[1] Waldaya kiristaanaa Anxookiyaa keeysa nabiyyoonninii fi barsiisoonni ni jiru turan; isaaniis Baarnaabaas, Simi'oon “Gurraacha” kan jedhamu, Luukiyos nama biyya Qareenaa, Maanaa'en kan akka hiriyaatti Herodis abbaa biyyaa wajjiin guddatee fi Saa'oliis turan.
[2] Isaan kanneen Gooftaa kaadamaa, soomanna irra odoo jiranii, Ruuhal Qudus, “Baarnaabaasii fi Saa'ol hojiin ani itti isaan yaameef, addatti anaaf baasaa!” jedheeni.
[3] Eegas ammaas dabalanii soomananii eega kadhatan booddee, harka isaanii mataa jara lamaanii irra kakkaayanii ti hojichaaf isaan ergan.
[4] Baarnaabaasii fi Saa'ol Ruuhal Qudusiin ergamanii, magaalaa Seluuqiyaatti gadi bu'an; achi irraa markabaan gara Qophroos, biyya bishaan keeysaa ti dhaqan.
[5] Magaalaa Salaamiis hogguu gayan, manneen sagadaa warra Yihudootaatti Qoowlii Rabbii ni lallaban; Yohannis inni Maarqos jedhamuus isaan gargaara turan.
[6] Biyya bahar keeysaa san, keeysa deemanii hunda waliin gayanii ti hanga magaalaa Phaafoositti gahan. Achitti namticha xibbii namatti godhu tokko arkan, maqaan isaa Baaryesuus jedhama; inni Yihudii dha ture, kijibaan ani nabiyyii dha nama ifiin jedhu ture.
[7] Namtichi xibbii namatti godhu sun namticha biyya bishaan keeysaa bulchu sanii wajjiin ture; maqaan namtichaa Sergiiyos Phaawulos jedhama, inni nama hubataa dha ture. Bulchaan sun Qoowlii Rabbii isaan irraa dhagayuuf jecha Baarnaabaasii fi Saa'ol ifitti yaame.
[8] Namtichi xibbii namatti godhu kan afaan Giriigitti “Eliimaas” jedhamu ammoo, bulchaa biyyaa san amantii irraa habaabsuuf isaaniin morke.
[9] Hogguus Saa'ol kan “Phaawulos” jedhame, Ruuhal Qudusiin guutamee, ija namticha xibbii namatti godhuu san keeysa laalee,
[10] “Ati yaa ilma Sheeyxaanaa, diina waan qaceelaa hundumaa, ati shaaxirummaa fi hammeenya hundumaan guutamtee ti jirta; ati wayta hundumaa dhugaa Gooftichaa sobatti micciiruu tana hin dhiiftuu?
[11] Ammaas harki Gooftichaa si dhawa, jaamaas taatee, hanga takkaaf ifa guyyaa hin agartu” isaan jennaan, hogguusuma hurreen ija isaatti maramte, dukkana ija isaatti uwwifte, nama harka qabee isa qaceelchu barbaadutti ka'e.
[12] Bulchaan biyyaa sun waan tahe kana hogguu arke hedduu ajaa'ibee ti, barsiisa Gooftatti amane.
[13] Eegas booda Phaawulosii fi warri isaa wajjiin deeman, magaalaa Phaafoos irraa markabaan ka'anii, kutaa Phamfiliyaa keeysaa gara magaalaa Phergee ti deeman; Yohannis inni Maarqos jedhamu sun ammoo achumatti isaan dhiisee ti Yerusaaleemitti jalaa deebi'e.
[14] Warri kaan ammoo hogguusuma dabranii, Phergee irraa itti fufanii kutaa Phisiidiyaa keeysaa magaalaa Anxookiyaa gayan; guyyaa Sanbataa mana sagadaa seenanii ti taa'an.
[15] Kitaaba seeraa tii fi kitaaba nabiyyootaa keeysaa eega dubbifame booddee, warri geggeeysituun mana sagadaa sanii isaanitti erganii ti, “Obboleeyyan, qoowlii gorsaa tan namootatti himtan yoo qabaattan dubbadhaa!” isaaniin jedhan.
