[1] Guyyaa shan booddee Ananiyaas angafni lubootaa, manguddootaa fi namticha abukaatoo seeraa kan Xerxilos jedhamu tokkoon wajji gara Qiisaariyaatti gadi bu'e. Isaaniis fuula bulchaa biyyaa, Feeliksitti dhihaatanii ti, kissii Phaawulos irratti qaban dhiheeyfatan.
[2] Hogguu Phaawulos ol yaamame, Xerxilos kissii isaa dhiheeyfachuu jalqabuun, “Yaa kabajamaa Feeliks, wayta dheeraaf nagaya bulchaa kee jalatti arkanne; fageeysitee laaluu kee tii irraa kan ka'e, kunoo ummata kanaaf jijjiiramni hedduun arkamee ti jira.
[3] Waa hundumaan bakka hundumaattiis kana galata guddaa dhaan fudhanna.
[4] Kana caalaa ammoo si dadhabsiisuu hin barbaadu; haa tahu malee, himata gabaabduu nuti qabnu kana, gara-ballinaan akka nuuf caqastuun si kadhadha.
[5] Namtichi kun mujrima hamaa, kan Yihudoota biyya addunyaa irra jiraatan hundumaa jiddutti, rabsha kakaasuu fi, ammaas murna warra Naazireet jedhamu, kanneen amantii Yihudii irraa fottooqaniif dura-buutuu tahuu isaa tiis bira geenyee ti jirra.
[6] Beeytal Maqdas illee najisuuf yaalee ti jira, nuti ammoo [akka seera keenyaatti isatti firdii kannuuf] isa qabnee ti turre.
[7] [Liisiyaas abbaan kumaaleeysaa ammoo dubbii tana jidduu seenee ti, humnaan isa nu harkaa baafate.
[8] Booddee ammaas warri Phaawulos kasasan fuula kee duratti akka dhihaatan ajaje;] atiis ifii kee tii xiinxaltee, waan nuti namticha kana kasasnuuf hundumaa, isa irraa baruu ni dandeeysa” jedheeni.
[9] Yihudoonni niis ammaas, kissii Phaawulos irratti dhiheeyfamte tana mirkaneeysuu dhaan itti walii galan.
[10] Hogguu bulchaan biyyaa, “Dubbadhu!” Phaawulosiin jedhe, hogguus Phaawulos, “Akka ati bara hedduuf ummata kana irratti abbaa firdii turte waaniin beekuuf jecha, fuula kee duratti falmachuu kiyyaaf gammachuu tu natti dhagayama.
[11] Sagaduuf eegaan ani gara Yerusaaleemitti ol bahe, guyyaa kudha lama hin caalu, atiis kana hubachuu ni dandeeysa.
[12] Warri na kasasaniis, anaa nam tokko illee Beeytal Maqdas keeysatti, manneen sagadaa keeysattii fi mandarticha keeysattiis falamaa, ummata kakaasu ana arkanii hin beekan.
[13] Waan amma itti na kasasan tanaas, dhugumaan siif mirkaneeysuu hin dandayan.
[14] Wanniniin zaahir siif baasu takka ammoo; ani karaa amantii kan isaan, ‘Murna amantii Yihudii irraa fottooqan’ jedhaniin san, fudhachuu kiyya niin amana; Rabbii abbootii teenyaa tiis ibaadaa tiin jira. Waan Kitaaba Seeraa keeysattii fi kitaabban nabiyyootaa keeysatti barreeyfaman hundumaattiis niin amana.
[15] Warri qaceeloonii fi warri mujrimooni niis akka du'aa ka'uuf taa'an, akkuma isaanuu fudhatanitti aniis Rabbi irra abdii godhadhee tiin eeggadha.
[16] Kanaaf jecha, guyyuu tuu Rabbii fi fuula namaa durattiis, xalalii xaliila qabaachuuf tattaafachaa tiin jira.
[17] “Bara waa xiqqo eegaan ture booddee, ummata kiyyaaf gargaarsa geeysuu fi ammaas aarsaa Rabbiif dhiheeysuuf jechaan Yerusaaleem dhufe.
[18] Yihudoonni kutaa biyya Asiyaa keeysaa dhufan tokko ammoo, anuma kan Beeytal Maqdas keeysatti seeraan xaaharamee aarsaa dhiheeysaa jiru na arkan; namoonni na biratti walitti qabamnee fi, ammaas rabshaan takka illeenuu hin turre.
[19] Ana irraa odoo dubbii qabaatan illee, isaan warra fuula kee duratti dhihaatanii ana kasasuu dandayu turan.
[20] Yookaan, waytaan yaa'ii biyyaa dura dhihaadhe, dadiin ana irratti arkamte yoo jiraatte, isaanummaan kunuu haa himanii.
[21] Dubbii takkittiin ani isaan jidduu dhaabbadhee, sagalee tiyyaas ol fudhadhee, ‘Waa'ee du'aa ka'uu warra du'anii dubbadhe jechaaf qofaan, ani guyyaa arraan tanaa kasasamee fuula kee dura dhaabbadha’” jedhe.
[22] Feeliks ammoo waa'ee karaa amantii sanii akka gaaritti waan beekuuf jecha, “Liisiyaas, abbaan kumaaleeysaa gaafa dhufuun, dubbii teeysan irratti murtoo kanna” jedhee ti beellamaan dabarse.
[23] Eegas Phaawulos eeggaa jala oolee, ammoo hidhaa dandamata qabdu taatee, ammaas firoottan isaa kanneen waan isa barbaachisuun kaadaman hundinuu akka hayyama hin dhoorkamne, abbaa dhibbaaleeysaatti ajaja dabarse.
[24] Guyyaa muraasa booddee Feeliks niitii isaa Diruusillaa tan dhaloota Yihudii taate wajjiin dhufe; inniis Phaawulos dhiheeysisee ti, waa'ee Yesuus Kiristoositti amanuu irratti waan Phaawulos jedhu dhaggeeyfate.
[25] Wayta Phaawulos falamaa isaa keeysatti, waa'ee haqaa, waa'ee hamtuu irraa if dhoorkuu fi waa'ee firdii dhufaa jirtuu dubbate, Feeliks sodaatee ti, “Kun ammaaf ni gahaa deemii, ammaas akkuma anaaf mijjaawettiin ergee si yaamsisa” isaan jedhe.
[26] Tanuma keeysa ammaas Phaawulos maallaqa akka isaaf kannu ni kajeela ture; kanaaf jecha wayta hedduu isa yaamsisee wajjiin ni haasawa ture.
[27] Bara lama booddee ammoo, Phorkiyoos Fesxoos tu bakka Feeliksii fudhate; ammaas Feeliksiis Yihudoota gammachiisuu barbaadee ti, Phaawulos akkuma hidhametti dhiise.