[1] Gooti hogguu qabbanooyte, Phaawulos amantoota ifitti yaamsisee, eega isaan jajjabeeyse booddee, nagaya itti dhaammatee ti Maqedooniyaa dhaquuf ka'e.
[2] Godinoottan keeysa wayta dabru, amantoota bakka jiran hundumatti gorsa hedduu dhaan jajjabeeysaa ti dabree biyya Giriigii gahe.
[3] Ji'a sadih achitti dabarse, markabaan Sooriyaa dhaquuf odoo qophaawuu, Yihudoonni isa irratti marihatan; kanaaf jecha Maqedooniyaa keeysaan deebi'uuf murteeyfate.
[4] Sophaaxros ilmi Phiiros namtichi Beriyaa, Arisxaarkosii fi Sekundos warri Tasaloonqee, Gaayos namtichi Derbee, Ximotewoos, Xikiqoosii fi Xiroofimoos warri Asiyaa, Phaawulosii wajjiin turan.
[5] Jarri kun nu dura deemanii ti Xiro'aasitti nu eegan.
[6] Nuti ammoo, guyyaa ayyaana Qiinxaa Maattiraat booddee Filiphisiiyusii markabaan kaanee, guyyaa shan booddee Xro'aasitti isaan dhaqqabnee ti, guyyaa torba achi teenye.
[7] Torbaan keeysaa guyyaa duraa, biddeena kutachuuf walitti qabamnee ti turre. Phaawulos borumtii isaa deemuu waan yaadeef jecha, dubbii isaa dheereysee hanga halkan waaritti isaanitti dubbate.
[8] Mana qallaa gubbaa bakka nuti itti walitti qabamne keeysa, ibsaalee hedduu tu ture.
[9] Dargaggeeysi Oyxikoos jedhamu tokko fooddaa irra taa'a ture. Phaawulos dubbii ittuma furee dheereeysinaan, dargaggeeysicha hirriibni fudhatee ti, qallaa sadaffaa irraa kufe, reefka isaa tiis lafaa kaasan.
[10] Hogguus Phaawulos gadi bu'ee ti irratti kufee ifitti isa qabee, “Hin iyyinaa! Lubbuun isaa keeysa jirti” jedhe.
[11] Eegas Phaawulos qallaa gubbatti ol deebi'ee, biddeena kutatee ti nyaatee, hanga lafti bariituu namootaa wajjiin haasawaa turee ti akkasitti deeme.
[12] Tana jiddutti isaan gurbicha fayyaa manatti galchanii, hedduu dha jajjabaatan.
[13] Kana booddee Phaawulos karaa lafaa irra deemee magaalaa Asos dhaquu dha yaade; nuti ammoo isa dura deemnee, markabaan Asos geenyee, achii markabaan akka isa fuunuuf qindeeysee ti ture.
[14] Asositti wal agarree, nuti isa fuunee magaalaa Mixileeneetti dabrine.
[15] Guyyaa borumtii markabaan achii kaanee, Kiiyos biyya bishaan keeysaa cinaa ti geenye. Guyyaa lammaffaattiis Saamos biyya bishaan keeysaa ti dheeynee, borumtiis Mileexositti galle.
[16] Phaawulos kutaa biyya Asiyaa keeysa turuu hin barbaanne. Kanaaf Efesoonitti goruu dhiisee ti, markabaan dabruuf murtoo godhe; ayyaana guyyaa shantammeeysaa Phenxeqostee dhaa Yerusaaleemitti arkamuu waan barbaadeef jecha, achi gahuuf ariifachaa ti ture.
[17] Phaawulos Mileexos irraa Efesoonitti nama ergee ti, manguddoo waldaya dhaa ifitti yaamsise.
[18] Wayta manguddoonni gara isaa dhufan, “Guyyaan dura kutaa biyya Asiyaa kana dhufee jalqabee, wayta hundumaa akkamitti akkaan isin jiddutti jiraadhe, isinuu numa beeytan.
