[1] Jarreen kutaa biyya Yihudaa irraa, gara Anxookiyaa biyya Sooriyaatti gadi bu'an tokko ammoo, “Akka seerri Musee ajajutti yoo dheeyna qabachuu baattan, najaa bahuu hin dandeeysan” jechaa kiristaanota barsiisutti ka'an.
[2] As irratti Phaawulosii fi Baarnaabaas jarreen saniin wajji walii galuu dadhananii hedduu dha waliin morkan. Kanaaf jecha waldayan, morkii kaate tana ergamootaa fi manguddoo Yerusaaleem jiran biraan gahuuf, Phaawulosii fi Baarnaabaas, ammaas amantoota keeysaa hiis namoota hanga tokko, erguuf murtoo goote.
[3] Akkasitti waldayan kiristaanaa tiin ergamanii ti karaa irra buufaman. Isaan ammoo, sabni qomoo Israa'el hin tahin gara Rabbii deebi'uu isaanii odeeysaa ti, Finiiqee fi Samaariyaa keeysa dabran; oduu tanaaniis amantoota hundumaa fuu gammachuu guddoo dha kannan.
[4] Yerusaaleem hogguu dhufan, waldaya kiristaanaa, ergamootaa fi manguddoo dhaan simataman; warri ergaman kuniis, waan Rabbi isaanii wajji hojjate hundumaa isaanitti himan.
[5] Haa tahuu ammoo, murna Fariisotaa keeysaa amantoonni hangi tokko ka'anii ti, “Dheeyna isaan qabuu fi seera Museen kanne akka eegan isaan ajajuu tu barbaachisa” jedhan.
[6] Tanaaf ergamoonninii fi jaarsoliin dubbii tana laaluuf walitti qabaman.
[7] Wayta dheertuuf eega irratti wal falaman booddee, Phexiroos isaanitti dubbachuuf ol ka'ee ti, “Yaa obboleeyyan koo, Rabbi sabni qomoo Israa'el hin tahin Qoowlii Wangeelaa afaan kiyya irraa dhagayanii haa amananiif jecha, kanaan dura isin keeysaa akka na filate, gaarii gootanii ti beeytu.
[8] Rabbi kan garaa namaa beeku, Ruuhal Qudus nuuf akkuma kannetti, isaaniifiis kannuu dhaan, isaan simachuu isaa ragaa bahee ti jira.
[9] Inni amantii dhaan, qalbii isaanii xaahare malee, nuu fi isaan jiddutti, garaagarummaa hin agarsiifne.
[10] Amma ammoo ba'aa abbootiin teenyaa fi nutiis baadhachuu hin dandayin, gateetii amantootaa irra kaayuu dhaan, maaliif Rabbi fitintu?
[11] Nuti ammoo, ni'imaa Gooftaa Yesuusiin, najaa bahuu keenya ni amananna; isaaniis taanaan akkuma kanatti najaa bahu” jedheeni.
[12] As irratti namoonni hundinuu cal jedhanii ti, Baarnaabaasii fi Phaawulos dhaggeeyfatan; isaan lamaaniis baasaa fi milikkita adda addaa, kanneen Rabbi harka isaanii tiin saba saba Israa'el hin tahin keeysatti hojjate, isaanitti odeeysan.
[13] Isaan dubbii isaanii afaanii hogguu fixaxan, Yaaqoob ol ka'ee, “Yaa obboleeyyan koo, na dhaggeeyfadhaa!
[14] Simoon, Rabbi fedhii isaa tahee, akkamitti dura saba saba Israa'el hin tahin keeysaa, ummata maqaa isaa tiif tahu fudhachuuf akka yaade, nutti himee ti jira.
[15] Kuniis dubbiin nabiyyootaa tan barreeyfamtee jirtu wajjiin wal taha.
[16] ‘Tana booddee niin deebi'a, dukkaana Daawwid kan jigees deebisee tiin ijaara, isa diigamees haareysee niin dhaaba, niin qaceelchaas,
[17] namoonni hafan kaaniis Gooyticha akka barbaadan, sabni addunyaa irraa kanneen maqaa kiyyaan yaamaman hundi niis; Gooytaan kana godhu akkas jedha’
[18] kuniis duruma irraa jalqabee beekamaa dha.
[19] “Kanaaf akka yaada kiyyaatti, warra saba qomoo Israa'el hin tahin kanneen gara Rabbii deebi'an, rakkisuun nu irra hin jiru.
[20] Haa tahu malee ammoo, qalma najisa waaqa tolfamaaf aarsaa dhihaate irraa, zinaa fi ejjummaa irraa, foon baktii tii fi dhiiga irraa hiis akka if lagatan, isaaniif barreeysuu tu nu irra jira.
