[1] Gaaf tokko Phexiroosii fi Yohannis wayta kadhata waaree booddee dhaa, sa'aatii sadeeysaatti, gara Beeytal Maqdasitti ol deemaa ti turan.
[2] Kunoo, namtichi dhaloota isaa tii jalqabee naaffate tokko, achi ture; inni niis guyyuu baadhatanii fidanii, “Karra miidhagduu” jedhamtu dura kaayamee, warra Beeytal Maqdas seenan irraa dhoortoo dha kadhata ture.
[3] Namtichi kun, Phexiroosii fi Yohannis, kanneen Beeytal Maqdas seenuuf dhufan agarraan, dhoortoo isaan kadhate.
[4] Phexiroosii fi Yohannis ija isatti dhaabanii ti, hogguus Phexiroos, “Ol nu ilaali!” jedheeni.
[5] Hogguus namtichi, kan waa isaan irraa arkatu seehee ti, xiyyeeyfatee ti isaan laale.
[6] Phexiroos ammoo, “Ani meetaa fi ziqeeya hin qabu, waaniin qabu ammoo siifiin kanna; maqaa Yesuus Kiristoos nama Naazireetiin ka'ii, deemi!” jedheeni.
[7] Harka mirgaa isa qabee ti ol isa kaase, hogguusuma miilli isaa tii fi koomeen isaa tiis jajjabaataniif.
[8] Utaalee, ka'ee ti dhaabbatee, deddeeme, isaan wajjiiniis Beeytal Maqdasi seene, miilaan deddeemaa, ol utaalaa tiis Rabbi galateeyfate.
[9] Ummanni hundinuu, isa kan deddeemaa Rabbi galateeyfachutti jiru arkan.
[10] Beeytal Maqdas, karra miidhagduu dura taa'ee, kan dhoortoo kadhataa ture tahuu isaa hubatanii, waan isaaf godhame kanaafiis ajaa'ibanii hedduu dha baaseeyfatan.
[11] Hogguu namtichi Phexiroosii fi Yohannisitti maxxanee jalaa hafuu dide, ummanni hundinuu ajaa'ibaa ti wajjiin orihaa, hulluuqoo Beeytal Maqdas tan “Hulluuqoo Solomoon” jedhamtutti isaanitti dhufan.
[12] Phexiroos hogguu tana arke ummataan, “Yaa warra Israa'el, maaliif tana ajaa'ibdan? Akka waan nuti humna teenyaan yookiin qulqullummaa teenyaan isa deemsifnetti, maaliif ajaa'ibdanii nu millattu?
[13] Yesuus, kanuma isin dabarsitanii kannitanii Philaaxos durattiis, hogguu inni silaa isa gadi dhiisuuf murtoo irra gahe kaaddan sani; Rabbiin Abrahaam, kan Yisihaaq, kan Yaaqoobiis, Rabbiin abbootii teenyaa ammoo, kaadamticha isaa tiif, durrii ulfinaa ti ol irraa godheef.
[14] “Isin ammoo, tokkicha qulqulluu fi qaceelaa ture Yesuus kaaddanii ti; nama nama ajjeese akka isiniif hiikuufi Philaaxos gaafattan.
[15] Isa burqaa jireenyaa tahe, isin ni ajjeeftan, isa ammoo Rabbi du'aa keeysaa kaase, kanaafiis nuti raga-baatuu dha taane.
[16] Ammaas maqaan isaa, maqaa isaatitti amanuu tu, namticha isin agartanii beeytan kana, jajjabeeysuu dandaye. Ammaas amantii Yesuus keeysaan dhuftuu tu, aafihaa guutuu tana, hunduma keeysan duratti isaaf kanne.
[17] “Ammaas yaa obboleeyyan kiyya, isinii fi hooggantoonni keeysaniis waan gootan hundumaa, odoo hin hubatin wallaalaan akka gootan, anuu niin beeka.
[18] Rabbi ammoo, duraan dursee, Masiihiin isaa hiraaramuun akka isa irra jiru, waan afaan nabiyyootaa hundumaan himsiisee ture sani, akka kanatti akka raawwatamu godhe.
[19] Eegasuu toowbadhaa, diliin teeysaniis akka isin irraa haqamtuuf, gara Rabbitti deebi'aa. Wayti haarayoomfamuutiis Goofticha biraa akka dhuftuuf.
[20] Ammaas Masiihicha duraan dursee isiniif herregamees, akka isinii erguuf, inni niis Yesuusi.
[21] Duruma irraa jalqabee Rabbi, afaan qulqulloota nabiyyoota isaa tiin dubbachaa waan ture raawwate, hundumaa hanga bakkatti deebisutti ammoo, Yesuus samii irra turuu tu isa irra jira.
[22] Museen illeen, ‘Nabiyyii akka kiyyaa tokko, Rabbi Gooytaan keeysan obboleeyyan keeysan keeysaa isiniif ni kaasa, waan inni isinitti himu hundumaa dhaggeeyfachuu tu isin irra jira.
[23] Namni nabiyyicha san hin dhaggeeyfanne hundinuu ammoo, ummata keeysaa ni balleeyfama’ jedhee ti ture.
[24] Nabiyyoonni Saamu'elii jalqabanii isa boodaas ka'anii fi dubbatan hundinuu, waa'ee bara kanaa labsanii ti jiru.
[25] Isin warra nabiyyoota dhaalu, irbuu Rabbi abbootii teeysaniif dhaabe keeysaa hiis warra hirmaattu; inni Abrahaamiin, ‘Asara kee tiin, sabni addunyaa irraa hundinuu eeybifama’ jedhee ti ture.
[26] Kanaaf Rabbi karaa keeysan hamaa irraa, hunduma keeysanuu deebisuu dhaan isin eeybisuuf jecha, kaadamaa isaa kaasee, duraan dursee isinitti erge” jedheeni.