[19] Fitinaa Yihudoota irraa ana irratti malamaa ture keeysatti, karaa hundumaan if gadi qabuu dhaan, imimmaaniiniis, Gooftaa kaadamaa tiin ture.
[20] Waan isiniif faaydaa qabu hundumaa, bakka walgahitti, manneen adda addaa keeysattiis isinitti lallabuu fi isin barsiisuu irraa ani if hin qusanne.
[21] Toowbatanii gara Rabbitti akka deebi'an, Gooftaa keenya Yesuusittiis akka amanan, Yihudootaa fi Giriigotaaf ragaa bahee tiin jira.
[22] Ammaas taanaan kunoo, Ruuhal Qudusiin qabamee, achitti waan ana mudachuuf taa'u odoon hin beekin, Yerusaaleem dhaquufiin deema.
[23] Ruuhal Qudus ammoo, mandarumaan ani gahu hundumatti, hidhamuunii fi dararamuun akka ana eegan anatti mullisee ti jira.
[24] Haa tahu malee, ani hojii Wangeela ni'imaa Rabbii, taniin Gooftaa Yesuus irraa fudhadhe san dandayamnaan bakkaan gahuu qofa malee, lubbuun tiyya illeen ana biratti gati qabdi jedhee hin lakkaawu, nattiis jabduu miti.
[25] “Ammaas isin kanneen, warriniin ani isin jidduu deddeebi'ee waa'ee Mootummaa Rabbii isinitti lallabaa ture hundinuu, arraan booda akka isin fuula kiyya hin agarre ani niin beeka.
[26] Kanaaf jechaan ani arraantana, dhiiga hunduma keeysanii irraa xaliila tahuu kiyyaan isinitti hima.
[27] Ani kunoo, akeeka Rabbii hunduma isin beeysisuu irraa if hin qusanne.
[28] Mataa keeysanii fi ammaas karra hoolota Rabbii, warra Ruuhal Qudus isin toohattoota godheef, tika godhaa! Waldaya kiristaanaa tan Rabbi gumaa dhiiga ilma isaa tiin arkamsiise tiysaa!
[29] Eegaan ani asii deeme booddee, warri akka yayyii nama sodaachiftuu, kanneen hoolota karra keeysatti hin hambifne, akka isin keeysa seenuuf taa'an niin beeka.
[30] Isinuma keeysaa huu, warri dhugaa jirtu jallisanii dubbachuu dhaan, barattoota harkisanii if jala buusu ka'uuf taa'u.
[31] Kanaaf jecha dammaqaa if eegaa! Bara sadih halkanii fi guyyaa odoon gargar hin kutin, imimmaaniin hunduma keeysanuu tokko tokkoon akkaan isin gorsaa ture yaadadhaa!
[32] Ammaas harka Rabbittii fi qoowlii ni'imaa isaa tan isin ijaaruuf quwwaa qabdutti, ammaas qulqulloota isaa hunduma jidduttiis dhaala kan isiniif kannuttiin isin kanna.
[33] Ziqeeya, yookiin meeta, yookiin uffata arkachuuf nam tokko illee irraa huu ani hin kajeelle.
[34] Mataa kiyyaa fi warra anaa wajjiin jiraniifiis, waan nu barbaachise harki kiyya kanneen carraaqanii akka nu tajaajilan isinuu ni beeytan.
[35] Waanuma hundumattuu akkanatti carraaynee, warra dadhaboota gargaaruu akka qabnu, isin agarsiisee tiin jira; jecha Yesuus Gooftaan, ‘Fudhachuu irra kannuu tu caalatti irra eeyba qaba’ jedhee dubbate san mee haa yaadannuu” jedheeni.
[36] Phaawulos tana eega dubbate booddee, hunduma isaanii tiin wajjiin jilbiiffatee ti Rabbi kadhate.
[37] Hundi isaanii tiis bobbooyaa morma isaatti maramanii ti dhudhungatan.
[38] Jechi inni arraan booda fuula kiyya hin agartan jedhee dubbate sun ammoo, caalatti isaan naasise; akkasitti isaan hanga lafa markabaatti isa geggeeysan.