[1] Akkaataa kanatti nagaya isaanitti dhaamnee, kaanee odoo hin maqin markabaan ceenee, Qos biyya bishaan keeysaatti dhufne; borumtii ammaas Roodoos biyya bishaan keeysaa ti geenye, achii ammaas magaalaa Phaaxaraa ti dheeyne.
[2] Achitti markaba kutaa biyya Finiiqeetti ceehu arkannee ti, seennee deemneeni.
[3] Qophroos hogguu fuulletti agarree, harka bitaatti hambifnee ti, Sooriyatti dabruudhaan, Xiiroos bakka markabni meeshaa itti buufatutti irraa buune.
[4] Amantoota achi jiraniis barbaannee ti, torbaan tokko achi isaan bira turre; amantoonni suniis Ruuhal Qudusiin geggeeyfamanii ti, Phaawulosiin Yerusaaleem hin dhaqin jedhanii ti itti himan.
[5] Guyyoonni nuti isaan bira achi turru dhumnaan, isaan biraa kaanee ti, karaa keenya irra buune; hundi isaanii tiis beera isaanii tii fi joollee isaanii wajjiin, hanga nuti magaalaa keeysaa achi baanutti nu geggeeysan. Ammaas hundi keenyaa huu qarqara bishaantitti jilbiiffannee ti, Rabbi kadhanne.
[6] Nagayaas eega walitti dhaammanne booddee, nuti markaba seenne, isaan ammoo deebi'anii ti manneen isaanitti galan.
[7] Nuti Xiiroosii kaanee, magaalaa Phitolemeesi geenye, achittiis amantoota nagaya gaafannee ti, guyyaa tokko isaan bira oolle.
[8] Guyyaa borumtii achii kaanee magaalaa Qiisaariyaa ti dhufnee ti, mana Filiphoos namticha lallabaa Wangeelaa ti seenne. Inni warra torban Yerusaaleemitti filataman keeysaa tokko ture; isa biraas waa xiqqo bubbulle.
[9] Filiphoos kun joollee dubraa afur qaba ture; joolleen tun Ruuhal Qudusiin waan Rabbi isaanitti mullise raajii ni himu turan.
[10] Guyyaa muraasaaf oduma Qiisaariyaa qubannee jirruu, nabiyyiin Agaabos jedhamu tokko biyya Yihudaa irraa achi dhufe.
[11] Nabiyyichi kun nu bira dhufee, waraansillee Phaawulos fuudhee ti, harkaa fi miila isaa walitti if hidhee, “Yihudoonni Yerusaaleemitti abbicha waraansillee tanaa akkanatti akka isa hidhanii, harka saba qomoo Israa'el hin tahinitti dabarsanii akka kannan Ruuhal Qudusii tu dubbata” jedhe.
[12] Nuu fi namoonni achi turaniis dubbii tana dhageenyee, Yerusaaleemitti akka ol hin baaneef Phaawulos kadhanne.
[13] Inni ammoo, “Maaliif boochanii qalbii na caphsitan? Ani kunoo, hidhamuu qofaaf odoo hin tahin, maqaa Gooftaa Yesuusiif jecha Yerusaaleemitti du'uuf illee qophaawaa dha” jedhee ti nuuf deebise.
[14] Inni nuuf fudhachuu dinnaan, “Fedhiin Gooytaa dhaa haa taatu” jennee ti dhiifne.
[15] Guyyoota kanneen booddees qophooynee ti, Yerusaaleemitti ol baane.
[16] Amantoonni Qiisaariyaa tokkoos ammaas nu wajjiin dhufanii ti, mana Minaason nama biyya Qophroos, nama barattoota duraa keeysaa tokko tahe bira akka qubannuuf nu geeysan.
[17] Hogguu nuti Yerusaaleem geenye, amantoonni gammachuu dhaan nu simatan.
[18] Guyyaa borumtii tiis, Phaawulos nuu wajjiin Yaaqoob bira dhaqe; manguddoon waldaya kiristaanaa hundi niis achuma wal bira turan.
[19] Phaawulos nagaya eega isaan gaafate booddee, waan Rabbi saba qomoo Israa'el hin tahin jiddutti karaa tajaajila Phaawulosiin raawwate hundumaa, tokko tokkoon tarree galchee ti isaanitti gabaase.
[20] Hogguus warri kana dhagayan Rabbiif hamdii dhiheeysanii ti, Phaawulosiin ammoo, “Agartaa yaa obboleeysa keenya! Yihudoonni amanan kuma hedduun akka jiran atuu ni agarta; hundi isaanii tuu warra eeera Rabbii tiif hinaafu.
[21] Yihudoota warra saba qomoo Israa'el hin tahin keeysa jiraatan hunda, seera Musee akka dhiisanii fi, ammaas joollee isaanii akka dheeyna hin qabne, ammaas aadaa dhaas akka hin eeyne, barsiisuun kee isaanitti himamee ti jira.
[22] Isaan kunoo, akka ati dhufte waan dhagayuuf jecha, maal godhuu tu nu irra jira?
[23] Amma waanuma nuti sitti himnu godhi! Namoota qodhaa if irraa qaban afur qabna.
