[1] Адалетсиз къанунларны япкъанларгъа, акъсыз къарарларны чыкъаргъанларгъа беля!
[2] Сиз фукъарелерге адалет къыдырмагъа ёл бермейсинъиз, зулум тюбюнде къалгъан халкъымдан адалет къыдырмакъ акъкъыны тартып аласынъыз, тул къадынларнынъ мулькюни чекип аласынъыз ве оксюзлерни союндырасынъыз.
[3] Рабби джезанен кельгенде, узакътан башынъызгъа беля тюшкенде, не япаджакъсынъыз? Ярдым сорап, кимге ялвараджакъсынъыз? Байлыгъынъызны къайда сакълайджакъсынъыз?
[4] Бель букип, сюргюнликке кетеджексинъиз, ольдюрилип, ерге тюшеджексинъиз. Бундан сонъ да РАББИнинъ гъазабы тынмайджакъ, къолу эп бир узатылгъандыр.
[5] Ашшургъа беля! Оны, таякъны киби, къолумда тутам, ачувымда ве гъазабымда халкъларны джезалайым!
[6] Оны имансыз миллетке, Мени ачувландыргъан халкъкъа къаршы ёллайджагъым; оны бутюнлей чайпамагъа, эр шейини тартып алмагъа, оны, сокъакътаки чамурны киби, таптамагъа буюраджагъым.
[7] Амма Ашшур башкъа ишлерни япмагъа да тюшюнир, башкъа ниетлерининъ артындан кетер, чокъ миллетлерни де гъайып этип, ёкъ этмеге юрегинде истер.
[8] – Башлыкъларымнынъ эписи падишалар киби дегиллерми? – дей.
[9] – Къално ве Къаркемиш, Хамат ве Арпад, Самарие ве Дамаск – манъа эп бир!
[10] Мен чокъ падишалыкъларны енъдим, оларнынъ путлары ве аллалары исе Ерусалимдеки ве Самариедекилерден буюк эдилер.
[11] Ерусалимни де айны ойле енъеджегим, Самариеге ве путларына япкъан шейлеримни онъа да япаджагъым.
[12] Рабби Сион дагъында ве Ерусалимде озь ишини битирген сонъ, Ашшурнынъ падишасыны къопай юреги ве юкъарыдан бакъкъан козьлери ичюн джезалайджакъ.
[13] «Эр шейни къолумнынъ кучюнен яптым, акъыл-идрагъымнен къазандым, – деди падиша. – Мен акъыллым! Халкъларнынъ сынъырларыны ёкъ эттим, хазинелерини тартып алдым, кучьлю бугъа киби, тахтларында отургъанларны йыкътым.
[14] Теректеки къуш ювасыны дайын, халкъларнынъ зенгинликлерини къолай таптым, ювадан йымырта алгъан киби, озюме бутюн топракъларны алдым. Къанат къыбырдаткъан, агъыз ачкъан, “ин” деген кимсе олмады».
[15] Балтанен ишлеген адамгъа къаршы балта котерилип олурмы? Пычкъынен чалышкъан адамнынъ огюнде пычкъы макътанырмы? Таякъ оны котергенни саллармы? Сопа терек олмагъан адамны котерирми?
[16] Шунынъ ичюн Рабби, Ордуларнынъ РАББИси, Ашшурнынъ кучьлю аскерлерини такъаттан тюшюрген хасталыкъкъа огъратаджакъ, онынъ шурети, атештен киби, янып битеджек.
[17] Исраильнинъ Ярыгъы – атеш, онынъ Азизи – алев оладжакъ. Бир кунь ичинде Ашшурнынъ тикенли чалыларыны ве кийик отларыны якъып битиреджек,
[18] шуретли орманыны ве багъчасыны бутюнлей ёкъ этеджек; падиша озю олюм алдындаки хаста киби оладжакъ.
[19] Орманда къалгъан тереклери о къадар аз оладжакъ ки, уфакъ бала биле оларны сайып оладжакъ.
[20] О куню сагъ къалгъан исраиллилер, Якъупнынъ къуртулгъан эвлятлары, оларны ургъангъа таянмайджакъ, амма РАББИге, Исраильнинъ Азизине, джан-юректен ишанаджакълар.
[21] Сагъ къалгъанлар къайтаджакъ, Якъупнынъ къуртулгъан эвлятлары Кучьлю Аллагъа ялвараджакълар.
[22] Эй, Исраиль! Халкъынъ денъиз къуму къадар чокъ олса да, Аллагъа тек бир къач адам къайтаджакъ! Къырылувынъ эвельден язылгъан, адалет эр тарафлама даркъалгъан.
[23] Ордуларнынъ РАББИ-ТААЛЯсы бутюн ер юзюнде эвельден тайинленген къырылувны толусынен этеджек.
[24] Шунынъ ичюн Ордуларнынъ РАББИ-ТААЛЯсы бойле дей: – Эй, Сионда яшагъан халкъым! Ашшурдан къоркъманъыз! О, эвельден Мысыр киби, сени таякънен урар, сопасыны санъа къаршы котерир.
[25] Якъынларда гъазабым ятышаджакъ, ачувнен Ашшурны ёкъ этеджегим.
[26] Цур-Оревде мидьянлыларны ургъаны киби, Ордуларнынъ РАББИси Ашшурны да къамчынен ураджакъ. Мысырда япкъаны киби, О, буюк сувлар устюнден таягъыны котереджек.
[27] О куню омузларынъыздаки юк, бойнунъыздаки боюндырыкъ тюшеджек. Семиргенинъиз ичюн боюндырыгъынъыз къырыладжакъ.
[28] Олар Айят шеэрине кельдилер, Мигрондан кечтилер, Микмаста аш-сув запасларыны къалдырдылар.
[29] Озенни кечтилер, Гевада геджеледилер. Рама шеэри къоркъудан къалтырады, Шаулнынъ Гива шеэринде яшагъанлар къачты.
[30] Эй, Гъаллим халкъы, сесинъни котерип увулда! Эй, Лайша халкъы, динъле! Бичаре Анатот халкъы!
[31] Мадмена халкъы чапып кетти, Гевим халкъы къачмагъа ашыкъты.
[32] Бир кунь Нов шеэринде къалып, Сион дагъына, Ерусалим тёпелигине юмрукъ саллайджакъ.
[33] Мына, Рабби, Ордуларнынъ РАББИси дешетли кучюнен терек пытакъларыны къопараджакъ, узун бойлу тереклерни балталайджакъ, юкъары котерильгенлерни ерге йыкътыраджакъ,
[34] сыкъ орманларны демирнен кеседжек. Къудретли Алланынъ огюнде Ливан йыкъыладжакъ.