[1] “Yaa obboleeyyan koo, abboowwaniis, falmataan ani isin duratti dhiheeyfadhu kana anaaf dhaggeeyfadhaa!” jedheeni.
[2] Afaan Yihudaa tiin isaanitti dubbachuu isaa hogguu dhagayan, caalatti callisan. Phaawulos itti furee,
[3] “Ani Yihudii dha; Qiliiqiyaa keeysaa Xarseesittiin dhaladhe, asitti Yerusaaleemittiin guddadhe. Gamaali'el birattiis seera abbootii teenyaaf kanname hunda qaceellotti baradhee tiin jira; akkuma keeysan kan arraa kanatti, aniis Rabbiif niin hinaafaan ture.
[4] Warra karaa barsiisa haaraya kana duukaa deemaniis hanga du'aatti niin reebaan ture, dhiiraa fi dhalaas qabee tiin mana hidhaatti niin galchisiisan ture.
[5] Angafni lubootaa, yaa'iin manguddootaa tiis guutumatti waa'ee kanaaf ragaa anaaf ni bahu. Isaanuma biraa xalayaa gara Yihudoota obboleeyyan Damaasqoo jiraatanitti barreeyfame baafadhee, ammaas jarreen kana qabee, hidhaan hidhee akka adabamaniif gara Yerusaaleem fiduuf jecha, Damaasqootti deemaa tiin ture.
[6] “Karaa deemaa hogguun Damaasqootti dhihaadhe, wayta waaretti dingatuma ifni humna-qabeeysi samii irraa naannoo tiyyatti walaqqise.
[7] Kufee lafa dhooynaaniis sagalee, ‘Saa'ol, Saa'ol, maaliif na ariita?’ jettuun dhagayee,
[8] ‘Eenyu ati yaa Gooftaa?’ jedhee tiin deebise. Inni ammoo, ‘Ani, Yesuus nama Naazireeti, namtichuma ati ariihaa jirtuu dha’ anaan jedhe.
[9] Namoonni anaa wajjiin turan ificha arkanii ti jiru; sagalee anatti dubbachaa turte ammoo hin dhageenye.
[10] Ani ammoo, ‘Yaa Gooftaa maal godhuun qaba?’ jedhee tiin gaafadhe; Gooftaan ammoo, ‘Ka'ii, magaalaa Damaasqoo dhaqi, achitti wanni Rabbi akka gootuuf siif herrege hundumaa sitti himama’ anaan jedhe.
[11] Walaqqisa ifichaa irraa kan ka'e, ijji tiyya arkuu dadhabnaan, warri anaan wajjiin jiran harka na qabanii ti magaalaa Damaasqootti na galchan.
[12] Namticha Ananiyaas jedhamu, kan seera sirritti eegu, Yihudoota achi jiran hundumaa birattiis maqaa gaarii kan qabu tokkoo tu achi ture.
[13] Inni kun gara kiyya dhufee ti, na cinaa dhaabbatee, ‘Obboleeysa koo Saa'ol, agartuun tee siif haa deebitu!’ anaan jedhe; hogguusuma agartuun tiyya anaaf deebitee, isaas arkuu dandaye.
[14] Ananiyaas hogguus, ‘Rabbi Gooytaan abbootii teenyaa, waan godhuun si irra jiru fedhii isaa akka beeytuuf, qaceelaa tokkicha isaa tiis agartee, sagalee isaa tiis akka dhageeysuuf jecha, si filatee ti jira.
[15] Waan agartee fi waan dhageeyse hundumaa namoota hundumatti ni himta, isaafiis raga-baatuu dha taata.
[16] Amma maaliif dhibooyta ree? Ka'ii tii, maqaa Gooftaa yaammadhuu cuuphami! Dilii tee tiis if irraa dhiqi!’ anaan jedhe.
[17] “Yerusaaleemitti eegaan deebi'e booda, Beeytal Maqdas keeysatti kadhata irra odoon jiruu, kunoo, mullataan arke.
[18] Mullata keeysatti Gooftaan, ‘Warri magaalaa kanaa ragaa ati anaaf baatu waan hin fudhanneef jecha, dafii tii Yerusaaleem keeysaa bahi!’ odoo inni anaan jedhuu tiin dhagaye.
[19] Ani ammoo, ‘Yaa Gooftaa, akkaan ani mana sagadaa hunduma keeysatti, warra sitti amanan hiisisaa, tumsiisaa tiis ture isaanuu ni beeku.
[20] Hogguu dhiiyni Isxifaanos, namticha raga-baatuu kee tii dhangalaafamees, ajjeefamuu isaatti walii galee, achi dhaabbadhee uffata warra isa ajjeesee san niin eegaan ture’ jedhee tiin itti dubbadhe.
[21] Gooftaan hogguus, ‘Deemi, ani biyya fagotti, gara saba qomoo Israa'el hin tahinittiin si erga’ anaan jedhe” jedhee ti isaanitti hime.
[22] Ummanni hanga inni jecha kana irra gahutti, Phaawulos dhaggeeyfachaa ti turan; kana booddee ammoo sagalee isaanii ol fuudhanii ti, “Namni akkanaa kun lafa irraa balleeyfamuu tu irra jira, inni jiraachuun hin malu” jedhan.
[23] Isaan wayta san goohaa, huccuu isaanii if irraa darbaa, dhukkees samitti ol kaasaa ti turan.
[24] Abbaan kumaaleeysaa, Phaawulos lafa qubata loltutti geeysanii, Yihudoonni maaliif jecha akka isatti goohan keeysaa baasuuf, roobii dhaan garafanii akka isa xiinxalan ajaje.
[25] Hogguu isa garafuuf teephaan hidhan, Phaawulos abbaa dhibbaaleeysaa kan achi dhaabbatu tokkoon, “Nama dhaloota Roomaa tokko, kan yakki itti hin faradamin garafuun keeysan seeraa?” jedheeni.
[26] Abbaan dhibbaaleeysaa sun dubbii tana hogguu dhagaye, gara abbaa kumaaleeysaa dhaqee ti, “Maal godhuuf deemta? Namtichi kun nama dhaloota Roomaa ti!” isaan jedhe.
[27] Abbaan kumaaleeysaa sun gara Phaawulos dhaqee ti, “Mee anatti himi, ati dhugumaan nama dhaloota Roomaa tii?” isaan jennaan, Phaawulos ammoo deebisee, “Eeyye, ani nama dhaloota Roomaa ti” jedheeni.
[28] Abbaan kumaaleeysaa sun ammaas dabalee, “Nama dhaloota Roomaatti lakkaawamuuf ani horii guddaa dhaan itti baase” jennaan, Phaawulos ammaas, “Ani gaa ammoo ittiin dhaladhe” jedheeni.
[29] Hogguus warri isa xiinxaluuf deeman sun hogguusuma irraa if duuba deebi'an; abbaan kumaaleeysaa saniis, Phaawulos nama dhaloota Roomaa tahuu isaa hubannaan, waan isa hiisiseef jecha ni sodaate.
[30] Guyyaa borumtii dhaa abbaan kumaaleeysaa, Yihudoonni maaliif jecha Phaawulos akka kasasan, dhugaa dubbii dhaa baruu dha barbaade; kanaaf luboonni warri angafoonninii fi miseensonni yaa'ii biyyaa hundinuu akka walitti qabamaniif ajaje. Phaawulosiis hiiksisee ti, geeysee isaan dura dhaabbachiise.