[1] Apholos Qorontoosuma odoo jiruu, Phaawulos biyya gararraan keeysa dabree ti, ammaas Efesoon dhufe. Achittiis barattoota muraasa tokko arke.
[2] “Wayta amantan, Ruuhal Qudus fudhattanii ti jirtuu?” isaaniin jedhe. Isaan ammoo, “Lakkii, nuti Ruuhal Qudus jiraachuu isaa tuu gonkumaa hin dhageenye” jedhanii ti deebisaniif.
[3] As irratti Phaawulos, “Eegasuu isin maalitti cuuphamtan?” jedheeni; isaaniis deebisanii, “Cuuphaa Yohannisitti cuuphamne” jedhaniin.
[4] Phaawulos hogguus, “Yohannis namticha isa booddee dhufa jiru, jechuun Yesuusitti akka amanan ummatatti himaa ti, cuuphaa toowbaa dhaa cuuphe” jedheeni.
[5] Jarri tana dhagayuu irratti, maqaa Gooftaa Yesuusitti cuuphaman.
[6] Hogguu Phaawulos harka isaa isaan irra kaayees, Ruuhal Qudus isaan irratti bu'e; isaan luqaa adda addaa tiin haasawan, raajiis ni dubbatan.
[7] Isaan walumaa galatti hanga nama kudha lamaa ti turan.
[8] Phaawulos hanga ji'a sadihii takka, mana sagadaa Yihudootaatti deddeebi'ee ti, ija-jabinaan barsiise; wayta saniis ibsaa akkaataa isaan fudhachiisutti waa'ee Mootummaa Rabbii hubachiisaa ti ture.
[9] Isaan keeysaa muraasni tokko mata-jabeeyyii ammaas amanti didduu tahanii, jammaata durattiis waa'ee karichaa irratti hammeenya waan dubbataniif jecha, Phaawulos barattoota ifiin wajji fuudhee, isaan keeysaa achi bahee ti, guyyuu galma Xiraanos keeysatti amantootaa wajjiin falamaa dudubbachaa ti ture.
[10] Akkaataa kanatti bara lamaaf itti fure, akkasitti namoonni kutaa biyya Asiyaa keeysa jiraatan hundinuu, Yihudoonninii fi Giriigonni niis Qoowlii Gooytaa ni dhagayan.
[11] Rabbi mu'ujizaa gurguddoo Phaawulos keeysaan ni raawwata ture.
[12] Akkana waan taheef jecha, mandiila yookiin marxoo qaama isaa tuuyxe illee, dhukkubsattootatti hogguu geeyfaman, dhukkubni isaanii isaan gadi ni dhiisu turan, ammaas ruuhaanonni hamooniis isaa keeysaa ni bahu turan.
[13] Yihudoonni warri olii-gadi yaa'anii ruuhaanota hamoo baasaa turan tokko namoota ruuhaanota hamoon qabaman irratti maqaa Gooftaa Yesuus yaamuu dha yaalan, ruuhaanota saniiniis, “Maqaa Yesuus kan Phaawulos lallabuun” jechaa ti hadaran.
[14] Ilmaan torban Iskoyaas, angafa luboota Yihudootaa, tana godhaa ti turan.
[15] Ruuhaan hamaan ammoo deebisee ti, “Yesuus niin beeka, waa'ee Phaawulosiis beekee tiin jira; isin ammoo eenyu?” jedhee ti gaafate.
[16] Namtichi ruuhaan hamaan keeysa ture sun isaanitti utaalee, humnaaniis isaan irra jabaatee ti moohate, uffataas isaan irratti cicciran, mammadaawanii harkaa bahanii, qullaa dha mana sanii dheeysan.
[17] Hogguu dubbiin tun Yihudootaa fi Giriigota Efesoon jiraatan biratti beekamte. Isaan hundinuu hedduu dha birratan; maqaan Gooftaa Yesuus ammoo hedduu dha kabajame.
[18] Warra amanan keeysaa hedduun dhufanii, gocha isaanii hamaa zaahiritti himuu dhaan saaxil if baasan.
[19] Isaan keeysaa warri xibbii namatti godhaa turan kitaabota ittiin hojjachaa turan walitti guuranii ti, hunduma isaanii duratti guban; gatiin kitaabban sanii tiis, toora qarshii kuma diiydamii shanitti shallagame.
[20] Akkasitti Qoowliin Gooytichaa qiwwaan baballachaaniis guddachaa ti deemte.
[21] Kana booddee Phaawulos Maqedooniyaa fi Akaayyaa keeysa dabree, Yerusaaleem dhaquuf murteeyfate; “Eegaan achi gahe booddee ammaas, Roomaas arkuun qaba” jedhee ti ture.
[22] Gargaartota isaa keeysaa lama Ximotewoosii fi Eraasxoos Maqedooniyaatti ergee ti, ifiif kutaa Asiyaa keeysa hanga takka tutture.
