[1] Kana booddee ammaas Yesuus Garba Bishaan Xiberiyaas cinaatti haala kanatti barattootatti if mullise.
[2] Simoon Phexiroos, Toomaas kan “Lakkuu” jedhamu, Naatanaa'el kan Qaanaa Galiilaa, ilmaan Zabdewosii fi, barattoonni isaa lama warri biraa tiis wajjiin turan.
[3] Hogguus Simoon Phexiroos, “Ani kalluuna qabuufiin deema” isaaniin jedhe; isaaniis, “Nutiis sii wajjiin deemna” jedhaniin; gad bahanii tiis doonii dha seenan. Halkan san garuu waa takka illee hin qabne.
[4] Bariisaa ganama ammoo, Yesuus qarqara bishaanii dhaabbatee ti ture; barattoonni garuu Yesuus tahuu isaa hin beeyne.
[5] Yesuus hogguus, “Jarana! Kalluuna if biraa hin qabdanii?” isaaniin jedhe; isaan garuu, “Hin qabnu” jedhanii ti deebisaniifi.
[6] Inni ammoo, “Doonicha cinaa gara mirgaa tiin shabaka darbaa tii ni arkattu!” isaaniin jedhe. Isaaniis shabakticha ni darbatan, hoddomina kalluuna irraa kan ka'e shabaka harkisuu dha dadhaban.
[7] Barataan inni Yesuus jaalate ammoo, “Inni Goofticha” jedhee ti Phexiroositti dubbate. Simoon Phexiroos, inni Gooftaa tahuu isaa akkuma dhagayeen, marxoo isaa tan duraan if irraa hiike deebisee marxifatee ti bishaanitti gad utaale.
[8] Barattoonni warri kaaniis doonii keeysa taa'anii ti, shabaka kalluunni guute harkisaa ti dhufan; isaan hanga dhuundhuma dhibba lamaa takka, qarqara bishaan irraa achi hiiqu malee, fagoo hin turre.
[9] Hogguu gara lafaatti bahan ammoo, barbada ibiddaa kan kalluunni irra jiruu fi biddeenaas achitti arkan.
[10] Yesuus, “Kalluuna ammuma qabdan irraa waa fidaa!” isaaniin jedhe.
[11] Kanaaf Simoon Phexiroos doonicha seenee, shabaka kalluunni gurguddaan dhibbaa fi shantamii sadih keeysa guutuu, gara lafaatti harkise; kalluunni hammana hoddomaatu illee garuu, shabakni hin tarsaane.
[12] Yesuus hogguus, “Koottaa tii faxaraa!” isaaniin jedhe. Gooftaa tahuu isaa waan beekaniif jecha, barattoota keeysaa tokko illeen ija jabaatee, “Ati eenyu?” jedhee kan isa gaafate hin turre.
[13] Yesuus dhufee biddeenticha fuudhee ti isaaniif kanne; kalluunaas akkasuma godhe.
[14] Yesuus du'aa eega kaafame booda, tanaan wayta sadeeysaaf barattoota isaatitti if mullisuu isaa ti.
[15] Eega faxara fixan booda Yesuus, Simoon Phexiroosiin, “Simoon, yaa ilma Yohannis! Isaan kanneen caalaa ana ni jaalattaa?” jedheeni; inni ammoo, “Eeyye yaa Gooftaa! Akkaan si jaaladhu atuu ni beeyta” jedheeni. Yesuus deebisee, “Ilmoolee hoolotaa tiyya tiiysi!” jedheeni.
[16] Yesuus lamaddii ammaas, “Simoon, yaa ilma Yohannis, ana jaalattaa?” jedheeni; hogguus inni, “Eeyye yaa Gooftaa! Akkaan si jaaladhu atuu ni beeyta” jedhee ti deebiseef. Yesuus ammaas, “Hoolota kiyya eegi!” jedheeni.
[17] Yesuus sadaffaa ammaas, “Simoon, yaa ilma Yohannis, ana jaalattaa?” jedheeni. Phexiroos ammoo waan inni hoggu sadih, “Ana jaalattaa?” isaan jedheef jecha ni nahe; deebisee tiis ammaas, “Yaa Gooftaa, ati waan hundumaa ni beeyta; akkaan si jaaladhuus atuu ni beeyta” jedheeni; Yesuus ammaas, “Hoolota kiyya tiiysi!” isaan jedhe.
[18] “Dhugumaan siin jedha, ati dargaggeeysa wayta turte ifumaaf mudhii tee hidhattee, gara feete ni deemta turte; hogguu dulloomtu garuu, ati harka kee ni diriirsita, namni biraa tiis mudhii tee siif ni hidha, fuudhee tiis gara ati hin barbaanne si geeysa” isaan jedhe.
[19] Tanaas, Phexiroos du'a akkamiin Rabbiif ulfina kannuuf akka deemu mullisuuf dubbate; achiin booda “Na duukaa bu'i!” isaan jedhe.
[20] Phexiroos if duuba garagalee barataa, kan Yesuus jaalachuu ture sun, isaan duukaa odoo deemuu ti arke; barattuun kun isa kan hiraata irratti gudeeda Yesuusitti irkatee, “Yaa Gooftaa, eenyu inni dabarsee si kannuuf deemu?” jedhee kan gaafatee turee dha.
[21] Phexiroos hogguu isa arke, Yesuusiin, “Yaa Gooftaa, inni kun ammoo akkam taha?” jedheeni.
[22] Yesuus deebisee, “Hammaan ani deebi'ee dhufu akka inni jiraatu yoon fedhe, maaltu si dhibe? Ati anuma duukaa bu'i!” jedheeni.
[23] Achumaan oduun, “Barataan kun hin du'u” jettu obboleeyyan keeysatti odeeyfamte. Yesuus garuu, “Hammaan ani deebi'ee dhufu akka inni jiraatu yoon fedhe, maaltu si dhibe?” jedheeni malee, “Inni hin du'u” hin jenneeni.
[24] Inni dubbii kanaaf ragaa bahu, kan kana hundumaa barreeysees barattuma kana; nutiis akka ragummaan isaa amanamaa tahe ni beeyna.
[25] Kanneen malees, Yesuus waan biraa hedduu dha hojjate; hundi isaanii silaa takka takkaan barreeyfamanii, biiyti addunyaa tuu kitaabota isaan itti barreeyfaman fuudhuuf, kan bakka hin qabne anatti fakkaata.