[1] Fesxoos, gara naannoo biyya ifii bulchuu dhufee ti, guyyaa sadih booddee magaalaa Qiisaariyaa tii ka'ee Yerusaaleemitti ol bahe.
[2] Luboonni warri angafoonninii fi hooggantoonni Yihudootaa itti dhihaatanii ti kissii Phaawulos irratti dhiheeysan.
[3] “Karaa irratti riphisanii isa ajjeesuuf qophaawanii ti, Phaawulos Yerusaaleemitti nuuf ergi!” jedhanii ti afaanuma nagayaa tiin isa kadhatan.
[4] Fesxoos ammoo, “Phaawulos Qiisaariyaatti hidhamee eegamaa ti jira; anuu dafee tiin achi dhaquuf deema.
[5] Ammaas isin keeysaa warri angoo qaban anaa wajjiin gadi bu'anii, namticha kana irratti badii takka illeen yoo arkamte, isa haa kasasanii!” jedheeni.
[6] Fesxoos guyyaa saddeet moo kudhan waan hin caalle isaan bira bubbulee ti, tana booddee Qiisaariyaatti gadi bu'e; borumtiis barcuma firdii irra taa'ee ti, Phaawulos akka dhiheeysan ajaje.
[7] Wayta Phaawulos dhufe, ammaas Yihudoonni Yerusaaleem irraa gadi dhufan isatti marsanii ti, kissii ciccimtuu hedduu, kanneen ragaan isa irratti mirkaneeysuu hin dandeenye irratti dhiheeysan.
[8] Phaawulos ammoo, “Ani seera Yihudootaa irratti taatee Beeytal Maqdas irrattiis, ammaas Qeesaar irrattiis taanaan badiin godhe takka illee hin qabu” jedhee ti falmate.
[9] Fesxoos hogguus, waan Yihudoota gammachiisu godhuu barbaadee ti, “Yerusaaleemitti ol baatee, achitti dubbii tanaaf firdii akkaan ani siif kannu ni feetaa?” jedhee ti Phaawulos gaafate.
[10] Phaawulos ammoo, “Ammuma illee taanaan ani barcuma firdii Qeesaar dura dhaabbadhee tiin jira; tuniis bakkaan firdii itti arkachuu qabuu dha. Ani Yihudoota irratti yakka hojjachuu dhabuu kiyya, ati mataan kee tuu gaarii gootee ti beeyta.
[11] Ani yakkee odoon waan du'a anatti farachiisu hojjadhee jira tahe, adaba du'aa jalaa bahuuf hin yaaluun ture; amma ammoo dubbii isaan ittiin na kasasan keeysa dhugaan eega hin jirre, abbaan fedhee huu, harka isaanitti dabarsee na kannuu hin dandayu; ani kunoo Qeesaarittiin iyyadha” jedhee ti deebiseef.
[12] Fesxoosiis warra isa gorsaniin mataa bahee marihatee ti, “Qeesaaritti waan iyyatteef jecha, gara Qeesaar deemta” jedhee ti itti deebiseefi.
[13] Guyyaa muraasa booda, Agriiphaan mootichinii fi Barniqqeen, Fesxoosiin, “Baga nagayaan dhufte!” jedhanii simachuuf jecha Qiisaariyaa dhaa dhufan.
[14] Isaan guyyaa hedduu eega achi turan booddee, Fesxoos waa'ee dubbii Phaawulos Agriiphaa mootichaafi ibsa kanne, “Namticha Feeliks mana hidhatti dhiisee deeme tokkoo tu as jira.
[15] Ani waytaan Yerusaaleem ture, luboonni warri angafoonninii fi manguddoonni Yihudootaa isa kasasanii, akkaan isatti firdii godhuuf ana gaafatanii ti turan.
[16] Ani ammoo, ‘Namticha tokko, warra isa kasasaniin wajji wal cinaa dhaabanii, kissii irratti dhihaatteef odoo hin falmachiisin, dabarsanii isa kannuun aadaa Roomaa tii miti’ jedhee tiin isaaniif deebisee ture.
[17] Wayta isaan wajjiin asitti dhihaataniis, ani dubbii tana hin dhibeeysine; borumtii isaa barcuma firdii irra taa'ee tiin, namticha akka dhiheeysan ajaje.
[18] Warri isa kasasan hogguu dubbachuuf ka'an, yakkoota hamaamoo kanneeniin ani irraa shakkee ture tokko illee isa irratti hin dhiheeysine.
[19] Wanni isaan irratti wal dhaban waa'ee gaaffii amantii isaanii tii fi waa'ee namticha Yesuus jedhamu nama du'ee tokkoo ti ture; Phaawulos ammoo inni jiraataa dha jedhee ti dhiheeysa.
[20] Dubbii tana akkaataan itti xiinxalu dhabnaan, Phaawulos Yerusaaleem dhaqee, achitti dubbii tanaaf firdii arkachuu yoo fedha qabaateen gaafadhe.
[21] Phaawulos ammoo, ‘Ani hidhuma keeysatti eegamaa turee, firdii arkachuuf gara Qaasaarittiin iyyadha’ waan jedheef jecha, hangaan ani kabajamaa Qeesaar biratti isa erguu akka eegamuun ajaje” jedheeni.
[22] Agriiphaan hogguus Fesxoosiin, “Ani ifumaa fuu namticha kana dhaggeeyfachuu niin fedha” jedheeni; Fesxoos ammoo deebisee, “Boruma tanaa huu isa dhageeysa” jedheeni.
[23] Guyyaa borumtii dhaa, Agriiphaa fi Barniqqeen kabajaa guddaa dhaan dhufanii, abbootii kumaaleeysaa tii fi warra gurguddaa magaalaa wajjiin galma walgahii ti seenan; Fesxoos ajajnaaniis Phaawulos ni dhiheeysan.
[24] Fesxoos hogguus, “Yaa Agriiphaa mootii, warra as nuu wajjiin jiraattan hundi keeysan, namtichuma isin agartan kana jiraachuu hin qabu jedhanii, hawaasni Yihudootaa hundinuu Yerusaaleemii fi asittiis anatti iyyatanii ti jiru.
[25] Ani ammoo waan firdii du'aa isatti farachiisu tokko illee akka inni hin hojjatin hubadhee tiin jira; amma ammoo inni, ‘Kabajamaa Qeesaarittiin iyyadha’ waan jedheef jecha, Qeesaaritti isa erguuf murtoo godhee tiin jira.
[26] Haa tahu malee, waa'ee namticha kanaa gooftaa kiyyaaf barreeysuuf waan qabatamaa tahe waaniin dhabeef jecha, as fuula keeysan, keeysumaa huu yaa Agriiphaa mootii, fuula kee dura isa fidee tiin jira; kanaas eega isa xiinxalle booddee barreeysuuf waan qabatamaa tahe arkachuuf jechaan godhe.
[27] Akkanumatti nama hidhamaa tokko waan isa irratti dhihaate odoo ibsanii hin mullisin, Qeesaaritti dabarsuun sirrii tahee anatti hin mullatu” jedhe.