[16] Hogguus Phaawulos ka'ee, harkaan ifitti isaan hawwatee, “Isin yaa warra Israa'el, isiniis saba adda addaa keeysaa kanneen dhuftan warri Rabbi sodaattan hundi keeysanuu na dhaggeeyfadhaa!” jedhee ti lallabutti ka'e.
[17] “Rabbiin ummata Israa'el kanaa, abboowwan keenya filate, wayta isaan Misratti galtee tahanii turaniis, ummata guddaa dha isaan godhe; booddees irree jabduu dhaan achii isaan baase.
[18] Bara afurtama huffee gammoojjii keeysatti obsaan isaan dandaye.
[19] Biyya Kana'aan keeysaa saboota torba balleeysisee ti, lafa isaanii dhaala godhee ummata isaa kanaaf hire. Kun hundinuu toora bara dhibba afurii fi shantamaa ti fudhate.
[20] Kana booddee ammaas hanga bara nabi Saamu'elitti daanyoota biyyaa ti isaaniif kanne.
[21] Eegas hogguu isaan mootii nuuf kanni jedhanii gaafataniis, Rabbi gosa Beniyaam keeysaa hi Saa'ol nama jedhamu ilma Qiish isaaniif kanne; inni niis bara afurtama moohe.
[22] Eega Saa'ol mootummaa irraa buuse booddee, Rabbi, Daawwidi mootii godhee ti isaaniif kaase. Waa'ee isaa laalchisuun, ‘Ani, Daawwid ilma Issey nama akka garaa kiyyaa arkadhee tiin jira, inni nama fedha kiyya hundumaa raawwatu’ jedhee ti ragaa baheef.
[23] Akkuma abdachiisee turetti, shanyii namticha kanaa keeysaa hi Rabbi, ummata Israa'eliif naja-baasoo kan tahe, Yesuusi fide.
[24] Dhufa Yesuus dura Yohannis, toowbatanii akka cuuphamaniif ummata Israa'el hundumatti lallabee ti ture.
[25] Yohannis wayta hojii isaa fixuu jala gahe, ummata saniin, ‘Eenyu na seetu? Ani isa isin eeggachaa jirtanii miti; inni ammoo na booddeen dhufa; ani nama haada kophee isaa illee hiikuuf gahuu miti’ jedheeni.
[26] “Yaa obboleeyyan koo, ilmaan shanyii Abrahaam, isiniis warri qomoo biraa, warri Rabbi sodaattan kanneen as jirtan, qoowliin najaataa tun nuuf ergamtee ti jirti.
[27] Warri Yerusaaleem keeysa jiraatanii fi warri isaan hooggananiis akka inni naja-baasoo tahe hin beeyne, qoowlii nabiyyootaa tan Sanbatuma jiru hundatti dubbifamtuus hin hubanne; tahu illee Yesuusitti firdii godhuu isaanii tiin waan nabiyyoonni dubbatan raawwatanii ti jiru.
[28] Sababa du'a isatti farachiisu hin arkanne; ammoo tana oduma beekanii ti, akka inni ajjeefamuuf Philaaxos gaafatan.
[29] Waa'ee isaa tiif waan barreeyfame hundumaa eega raawwatan booddee, muka fannoo irraa isa gadi buusanii ti, qabrii keeysa kaayan.
[30] Rabbi ammoo warra du'an keeysaa isa ni kaase.
[31] Inni niis guyyaa hedduu warra isaa wajjiin Galiilaadhaa gara Yerusaaleem dhufanitti mullachaa ti ture; isaaniis kanneenuma amma ummataaf raga-baatuu isaa tahanii dha.
[32] Ammaas Rabbi waan abbootii teenya abdachiise akka raawwate Oduu Gammachuu dhaa isinitti himna.
[33] Rabbi, Yesuus du'aa kaasuu isaa tiin, nu warra asar isaanii taaneefiis, kunoo abdii abbootii teenya abdachiise nuuf raawwatee ti jira. Faarfannaa lammeeysaa keeysatti, ‘Ati Ilma kiyya, ani arraan si dhale’ kan jedhu barreeyfamee ti jira.
[34] Waa'ee mirkanummaa du'aa isa kaasuu isaa, ammaas gonkumaa tortorutti akka inni hin deebine godhuu isaa tiin, ‘Ni'imaa qulqulluu fi mirkanaawaa, kaniin ani Daawwid abdachiise san, isiniif niin kanna’ jedha.
