[1] Phaawulos miseensota yaa'ii ija isaanii keeysa laalaa, “Yaa obboleeyyan kiyya! Ani hanga guyyaa arraatti xalalii gaarii dhaan fuula Rabbii duratti jiraadhee tiin jira” jedhe.
[2] As irratti Ananiyaas angaftichi lubootaa warra Phaawulositti dhihoo jiraniin, “Afaan isaa kabalaa!” jedhee ti ajaje.
[3] Phaawulos hogguus deebisee, “Rabbi si kabaluuf taa'a, ati yaa gidaara nooraa dibame! Akka seeratti anatti firdii godhuuf achi teeysee odoo jirtuu, atummaanuu seera caphsitee ti akkaan kabalamuuf natti ajajjaa?” jedheeni.
[4] Kana booddee warri achi dhaabbatan Phaawulosiin, “Angafa luboota Rabbii ti arrabsitaa?” jedhaniin.
[5] Phaawulos ammaas deebisee, “Obboleeyyan koo! Akka inni angafa lubootaa tahe ani hin beeynee bar, ‘Hoogganaa ummata kee tii irratti hamaa hin dubbatin!’ kan jedhu barreeyfamee ti jira” jedheeni.
[6] Phaawulos hogguus warra achi turan keeysaa garri tokko Saduuqota, garri kaan ammoo Fariisota tahuu isaanii hubannaan, yaa'ii san keeysatti sagalee isaa ol fudhatee, “Yaa obboleeyyan kiyya, ani Fariisota keeysaa tokko, asara Fariisotaa tiis; sababa abdii nuuf kannamee fi, ammaas sababa du'aa ka'uu warra du'anii tiif jechaan kunoo yaa'ii duratti gaafatamaa tiin jira” jedhee ti dubbate.
[7] Akkuma inni tana dubbateen, warra Fariisotaa tii fi warra Saduuqotaa jiddutti wal-dhabbiin kaatee ti, yaa'ichi niis gargar hirame.
[8] Warri Saduuqotaa, du'aa ka'uun hin jiru, maleeykoonni Rabbii, ruuhaanonni niis hin jiran jedhu; warri Fariisotaa ammoo kun hundinuu ni jiran jedhu.
[9] Gooti guddoon ni kaate; murna warra Fariisotaa keeysaa warri seera barsiisan tokko ol ka'anii dhadhaabbatanii ti, “Nuti nama kana irratti balleeysaa hin agarre, ruuhaan yookiin maleeykaan Rabbii kan itti dubbatte yoo taate hoo?” jedhanii ti falaman.
[10] Wal morkuun hoddomaannaan, abbaan kumaaleeysaa jarri kun Phaawulos ni caccaphsu jedhee ti sodaate. Kanaaf loltoonni dhaqanii Phaawulos yaa'ii san jidduu dhaa baasanii, bakka qubata loltutti akka geeysaniif isaan ajaje.
[11] Halkanuma itti aanu ammaas Gooftichi Phaawulos bira dhihaatee ti, “Abshir, jabaadhu! Yerusaaleemitti akkuma anaaf ragaa baatetti, ammaas akkasumatti magaalaa Roomaattiis anaaf ragaa bahuu tu si irra jira” jedheeni.
[12] Lafti hogguu bariite, Yihudoonni waliin marihatanii, Phaawulos odoo hin ajjeesin akka hin nyaanne, akka hin dhuynees waliif kakatan.
[13] Warri mala hamaa kana qopheeysan nama afurtama irra ni caalu turan.
[14] Isaan hogguus luboota warra angafootaa tii fi manguddoota bira dhaqanii ti, “Phaawulos hanga ajjeefnutti akka waa takka illee hin nyaanne kakannee ti jirra.
[15] Kana waan taheef, sii fi yaa'ichi biyyaa waa'ee Phaawulos caalaatti xiinxaluu akka barbaaddan, fakkeeysitanii isin duratti akka dhiheeysuuf, abbaa kumaaleeysaa gaafadhaa! Nuti ammoo odoo inni as hin gahin dura isa ajjeesuuf qophooynee ti jirra” jedhaniin.
[16] Ilmi obboleeytii Phaawulos tokko, akka jarri riphanii Phaawulos eeggachuuf marihatan dhageenyaan, deemee mooraa qubata loltuu ol seenee ti, Phaawulositti hime.