[23] Tooruma wayta sanii keeysa waa'ee karichaa laalchisuun magaalaa Efesoon keeysatti rabshaa guddaa tu ka'e.
[24] Namticha Demeexros jedhamu kan meeta baysuu dhaan fakkii galma waaqayyittii tolfamtuu Arxemiis jedhamtuu meeta irraa tolchu tokko, namoota handassaa hojii tanaa qabaniif, karaa faaydaa itti arkatan hedduu dha baneef ture.
[25] Demeexros jarreen kanaa fi warra hojii tana fakkaattu qaban, bakka takkatti walitti qabee ti, “Yaa jarana, taajirummaan teenya dalagaa tana irraa akka dhuftu hundi keeysanuu ni beeytan.
[26] Waan namtichi Phaawulos jedhamu kun hojjachaa jiru tana ammoo, isinummaanuu arkuu fi dhagayuus ni dandeeysu. ‘Waaqayyoliin harka namaa tiin tolfaman, humaa tuu miti’ jechuu dhaan, as Efesoon qofatti odoo hin tahin, waa xiqqo malee hunduma Asiyaa keeysaa, namoota lakkooysaan hedduu tahan amansiisee yaada isaanii jijjiirsiisee ti jira.
[27] Ammaas, hojummaan teenya qoftiin maqaa baduu qofa odoo hin tahin, galmichi Arxemiis waaqayyittii guddittii dhaa tiis, akka waan gatii hin qabnetti lakkaawamuun isaa tuu ni sodaachisa; kabajaan waaqayyittii dhaa, kan warri Asiyaa keeysaa tii fi biyya addunyaa irraa hundinuu ibaadaniis, baduuf deemti” isaaniin jedhe.
[28] Hogguu tana dhagayan, hedduu aaranii ti, “Arxemiis Efesoon, guddittii dha” jedhanii ti goohan.
[29] Akkasitti magaalattiin guutumatti rabbashamte. Ummanni wacu kuniis bakkuma takkaa ka'ee ti, Gaayosii fi Arisxaarkos warra Maqedooniyaa irraa Phaawulosii wajjiin miila wal godhatanii deemaa turan, butanii ti gara mana walgahitti isaaniin fiigan.
[30] Phaawulos ifumaa fuu ummata walitti qabaman san keeysatti arkamuu dha barbaade; amantoonni ammoo isa gadi dhiisuu dha didan.
[31] Hoogganttoonni kutaa Asiyaa sanii, warri saahibban Phaawulos turaniis, itti erganii ti, akka inni bakka walgahii san hin dheeyne isa gorsan.
[32] Hangana jidduu walgahiin sun guutumatti ni gooti turte; warri kun waan takka wacu; warri kaan ammoo waan biraa ti goohu; isaan keeysaa harki irra caalu ammoo maaliif akka walitti qabaman illee warra hin beeyne turan.
[33] Yihudoonni namticha Aleksaandar jedhamu tokko fuula duratti achi baasan; ummanni hangi tokko inni waa godhuuf nama itti gaafatama qabutti fudhatan. Aleksaandariis akka waan deebisa ummata gargaaru dubbachuu barbaadetti, callachiisuuf jecha harkaan isaan hawwate.
[34] Isaan ammoo, inni nama Yihudii tahuu isaa hubannaan bakka takkaa, “Arxemiis Efesoon, guddittii dha” jechaa ti hanga za'aa lamaa takkaaf iyyaa ti turan.
[35] Booddee barreeysaan magaalaa sanii ummata san callachiisee ti, “Yaa warra Efesoon! Mandarri Efesoon galma Arxemiis guddittii fi dhagaa bifa fakkeenya isii, kan samii irraa gadi bu'e, akka eeydu, namni hin beeyne ni jiraa laata?
[36] Namni kanaan falmu eega hin jirree fuu, isin cal jechuu dha qabdan, ammaas waa takka illee jerjeraan hin godhinaa.
[37] Ammaas isin jara kanneen as fiddanii ti jirtu; isaan ammoo meeshaa galma isii hin saamne, yookiin waaqayyittii hin arrabsine.
[38] Demeexrosii fi hojjatoonni handassaa kanneen isaa wajjiin jiran waan itti nama tokko illee kasasan yoo qabaatan, manni firdii dhaa banaa dha, daanyoonni biyyaa tiis ni jiru, achitti kissii dhiheeyfachuu ni dandayu.
[39] Kana malee, wanni biraa tan isin barbaaddan yoo jiraatte ammoo, kora magaalaa kanaa kan seeraan yaamame keeysatti laalamuu dha qaba.
[40] Rabshaa arra taate tanaaf itti gaafatamuun keenya ni sodaachisa; sababni rabshaan tun itti kaatu hin jiru, nutiis ammaas waa'ee isii tiif jawaaba gahaa kannuu dha dadhabna” jedheeni.
[41] Tana eega dubbate booddee walgahicha san gargar galche.