[1] Mandaroota Amfiipholiisii fi Apholonyaa hogguu dabran, gara magaalaa Tasaloonqee, bakka manni sagadaa warra Yihudootaa ture dhufan.
[2] Akkuma aadaa isaatti Phaawulos mana sagadaa seenee ti, Sanbata sadihiif Barreeyfama Qulqulluu keeysaa waan tahe irratti isaaniin wajjiin falamaa ti ture.
[3] Qoowlicha isaaniif ibsaa, ammaas Masiihiin dararamuun, warra du'an keeysaa hiis ka'uun, akka isa irra ture, Kitaabticha keeysaa isaaniif mirkaneeysaa, “Yesuusiin ani isinitti labsaa jiru kun, isumaa tu Kiristoos Masiihicha” isaaniin jechaa ti ture.
[4] Isaan keeysaa hangi tokko dubbii tana fudhatanii ti gara Phaawulosii fi Siilaasitti ida'aman, Giriigota warra Rabbi sodaatan keeysaa hiis hedduun, dubartoonni beekamoon magaalaa sanii danuuniis fudhatanii ti akkasumatti itti ida'aman.
[5] Haa tahu malee ammoo, Yihudoonni hinaafanii, namoota lampana magaalaa keeysaa ifitti dabalanii ti, waca kaasanii mandaricha rabbashan. Phaawulosii fi Siilaas ummatatti gadi baasuuf, mana namticha Yaason jedhamuu dhaqanii ti irratti tuman.
[6] Phaawulosii fi Siilaas achii dhabnaan, Yaasonii fi amantoota keeysaahiis hanga tokko gara yaa'ii mandarichaatti shorroysanii geeysanii ti, “Jarri kanneen warra biyya addunyaa hunda fonqolchee tu; ammaas as magaalaa keenya dhufe.
[7] Yaasoniis mana isaatti isaan simate; hundi isaanii tuu, mootii biraa Yesuus kan jedhamuu tu jira jechuu dhaan ajaja Qeesaar ni caphsu” jedhanii ti goohan.
[8] Jechi kuniis ummata achitti walitti qabamee fi hooggantoota mandarichaa tiis, aarsee ti kakaase.
[9] Ammaas wayta Yaasonii fi warra isaa wajjiin qabaman waasii yaamsisan gadi isaan dhiisan.
[10] Halkanuma san, obboleeyyan Phaawulosii fi Siilaas gara magaalaa Beriyatti ergan; akkuma achi gayaniiniin, ammaas mana sagadaa warra Yihudootaa ti dhaqan.
[11] Yihudoonni kuniis warra Tasaloonqee caalaa, warra yaada gaarii qabu turan; qoowlicha fudhachuuf qophaawanii, waan dubbatamees dhugaa tahuu isaa mirkaneeyfachuuf, guyyuu Barreeyfama Qulqulluu ni xiinxalu turan.
[12] Isaan keeysaa hedduun, ammaas Giriigota keeysaahiis dubartoonni beekamoonii fi dhiirti hedduuniis ni amanan.
[13] Yihudoonni Tasaloonqee ammoo Phaawulos, Beriyattiis Qoowlii Rabbii lallabuu isaa hogguu baran, achiis dhaqanii ummata tittuqanii ti ammaas rabbashaa kaasan.
[14] Hogguus obboleeyyan Phaawulos gara baharitti ergan, Siilaasii fi Ximotewoos ammoo Beriyatti hafan.
[15] Namoonni Phaawulos geggeeysaniis, magaalaa Ateenaa tiin isa gayanii ti, Siilaasii fi Ximotewoos hatattamaan gara Phaawulos akka dhufan dhaamsa jedhu, isa irraa fidanii ti deebi'an.
[16] Phaawulos magaalaa Ateenaa taa'ee, Siilaasii fi Ximotewoos eegaa odoo jiruu, fakkeenyi waaqayyolii tolfaman magaalaa san keeysa guutanii waan arkeef jecha, ruuhaan isaa hedduu dha cinqame.
[17] Mana sagadaa keeysatti Yihudootaa fi Giriigota warra amantii Yihudootaa fudhatanii wajjiin, lafa magaalaatti guyyuu namuma achitti arkameen wajjiin dubbachaa ti ture.