[35] Akkanumatti ammaas bakka biraatti ammoo, ‘Ati isa qulqullicha kee tortorutti dabarsitee hin kannitu’ jedha.
[36] “Daawwid bara dhaloota isaa keeysatti akka Rabbi isa irraa fedhetti kaadamee ti aakiramee, abbootii isaa biratti awwaalame; ni tortoreesi.
[37] Inni Rabbi du'aa keeysaa isa kaase san ammoo, tortorutti hin kannamne.
[38] Kana waan taheef jecha yaa obboleeyyan koo, oomfiin dilii dhaa, Yesuus keeysaan isinitti lallabamuun isiniif haa galtuu.
[39] Ammaas waan namni seera Musee tiin, irraa eewalamuu hin dandeenye hundumaa jalaa, namni isatti amanu hundinuu najaa dha baha.
[40] Eegasuu, yaa obboleeyyan koo, wanni nabiyyoonni dubbatan isin irra akka hin geenye if eeggadhaa!
[41] ‘Kunoo, isin yaa warra hanjamu, baaseeyfadhaa, badaasi! Waaniin ani bara jireenya keeysanii keeysatti hojjachaa jiru tan yoo namni isinitti hime illee isin gonkumaa hin amanne’ jedha” jedhe.
[42] Hogguu Phaawulosii fi Baarnaabaas deemuuf mana sagadaa keeysaa gadi bahan, Sanbata itti aanuus deebi'anii, barsiisa kana ammaas irra deebi'anii akka isaan barsiisaniif ummanni isaan gaafatan.
[43] Eega walgahiin mana sagadaa gargar kaatee booddee, Yihudoonni hedduunii fi warri barsiisa Yihudummaa fudhataniis, Phaawulosii fi Baarnaabaas duukaa dha deeman. Phaawulosii fi Baarnaabaasiis, ni'imaa Rabbi isaaniif kannetti jiraachuu akka itti fufan, jabeeysanii ti isaanitti himan.
[44] Sanbata itti aanuttiis ummanni magaalaa san keeysa jiraatu, waa xiqqo warra hafe malee hundumaa tu, Qoowlii Rabbii dhaggeeyfachuuf jecha walitti qabaman.
[45] Yihudoonni ammoo danuu namaa hogguu arkan, hinaaffaan guutamanii arrabsaa ti, waan Phaawulos dubbateen mormutti ka'an.
[46] Phaawulosii fi Baarnaabaas ija-jabinaan, “Qoowliin Rabbii dura isin ummata Israa'elitti himamuun ni barbaachisa ture. Eega isin fudhachuu diddanii, jireenya bara baraatti galuufiis, nuti warra hin malle ifiin jettan, kunoo nuti amma gara saba qomoo Israa'el hin tahinitti deebi'uu keenya.
[47] Gooftaan, ‘Kunoo ani saba saba Israa'el hin tahiniif ibsaa taatanii addunyaa hundumaafiis najaata akka geeysitaniifiin isin ramade’ jedhee nu ajajee ti jira” jedhan.
[48] Saboonni qomoo Israa'el hin tahiniis dubbii tana hogguu dhagayan ni gammadan; qoowlii Rabbii tiis ni faarsan; warri Mootummaa Rabbitti galuuf herregaman hundinuu ni amanan.
[49] Naannawa san hundumattuu Qoowliin Gooytaa dhaa ni baballatte.
[50] Warri Yihudootaa ammoo Giriigota keeysaa dubartoota beekamoo warra amantii Yihudootaa fudhatanii fi hooggantoota magaalaa sanii tuttuqanii ti isaan irratti kakaasan. Akkasitti Phaawulosii fi Baarnaabaas irratti reebamuu kaasanii, naannoo san keeysaa isaan baasan.
[51] Isaan ammoo gocha isaanii kanaan mormuuf, dhukkee miila isaanitti qabatte if irraa dhadhawanii ti, gara magaalaa Iqooniyuumitti yaa'an.
[52] Barattoonni magaalaa Anxookiyaa dhaa, gammachuu fi Ruuhal Qudusiin guutamanii ti turan.