[1] Saa'oliis, ajjeefamuu Isxifaanos irratti wal tahee ti ture. Ammaas guyyuma san waldaya amantootaa, tan Yerusaaleem keeysa jirtu irratti reebama guddaa tu ka'e; Ergamoota malee, amantoonni kaan hundinuu kutaa biyya Yihudaatii fi Samaariyaa keeysa bittimfaman.
[2] Jarreen Rabbiif bulan tokko Isxifaanosiif hedduu booyanii ti, reefka isaa awwaalan.
[3] Saa'ol ammoo waldaya amantootaa lafa irraa dhabamsiisuuf manneen irra deemee, dhiiraa fi dubartootaas dirqiin shorroyee ti, mana hidhaatti isaan kanna ture.
[4] Amantoonni bittimfaman sun biyya keeysa naannawaa Qoowlicha ni lallabu turan.
[5] Filiphoos, magaalaa Samaariyaa tokkotti gadi bu'ee ti, warra magaalaa san keeysa jiraniif Kiristoos lallabuu dha jalqabe.
[6] Ummanni niis bakka takkaa gurra qeensanii, waan Filiphoos dubbatu dhaggeeyfatanii, ammaas milikkita inni hojjatees ni arkan.
[7] Ruuhaanonni hamoon sagalee guddoo dhaan iyyaa ti, namoota hedduu keeysaa ni bahu turan, namoonni hedduun kanneen qaamni isaanii laamshawee fi naaffatees ni aafihamu turan.
[8] Kanaaf jecha gammachuu guddoo tu magaalaa san keeysatti tahe.
[9] Mandaruma san keeysa namticha Simoon jedhamu, kan xibbii namatti godhuu dhaan namoota Samaariyaa ajaa'ibsisaa ture tokko, “Ani nama guddaa dha” ifiin jechaa ti ture.
[10] Namoonni magaalaa sanii hundinuu, xiqqaa fi guddaan, dubbiin isaa dhugaa dha jedhanii fudhatanii ti, “Namtichi kun, qiwwaa Rabbii guddoo jedhamtee tan yaamamtuu dha” jechuun turan.
[11] Simoon kun zamana dheeraa durii jalqabee, xibbii namatti godhuu dhaan waan isaan ajaa'ibsisaa tureef jecha, isa qalbiin ni caqasu turan.
[12] Amma ammoo isaanummaan kun, hogguu Filiphoos, Oduu Gammachuu Mootummaa Rabbii tii fi waa'ee maqaa Yesuus Kiristoos isaanitti lallabee dhagayan amananii ti, dhiiraa dhalaan cuuphaman.
[13] Simoon matummaan isaa tuu ni amane; ammaas akkuma cuuphameen Filiphoositti maxxanee, milikkitaa fi mu'ujizaa gurguddoo godhaman hogguu arke, hedduu dha mirqaane.
[14] Hogguus ergamoonni Yerusaaleem jiran, warri Samaariyaa Qoowlii Rabbii fudhachuu isaanii dhagayanii ti, Phexiroosii fi Yohannis erganiif.
[15] Isaaniis Samaariyaatti gadi bu'anii ti, amantoonni Ruuhal Qudus akka arkatan kadhataniifi.
[16] Isaan maqaa Gooftaa Yesuus qofatti cuuphaman malee, Ruuhal Qudus isaan keeysaa nama tokko irratti illee hugguusiif hin buune ture.
[17] Eegas ergamoonni, isaan irra harka isaanii ni kakkaayan, hogguusi isaaniis Ruuhal Qudus ni fudhatan.
[18] Simoon hogguus, harki ergamootaa nama irra kaayamuu dhaan, Ruuhal Qudus akka kanname agarraan, maallaqa ergamootaaf fidee ti,
[19] “Namniniin harka kiyya irra kaahu hundinuu Ruuhal Qudus akka arkatuuf, humna akkasii ammaas anaafiis kannaa!” jedheeni.
[20] Phexiroos ammoo, “Kannaan Rabbii, horii dhaan bitamti jettee waan yaaddeef jecha, qarshiin tee si wajjiin haa baddu!
[21] Yaadni garaa kee tii Rabbi duratti qaceelaa waan hin tahiniif jecha, ati kidmaa tana keeysaa qoodaas ammaas hixaas hin qabdu.