[18] Murna warra Ephequriyos ammaas Istoyikos jedhaman keeysaa, barsiisoonni ogummaa falaasafaa tokko isatti falman. Isaan keeysaa hangi tokko, “Odeen kun maal jechuu dha kajeela?” jennaan, warri kaan ammoo waan inni Wangeela waa'ee Yesuusii fi waa'ee du'aa ka'uu lallabeef jecha, “Inni kunoo waa'ee waaqayyolii ambaa ti labsa fakkaata” jedhan.
[19] Isa qabanii yaa'ii gaara Aariyofaagos irratti wal gahu duratti dhiheeysanii ti, “Barsiifni haarayni ati fidde kun, maal akka tahe baruu dandeenyaa?
[20] Dubbiin ati fidde tun gurra keenyaaf keeysummaa dha; kanaaf maal akka isiin taate baruu dha barbaanna” isaan jedhan.
[21] Warri Ateenaa hundinuu, ormi ambaa kan achi jiraataniis, oduu haaraya odeeysuu fi namoota irraahiis dhagayuu malee, waan biraa kan za'aa isaanii ittiin dabarsan hin qaban turan.
[22] Phaawulos hogguus tulluu Aariyofaagos walakkaa dhaabbatee ti akkana jedhe, “Yaa warra Ateenaa, isin karaa hundumaan warra amantii akka taataniin arka.
[23] Odumaan magaalaa keeysa dabraa jiruu, bakka sagada keeysanii hedduu hogguun daawwadhe, bakka aarsaa ‘Rabbii hin beekaminiif’ jedhamee irratti barreeyfame tokko arkeetiin jira; eegasuu, isa isin odoo hin beekin sagaddaniif kanaan isiniif lallaba.
[24] Rabbiin addunyaa fi waan isii keeysa jiru hundumaa uume, inni Gooytaa samii fi lafaa ti; inni galma harki namaa ijaare keeysa hin jiraatu.
[25] Inni Banii Aadam hundumaaf, jireenyaa fi hafuura, ammaas waan barbaachisu hundumaa kan kannu waan taheef jecha; waa isatti irratee, harka namaa tiin kan tajaajilamuu miti.
[26] Inni shanyii Banii Aadam hundumaa namticha tokko irraa arkamsiisee ti, biyya addunyaa hundumaa irra akka jiraatan godhe. Barri umrii isaanii tiis hangam tahuu akka qabdu, ammaas durumaan herregee biyya isaanii daangaa itti godhe kan addaan qoodeefiis isuma.
[27] Kanaas akka isaan Rabbi barbaadanii, tariihuu isa faana dhawanii arkataniif jecha godhe; Rabbi ammoo hunduma keenya irraahuu fagoo miti.
[28] Nuti isaani jiraanna, ammaas isaani sossoona, isaani taanee arkamnaasi; isin keeysaahi illee warri miriiysan ‘Nutiis asara isaa ti’ jedhanii ti jiru.
[29] “Nuti eega asara Rabbii taanee fuu, Rabbi, akka bifa waan kanneen ziqeeya, yookiin meeta, yookiin dhagaa irraa, namaan yaadamanii handasaman fakkaata jechuun nu irra hin jiru.
[30] Bara awaamummaa Banii Aadam, Rabbi isaanitti lakkaawuu irra dabree tiifi jira, ammaa tana ammoo, namoonni hundinuu bakka hundumattuu akka toowbatan ajajee ti jira.
[31] Guyyaa inni namticha ifii shuume saniin, addunyatti haqaan itti firdii godhuuf taa'u, murteeysee kaayee waan jiruuf; kanaas namticha herrege san du'aa kaasuu dhaan, nama hundumaa fuu mirkaneeysee ti jira” jedhe.
[32] Phaawulos waa'ee du'aa ka'uu dubbachuu isaa hogguu dhagayan, hangi tokko itti hanjaman, warri kaan ammoo, “Nuti waa'ee tanaa itti daballee si irraa dhagayuu dha barbaanna” isaan jedhan.
[33] Akkasitti Phaawulos yaa'icha keeysaa bahee ti deeme.
[34] Jarri hangi tokko Phaawulositti ida'amanii ti amanan; isaan keeysaa namticha Diiyoniisiyos jedhamu, miseensa yaa'ii Aariyofaagosii fi, dubartiin Damaariis jedhamtu takkaas, ammaas namoonni biraa tiis isaanii wajjiin turan.