[1] Markabaan Xaalyaan irraa deemuun keenya hogguu murtaawe, Phaawulosii fi jarreen hidhaman tokkoos Yuliyoos abbaa dhibbaaleeysaa, murna waraana warra Roomaa “Awugusxaa” kan jedhamu keeysa kan turetti kannan.
[2] Markaba magaalaa Adraamiixosii dhufee, gara qubata markaba kutaa Asiyaa keeysaa dhaquuf qophaawe, seennee ti deemne; Arisxaarkos, namtichi biyya Maqedooniyaa kan Tasaloonqee irraa dhufe tokkoos nu wajjiin ture.
[3] Guyyaa borumtii magaalaa Sidoonitti galle; Yuliyoos ammoo Phaawulosiif garaa laafee ti, akka inni deemee fira isaa dubbisee, waan isa barbaachise isaan biraa arkatuuf isa gadi dhiise.
[4] Sidoonii kaanee, qilleensi fuulleen waan nutti bubbiseef jecha, Qophroos biyya bishaan keeysaa sanitti jalaa dahannee ti deemne.
[5] Fuullee kutaa biyya Qiliiqiyaa tii fi Phamfiliyaa dabarree, baharicha ceenee ti Miiraa magaalaa Liiqiiyaatti dhufne.
[6] Achitti abbaan dhibbaaleeysaa markaba Iskindiriiyaa dhufee, gara Ixaaliyaatti deemu tokko arkee ti isatti nu dabarse.
[7] Markabichaaniis guyyaa hedduu sirriqaa deemnee, rakkotti Kiniidoos bira geenye. Bubbeen karaa san deemuu nu dhoorkinaan, Qareexis biyya bishaan keeysaa saniin dahannee ti Salmoon bira baane.
[8] Qarqara bahar irraa odoo hin fagaatin, rakkina guddaa dhaan bakka “Qubata gaarii” jedhamu kan magaalaa Lase'aatti dhihoo jiru, tokkotti dhufne.
[9] Tana jiddutti wayta dheertuu tu nu jalaa bade; wayta san soomanni dabree cabbii fi bubbeen waan jabaataniif jecha, markabaan deemuun sodaachisee ti ture.
[10] Hogguus Phaawulos, “Yaa jarana, wayta tana markabaan itti furree deemuun keenya kun rakkinatti nu galcha; fe'ina meeshaa tii fi markabni baduu qofa odoo hin tahin, lubbuu teenyaa fuu akka nu sodaachisutti natti mullata” jedhee ti isaan dinniine.
[11] Haa tahu malee, abbaan dhibbaaleeysaa gorsa Phaawulos kanne irra, dubbii namticha markaba oofuu tii fi tan abbaan markabtichaa dubbatani fudhate.
[12] Bakki sun tan qubata manziila gannaa tiif hin taane turte. Kanaaf isaan keeysaa harki caalu bakka buufata markabaa sanii ka'anii, yoo dandayameef Finiiqeetti galanii, ganna achi bahuuf murtoo irra gayan. Finiiqeen ammoo, qubata markabaa Qareexis biyya bishaan keeysaa fuullee lixa-kibbaa tii fi lixa-kaabaa ti turte.
[13] Qilleensi laafaan kibbaa qilleensawuu jalqabnaan, akka namoonni barbaadan kan isaaniif tahe itti fakkaatee ti, markaba isaanii hiikanii, qarqara bahara Qareexis irra deeman.
[14] Hedduu odoo hin turin bubbeen jabduun, bubbeen baha-kaabaa jedhamtu Qareexis irraa gara baharitti bubbifte.
[15] Bubbeen markaba dhooytee fudhatee ti deemte; markabtichi niis bubbee dhaan morkuu waan dadhabeef jecha, ittuma gadi dhiifnee ti oofamne.
[16] Kaawudaa biyya bishaan keeysaa xiqqoo takkatti dahannee ti, rakkachaatuma, doonii markaba keenyatti hidhamtee harkifamaa turte san, bubbee harkaa baafachuu dha dandeenye.
[17] Doonii saniis ol harkisanii ti markaba irra kaayan; markabtichuma illee akka bubbeen gargar hin caphsineef, haadaani walitti hidhan. Gara bishaan gadi fageenya hin qabnetti, markabni hashawwaa dha nu duraa tuqa jedhanii waan sodaataniif jecha, gadhooggaa markabaa bishaan keeysatti gadi dhiisanii ti akkasumatti oofaman.
[18] Bubbeen hizaaba malee nutti jabaannaan, guyyaa borumtii dhaa fe'ina markaba keeysa jiru irraa baharitti gadi haran.
[19] Guyyaa sadaffaa tiis ammaas harkuma isaanii tiin meeshaa markabtichaa ti illee baharitti gadi haran.
[20] Aduu fi urjoota odoo hin arkin, guyyaa hedduu dha dabarsine; bubbeen jabduun sun nutti bubbifnaan, lubbumaan hafuu teenya illee abdii kunnee ti turre.
[21] Namoonni nyaata malee wayta dheeraaf turraan, Phaawulos ka'ee ti isaan jidduu dhaabbatee, “Yaa jarana, rakkinaa fi badii tana irraa hafuuf, odoo dubbii tiyya fudhattanii, Qareexisii ka'uu baattanii silaa badii tanaa fi kasaaraa tana irraa ni haftu turtan.