[22] Kanaaf jecha, badii tee tana irraa toowbadhuu, Gooftichaas kadhadhu; yoo waan dandayamaa taate, niyyaa tee hamtuu tanaaf oomfii siif ni godha taha.
[23] Yaadni hadhaawaan si keeysa guutee, diliiniis akka si hidhatte niin arka” jedhee ti deebiseefi.
[24] As irratti Simoon deebisee, “Hadaraa! Waan jettan kanneen keeysaa, takka illeen akka ana irra hin geenye Gooftaa anaaf kadhadhaa!” jedheeni.
[25] Ergamoonni Qoowlii Gooytaa eega barsiisan booda, gandeen Samaariyaa hedduu keeysatti Wangeela lallabaa ti Yerusaaleemitti dacha'an.
[26] Eegas ammoo maleeykaan Rabbii tokko Filiphoosiin, “Ka'ii tii, gara kibbaa, karaa gammoojjii, kan Yerusaaleem irraa Gaazaa nama geeysu deemi!” jedheeni.
[27] Filiphoosiis hogguusuma ka'ee ti deeme. Kunoo, namtichi muratteen biyya Itoophiyaa tokko, kan qabeenya Kandaakee mootittii biyya Itoophiyaa hundumaa irratti ajajaa turees, sagadaaf jecha Yerusaaleem dhufee ti ture.
[28] Odoo achii gala deemuu, gaarii kottee duudaa dhaan harkifamtu irra taa'ee, kitaaba nabi Isaayyaas dubbisaa ti deema ture.
[29] Ruuhal Qudus hogguus Filiphoosiin, “Deemii tii gaarii tana dhaqqabi” jedheeni.
[30] Filiphoosiis jala fiigee ti, namticha kitaaba nabi Isaayyaas dubbisutti jiru dhagayee, “Wanni dubbisaa jirtu tun siif ni galtii?” jedhee ti gaafate.
[31] Namtichi ammoo, “Odoo namni anaaf hin ibsin, akkamittiin hubachuu dandaya?” jedhee ti ammaas gaarii irratti bahee isaan wajjiin akka taa'uuf Filiphoos afeere.
[32] Qoowliin Kitaabtichaa tan inni dubbisaa turee tiis, “Inni akka hoolaa qalamuuf geeyfamuu ti, yookiin akka ilmoon hoolaa, tan namni hogguu rifeensa irraa muru sagalee isii hin dhageeysifnee ti, akkasumatti inni niis waa takka illee hin dubbanne.
[33] Danboobamuu isaa tiif firdii haqaa ni dhoorkame; hidda abaabuu isaa tiis eenyuu tu hima? Jireenyi isaa tiis dachii irraa ni fuudhame” waan jedhu ture.
[34] Namtichi Itoophiyaa sun hogguus Filiphoosiin, “Nabiyyichi eenyu laalchisuun tana dubbata? Hadaraa mee anatti himi! Waan mataa isaa ti moo yookiin waan nama biraa ti?” jedhee ti gaafate.
[35] Filiphoosiis, bakkuma inni kitaaba kana irraa dubbisaa jiruu jalqabee ti, waa'ee Yesuus laalchisuun Oduu Gammachuu dhaa itti odeeyse.
[36] Oduma karaa san irra deemaa jiranii, bishaan tokko bira geenyaan; namtichi hogguus Filiphoosiin, “Bishaan kunoo tii, akkaan hin cuuphamne maaltu na dhoorka?” jedheeni.
[37] [Filiphoos hogguus, “Garaa guutuun yoo amante, siif ni dandayama” jedheeni; as irratti inni, “Yesuus Kiristoos Ilma Rabbii akka tahe niin amana” jedhee ti deebiseef.]
[38] Namtichi hogguus gaarigaan akka dhaabbatuuf ajaje; Filiphoosii fi namtichi muratteen bishaan keeysa seenanii ti Filiphoos isa cuuphe.
[39] Bishaan san keeysaa hogguu bahan, Ruuhaan Gooftaa dhaa hatattamaan Filiphoos butee, fuudhee ti deeme. Namtichi muratteeniis achiin booda deebi'ee isa hin agarre; haa tahu malee, karaa isaa gammachuu dhaan itti furee.
[40] Filiphoos ammoo Azoxoonitti arkamee ti, biyya keeysa naannawee, magaalaa mara keeysatti Wangeela lallabaa ti Qiisaariyaa gahe.