinuu, namni Isatti amanu hundinuu, maqaa isaa tiin oomfii dilii akka arkatu, isaaf ragaa bahanii ti jiru” jedhe.
[44] Oduma Phexiroos tana dubbachaa jiruu, kunoo, Ruuhal Qudus warra Qoowlicha dhagayan hundumaa irrattuu ni bu'e.
[45] Yihudoonni amanan kanneen Phexiroosii wajjiin Yopheedhaa dhufaniis, kannaan Ruuhal Qudus saba qomoo Israa'el hin tahiniif kannamuu agarraan, ajaa'ibuma itti tahe.
[46] Warri Ruuhal Qudus fudhatan sun afaan dur hin beeyneen dubbachaa, ammaas Rabbiif ulfina kannuu isaanii tiis ni dhagayan.
[47] Phexiroos as irratti, “Jarreen Ruuhal Qudus, akkuma nuti arkannetti arkatan kana, akka hin cuuphamne eenyuu tu bishaan dhoorkuu dandaya?” jedhe.
[48] Akkasitti inni, “Maqaa Yesuus Kiristoositti cuuphamaa!” jedhee ti isaan ajaje; kana booddee jarri niis, Phexiroos isaan bira akka bubbuluuf kadhatan.