[22] Amma ammoo, markabuma caccaphu malee, isin keeysaa namni tokko illeen waan hin badneef jecha, jajjabaadhaan isiniin jedha.
[23] Rabbii kiyya kaniin ani kaadamu biraa, maleeykaan Gooytaa halkan edaa dhufee ti,
[24] ‘Yaa Phaawulos abshir, fuula Qeesaar duraas dhaabbachuu tu si irra jira; kunoo Rabbi, namoota siin wajjiin jiran hundinuu, du'a irraa akka eewalaman siif godhee ti jira’ anaan jedhe.
[25] Eegasuu yaa jarana jajjabaadhaa! Rabbi irratti waaniin amantaa qabuuf jecha, akkuma anatti himame kana tahuuf deema.
[26] Haa tahu malee, markabni keenya biyya bishaan keeysaa takkatti lafatti gadi diramuun isaa hin hafu” jedheeni.
[27] Gaafa guyyaa kudha afraffaa halkan, nuti bahar Adriiyaa keeysa asii fi achi oofamaa ti turre, gara halkan waaritti warri markaba oofan biyyatti waan dhihaatan seehan.
[28] Macarii ittiin gadi fageenya bahariin saffaran gadi buusanii ti, gadi fageenyi bishaantichaa dhuundhuma torbaatamii afur tahuu isaa beekan; hanga takka deemanii ti, ammaas macarii saffaraa san gadi buusanii ti, gadi fageenyi isaa dhuundhuma shantamii jaha tahuu isaa hubatan.
[29] Dhagaa siibatti dhawamna jedhanii waan sodaataniif jecha, gadhooggaa sibiilaa afur, kanneen ittiin markaba dhaaban, markabticha duubaan bahar keeysatti gadi daddarbanii ti, lafti akka bariitu hawwii dhaan ni eeggatu turan.
[30] Warri markaba oofan ammoo markabticha keeysaa bahanii dheeysuu dha barbaadan. Kanaaf gadhooggaa sibiilaa kan ittiin markaba dhaaban, huuruu markabtichaa duraan baharitti gadi darbuu waan barbaadan fakkeeysanii ti, doonicha markaba irraa baharitti gadi buusutti ka'an.
[31] Phaawulos ammoo, “Yoo jarri kun markaba keeysa turan malee, isin eewalamuu hin dandeeysan” jedhee ti abbaa dhibbaaleeysaa tii fi loltootatti hime.
[32] As irratti loltoonni haaddan doonichi ittiin hidhamee ture san ciranii ti, doonichi akka baharitti kufu godhan.
[33] Hanga lafti bariituu midhaan akka nyaataniif jecha, Phaawulos namoota san hundumaanuu, “Qismiin malee turuun keeysan, kunoo arra guyyaa kudha afraffaa dha, humaa tiis hin nyaanne.
[34] Lubbuun jiraachumaa fuu nyaachuun isin barbaachisa; eegasuu akka waa nyaattaniin isin gorsa; isin keeysaa rifeensi mataa keeysanii tokko illeenuu hin badu” jedheeni.
[35] Phaawulos hangana eega dubbate booddee, biddeena fuudhee ti fuula isaanii duratti Rabbiif galata galche; biddeena saniis kutatee ti nyaachuu jalqabe.
[36] Hogguus hundi isaanii hamilanii ti, ifumaa fuu qismii nyaatan.
[37] Nuti namoonni markabticha keeysa jirru, walumatti dhibba lamaa fi torbaatamii jaha turre.
[38] Isaan eega nyaatanii quufan booddee, markabticha irraa haa sablatu jedhanii ti, qamadii fe'amtee turte baharitti irraa gadi haran.
[39] Hogguu barihe, warri markaba oofan biyyiti sun eeysa akka taate beekuu hin dandeenye; ammoo wirtuu bahar, tan hashawwaa qabdu takka arkan; silaa isaaniif dandayamee, markabticha itti meeysuu dha barbaadan.
[40] Haada gadhooggaa sibiilaa afranuu ciranii ti gadhooggoota bahar keeysatti dhiisan. Hogguusuma haada mazawwirii markabaa tiin qaceelchaniis ni hiikan; sharaa qilleensaa tiis ol fannisanii ti markabticha gara wirtuu baharitti meeysan.
[41] Markabtichi ammoo hashawwaa bishaan jala jirtutti lixee ti qabame; funyaaniin waan cirrachatti lixeef jecha, sossoohuu dadhabe; duubni isaa ammoo humna bishaan wal dhawuun caccaphe.
[42] Warra hidhaman keeysaa tokko illeen daakee akka hin baaneef, warri loltuu dhaa hunduma isaanii ajjeesuu dha yaadan.
[43] Abbaan dhibbaaleeysaa ammoo Phaawulos eewaluu barbaadee ti, warri loltuu waan yaadan akka hin raawwanneef isaan dhoorke. Warri bishaan daakuu beekan duraan dursanii markaba irraa baharitti gad utaalanii lafatti akka bahan ajaje.
[44] Warri hafan ammoo, muka babaxxee dhaan yookiin caccaphaa markabaa tiin haa deeman jedhee ti ajaje. Hundinuu haala kanatti fayyaa nagayaan lafatti bahan.