[1] Ergamoonninii fi obboleeyyan biyya Yihudaa jiran, sabni qomoo Israa'el hin tahiniis Qoowlii Rabbii akka fudhatan ni dhagayan.
[2] Kanaaf hogguu Phexiroos Yerusaaleem dhaqe, Yihudoonni amantoonni warri dheeyna qabatan isa qeeqan,
[3] “Ati maaliif warra dheeyna hin qabatin bira dheeyxee wajjiin nyaatta?” jedhaniin.
[4] As irratti Phexiroos waan tahe hundumaa, jalqabaa kaasee tartiibaan isaanitti hime.
[5] “Magaalaa Yophee keeysatti kadhata irra odoon jiruu tiin, mullata arke. Kunoo, wanti akka huccuu guddoo dhaa xarzii afraniin hidhamtee, samii irraa gadi buufamtee, dhuftee ti ana cinaa buute.
[6] Itti dhihaadhee hogguun daawwadhees, makluuqa lafa irraa kanneen miila afur qaban, bineensoota wal nyaatuus, warra lafa irra munyuuquus, qilleensa keeysa kan bararaniis achi keeysattiin arke.
[7] Ammaas sagalee takkaas, ‘Yaa Phexiroos, ka'ii tii qaqqalii nyaadhu!’ tan anaan jettuun dhagaye.
[8] Ani ammoo, ‘Hin tahu yaa Gooftaa, waan xaahara hin tahinii fi najisa, ani gonkumaa nyaadhee hin beeku’ jedhee tiin deebiseef.
[9] Sagalummaan sun ammaas samii irraa, ‘Waan Rabbi xaahara godheen, ati najisa hin jedhiniin!’ jettee ti deebifte.
[10] Tun wayta sadih taate, kana booddee akkuma jirtutti deebitee ti samitti ol fuudhatamte.
[11] “Hogguusuma jarri sadeen Qiisaariyaa irraa anatti ergaman sun, mana nuti keeysa jirru san dhufan.
[12] Ruuhal Qudus shakkiin maletti isaanii wajjiin akkaan deemu anatti hime. Obboleeyyan jahan warri na bira jiran kuniis anaa wajjiin deeman; hundi keenyaa huu mana Qorneelewos seenne.
[13] Qorneelewosiis, maleeykaan Rabbii, akkaataa mana isaa keeysa dhaabbatee, ‘Yopheetti nama ergii Simoon Phexiroos nama jedhamu yaamsisi’ jedhee itti dubbate arkuu isaa ti nutti hime.
[14] ‘Inni niis qoowlii, sii fi warri mana kee tii hundinuu ittiin najaa baatan sitti ni hima’ akka isaan jedhees nutti hime.
[15] Hogguun ani dubbachuu jalqabe, Ruuhal Qudus, akkuma jalqaba nu irratti bu'e sanitti, isaan irrattiis ni bu'e.
[16] Hogguu saniin dubbii Gooftaan, ‘Yohannis bishaaniin cuuphe, isin ammoo Ruuhal Qudusiin cuuphamtu’ jedhe san yaadadhe.
[17] Eegasuu, nu warra Gooftaa Yesuusitti amanneef, Rabbi kannaa Ruuhaa akkuma kannetti, kannuma akkasii yoo inni isaaniif kanne, ani eenyuma tahee tiin Rabbi dhoorkuu dandaya?” jedhe.
[18] Isaaniis tana eega dhagayan booda, ni callachiifaman. Ammaas, “Eegasuu Rabbi, saba qomoo Israa'el hin tahiniifiis, toowbaa jireenyaa kannee ti jira” jechaa ti hamdii Rabbiif galchan.
[19] Sababa Isxifaanosiin reebama waldaya irratti ka'e saniin, amantoonni hanga Finiiqee, Qophroos, ammaas Anxookiyaattiis bittinnaawanii ti turan; qoowlichaas Yihudootuma qofa malee nama biraa hin barsiisan turan.
[20] Haa tahuu ammoo, warri Qophroosii fi Qareenaa irraa Anxookiyaa dhufan hangi tokko, Giriigota barsiisaa, waa'ee Gooftaa Yesuus isaan ni qaraasisu turan.
[21] Irreen Gooftaa isaanii wajjiin turte, namoonni hedduuniis amananii ti gara Gooftaa deebi'an.
[22] Oduun tuniis waldaya Yerusaaleem bira geeyse, isaaniis achii hi Baarnaabaas Anxookiyaatti ergan.
[23] Inni niis wayta dhufee, ni'imaa Rabbi isaaniif kanne arkee gammadee ti; Gooftaaf amanamoo tahanii garaa dhaa kutatanii akka itti jabaatan hunduma isaanii tuu ni gorse.
[24] Baarnaabaas nama gaarii, kan Ruuhal Qudusii fi amantiis guutame ture, namoonni hedduuniis gara Gooftaa ti fidaman.
[25] Baarnaabaas eegas Saa'ol barbaacha gara Xarsees dhaqe.
[26] Hogguu isa arkees, gara Anxookiyaatti isa fide; bara tokko guutuu waldaya sanii wajjiin taahanii, namoota hedduu barsiisaa ti turan. Barattoonni Anxookiyaatti jalqaba duraa tiif, kiristaanota jedhamanii ti moggaafaman.
[27] Jidduma sani nabiyyoonni tokko Yerusaaleem irraa Anxookiyaatti gadi bu'an.
[28] Isaan keeysaa Agaabos namtichi jedhamu tokko ka'ee ti, lafa hundumaa irratti abaar jabaa tu bu'uuf deema jedhee ti, ruuhaan raajii dubbate; kuniis bara mooticha Klaawudiiyosi tahe.
[29] Barattoonni niis, matumatti akkuma dandeeyyii isaaniititti, obboleeyyan warra biyya Yihudaa jiraataniif gargaarsa hatattamaa erguuf ifitti muran.
[30] Waan niyyataniis godhanii ti, harka Baarnaabaasii fi Saa'oliin gara manguddoota waldayatti ergan.