[17] Phaawulos hogguus abbaa dhibbaaleeysaa tokko ifitti yaamee ti, “Dargaggoo kana abbaa kumaaleeysaatti geeysi, inni kunoo waan isatti himu qaba” jedheeni.
[18] Abbaan dhibbaaleeysaa akkasitti dargaggeeysicha fuudhee, abbaa kumaaleeysaatti isa geeysee, “Phaawulos namtichi hidhamaan ifitti na yaamee ti, dargaggeeysa waan sitti himu qabu kana, akkaan gara kee fidu na kadhate” jedheeni.
[19] Abbaan kumaaleeysaa hogguus dargaggeeysicha harka qabee ti kophaatti baafatee, “Maal natti himuu barbaadde?” jedhee ti isa gaafate.
[20] Dargaggeeysichi niis, “Yihudoonni waan yaa'ichi waa'ee Phaawulos caalaatti xiinxaluu barbaade fakkeeysanii, boru Phaawulos akka isaan duratti dhiheeysituuf, si gaafachuuf walii galanii ti jiru.
[21] Ati ammoo tole hin jedhiniif. Isaan keeysaa namoonni afurtama irra caalan riphanii Phaawulos eeggachaa ti jiru; jarri kun Phaawulos hanga ajjeesanitti waa takka illee akka hin nyaanne, akka hin dhuynees, sharxii godhanii ti jiru. Amma isaan qophaawanii hayyama kee eegaa ti jiru” jedhee ti itti hime.
[22] Abbaan kumaaleeysaa hogguus, “Dubbii tana akka anatti himte nam tokkotti illee hin himin” jedhee ti dargaggeeysicha ajajee gadi isa dhiise.
[23] Abbaan kumaaleeysaa hogguus abbaa dhibbaaleeysaa lama yaamee ti, “Edana sa'aatii saglaffaa dhaa jalqabanii, loltuun dhibbi lama, warri faradoo torbaatamni, warri eeboo tiis dhibbi lama Qiisaariyaa dhaquuf akka qophaawan godhaa!
[24] Phaawulos irra teeysiftanii odoo hin miidhamin, Feeliks bulchaa biyyaa biraan gahuufiis, horii kotte-duudaa qopheeysisaaf!” jedheeni.
[25] Ifiif ammoo caaffata kanatti aanee jiru barreeyse.
[26] Wanni inni barreeysees, “Ani Klaawudiiyos Liisiyaas, kabajamaa Feeliks bulchaa biyyaa tiif nagaya kiyya niin dhiheeysa.
[27] Yihudoonni namticha kana qabanii ajjeesuu dha barbaadu; inni nama Roomaa tahuu isaa baree tiin, loltuu fuudhee dhaqee, harka isaanii keeysaa isa baase.
[28] Yihudoonni maaliif jecha namticha kana akka kasasan, gadi fageeysee baruu barbaadee tiin, namticha gara yaa'ii isaanitti geeyse.
[29] Namtichi kun waa'ee waliin morkii seera isaanii irratti kasasame malee, yakka du'aan yookiin hidhaa dhaan isa gahu akka inni hin qabne, xiinxalee bira gahee tiin jira.
[30] Yihudoota keeysaa jarri tokko namticha kana ajjeesuuf akka marihatan anatti himamee ti jira. Kanaafiin hogguusuma gara keetitti isa erge; warra isa kasasanittiis, waan isa irraa qaban fuula kee duratti akka dhiheeyfatan itti himee tiin jira” kan jedhu ture.
[31] Warri loltuu akkuma ajajamanitti, halkanuma san Phaawulos fuudhanii ti Antiiphaaxriis isa geeysan.
[32] Lafti bariinaan loltuun warri miilaa bakka qubata isaanitti deebi'an; warri faradoo ammoo Phaawulosii wajjiin deeman.
[33] Isaan hogguu Qiisaariyaa gahan, caaffaticha bulchaa biyyaatti kannanii ti, Phaawulos ammaas isa duratti dhiheeysan.
[34] Bulchaan biyyaa sun caaffaticha dubbisee, nama godina kamii akka inni tahe gaafatee ti, Phaawulos nama Qiliiqiyaa tahuu isaa addaan bare.
[35] “Warri si kasasan hogguu dhufaniin, dubbii tee ilaala” isaan jedhee ti, mana Herodis ijaarsise keeysatti akka eegamu ajaje.