[21] Eegaa dhaloottan dur irraa jalqabee, warri seera Musee dhaa mandaruma jiru hundumatti lallaban ni jiru turan, manneen sagadaa keeysattiis Sanbata hundumaa ni dubbifama” jedhe.
[22] Dubbii tana booddee ergamoonninii fi jaarsoliin, guutummaa waldaya kiristaanaa tiis, namoota if keeysaa filanii, Phaawulosii fi Baarnaabaas wajjiin Anxookiyaatti erguun, gaarii dha itti fakkaate. Akkasitti Yihudaa, Baarsaabaas jedhamuu fi Siilaas, kanneen amantootaa keeysaa beekamoo turan, filatanii ti ergamoota lamaanii wajjiin ergan.
[23] Ergaan barreeyfamaan isaanitti kannamees, kanatti aanee kan jiruu dha, “Nuti ergamoonninii fi jaarsoliin obboleeyyan keeysan, isin warri saba qomoo Israa'el hin tahin, kanneen magaalaa Anxookiyaa, Sooriyaa fi ammaas Qiliiqiyaa keeysaa, obboleeyyan ruhaanii keenya taataniif, nagaya isiniif dhiheeysina.
[24] Nu keeysaa jarreen tokko bahanii, odoo nuti isaan hin ajajin isin bira dhufanii, dubbii dhaan akka isin cinqan, yaada keeysaniis akka rooraasan dhageenyee ti jirra.
[25] Kanaaf yaada tokko irratti walii gallee, if keeysaa namoota fillee, Baarnaabaasii fi Phaawulos jara jaalatamoota keenyaan wajjiin, gara keeysan erguun gaarii fakkaatee ti nutti mullate.
[26] Akkuma isinuu beeytan, Baarnaabaasii fi Phaawulos warra lubbuu isaanii Gooftaa keenya Yesuus Kiristoosiif dabarsanii kannanii dha.
[27] Akkasitti waanuma isiniif barreeysine sana afaan isaanii tiin ammaas akka isinitti himaniif jecha, Yihudaa fi Siilaasiis isiniif ergine.
[28] Waan barbaachisaa tahan kanneen malee, ba'aa biraa isin irratti fe'uun akka nu irra jirre, Ruuhal Qudusittii fi nuttiis gaarii fakkaatee ti jira.
[29] Isaaniis qalma waaqayyolii tolfamaniif dhihaate irraa, dhiiga irraa, foon baktii irraa, zinaa fi ejjummaa irraa fagaattanii, kana hundumaa irraa, yoo if eeydan gaarii dha; nagayatti jiraadhaa!”
[30] Warri ergamaniis ka'anii ti, Anxookiyaatti gadi bu'an; achitti amantoota hunda walitti qabanii ti, xalayaa tana kannaniif.
[31] Ummanni niis xalayicha dubbisanii, gorsa nama jajjabeeysu irratti hedduu dha gammadan.
[32] Yihudaanii fi Siilaas nabiyyoota warri turaniis, qoowlii hedduun amantoota gorsanii ti, jajjabeeysan.
[33] Achi isaan bira hanga takka eega turan booda, amantoonni jara san nagayaan gara warra isaan erganitti deebisan.
[34] [Siilaas ammoo fedhii isaa tiin achitti hafe.]
[35] Phaawulosii fi Baarnaabaasiis, Anxookiyatti hafanii ti, ammaas warra biraa hedduu wajjiin, Qoowlii Gooftaa dhaa ni barsiisan ni lallabaniisi.
[36] Eega hanga takka achi bubbulanii booddee, Phaawulos, Baarnaabaasiin, “Koottu mee, deebinee mandaroota qoowlii Gooftaa itti lallabne hundumaa dheeynee amantoota haa simannuu; akkaataa amantoonni itti jiraataniis haa ilaalluu!” jedheeni.
[37] Baarnaabaas ammoo, Yohannis Maarqos jedhamu isaanii wajjiin fuudhuu dha barbaade.
[38] Phaawulos ammoo, “Nama kanaan dura Phamfiliyatti nu biraa hafe, kan hojii tanaaf nuu wajjiin hin deemin san if wajji fuunee, deemuun nu irra hin jiru” jedheeni.
[39] Tana irratti isaan lamaan jiddutti falamaan jabduun kaanaan gargar bahan; Baarnaabaas, Maarqos fudhatee ti, markabaan gara Qophroos deeme.
[40] Phaawulos ammoo Siilaas filate, amantoonni eegumsa ni'imaa Rabbitti eega isaan kannatan, booddee karaa dha bu'an.
[41] Phaawulos waldayoota kiristaanaa jajjabeeysaa ti, kutaa biyya Sooriyaa tii fi Qiliiqiyaa keeysa dabre.