[24] Ati isaan fuudhii tii deemi, isaanii wajjiiniis if xaahari, mataa isaanii haaddachuu akka dandayan gatii isaan if xaaharuuf baasanuun irra jiruus atummaan kafaliif! Akkaataa kanatti namni hundinuu, wanni si irratti odeeyfamee dhagayan tun, humaa akka hin tahin, atiis seeraan jiraachuu kee tiis beekuu ni dandayu.
[25] Saba qomoo Israa'el hin tahin keeysaa warra amanan ammoo, qalma waaqayyolii tolfamaniif dhihaate irraa, dhiiga irraa, foon baktii irraa ammaas zinaa fi ejjummaa irraa fagaatanii akka if eegan durumaanuu murtoo goonee isaaniif barreeysinee ti jirra” isaan jedhan.
[26] Phaawulos guyyaa borumtii dhaa, namoota san fuudhee geeysee ti, isaanii wajjiin if xaahare. Guyyaan xaaharummaa isaanii yoom akka raawwatamu, guyyaa kamittiis matatti tokko tokkoo isaanii tiif aarsaan akka dhihaatu beeysisuuf, Beeytal Maqdasi ol seene.
[27] Guyyaan torban isaanii raawwatamuu jala geenyaan, Yihudoonni warri kutaa Asiyaa irraa dhufan Phaawulos Beeytal Maqdas keeysatti agarraan, ummata hundumaa itti kakaasanii ti isa qaban.
[28] Jarri kun sagalee isaanii ol fudhatanii ti, “Yaa warra Israa'el, koottaa nu gargaaraa! Kunoo, namticha kana kan namoota bakka hundumatti, ummata keenya irratti, seera Musee tiis, Beeytal Maqdas kanaas tuquu dhaan barsiisu, tana malees ammuma illee Giriigota tokko fidee Beeytal Maqdasitti galchuu dhaan, bakka xaahara kanaas najisee ti jira” jedhanii ti itti iyyan.
[29] Duraan Xiroofimoos namticha Efesoon tokko isaa wajjiin magaalaa keeysatti waan arkaniif jecha, Phaawulos Beeytal Maqdas waan isa geeyse isaanitti fakkaatee ti ture.
[30] As irratti mandarri guutumatti rabbashame, ummanni wajji orihee ti Phaawulos qabanii shorroysaa ti Beeytal Maqdas keeysaa gadi baasan; hogguusuma balbaloonni Beeytal Maqdas ni cufaman.
[31] Isaan Phaawulos ajjeesuuf odoo yaalaa jiranii, Yerusaaleem guutummatti rabshaa irra akka taate, murna waraana Roomaa irratti abbaa kumaaleeysaa namticha turetti himame.
[32] Abbaan kumaaleeysaa sun hogguusuma loltootaa fi abboota dhibbaaleeysaa fudhatee, gara warra Phaawulos qabanitti fiige. Isaaniis abbaa kumaaleeysaa tii fi loltoota hogguu arkan, Phaawulos tumuu irraa dhaaban.
[33] Hogguus abbaan kumaaleeysaa Phaawulositti dhihaatee ti isa qabsiisee, “Shanshalata lamaan hidhaa!” jedhee ti ajaje. Kana booddee ammoo, “Namtichi kun eenyu jedhama? Maal balleeysees?” jedhee ti jara gaafate.
[34] Ummata san keeysaa garri tokko waan takka jedhee ti iyya, garri kaan ammoo waan biraa ti jedha. Alaqtichi ammoo gooha ummataa tiif jecha, akkaataa haala kanaa hubachuu waan dadhabeef, Phaawulos bakka qubata loltutti akka geeysani ajaje.
[35] Phaawulos darajaa ittiin ol bahan bira hogguu gahe, shoorarkaan ummataa hizaabaa baanaan, warri loltuu dhaa Phaawulos ol fuudhanii ti baadhatan.
[36] Hogguus ummanni danuun, “Dhabamsiisi!” jechaa iyyaa ti duukaa yaa'an.
[37] Hogguu warri loltuu bakka qubata isaanitti isa galchuuf dhihaatan Phaawulos, “Waa sitti dubbachuun ni dandayamaa?” jedhee ti abbaa kumaaleeysaa gaafate. Alaqtichi niis, “Sa ati afaan Giriigii ni beeytaa?
[38] Eegasuu ati, nama biyya Misraa kan kanaan dura namoota kuma afur, warra shoorarkaa kaasuu barbaadan geggeeysee lafa gammoojjitti isaan galche san sii mitii?” jedheeni.
[39] Phaawulos ammoo deebisee, “Ani Yihudii dha, Xarsees magaalaa Qiliiqiyaattiin dhaladhe, ani nama magaalaa beekamaa tokkoo ti; hadaraa namoota kanatti akkaan dubbadhuufiin hayyama si kadhadha” jedheeni.
[40] Hogguus abbaan kumaaleeysaa, “Haa tahu, mee dubbadhu!” isaan jedhe. Phaawulos darajaa irra dhaabbatee, harkaan isaan hawwate; namoonni cal jennaan, afaan Yihudaa tiin isaanitti dubbachutti ka'e.