[1] او واخت رب منه بله ددی: «بؤیوک بئر لؤوحه گؤتور و اوستونده آیدین حرفلرله یاز: مَهِر شَلال خاشبَز.
[2] کاهئن اورئیا ائله یِبِرِکیا اوغلو زَکَریانی اؤزومه اِعتئبارلی شاهئد سِچه‌جیم.»
[3] سونرا من نَبئیّه ائله یاخینلیق اتدئم و او بویلو اولوب بئر اوغلان دوغدو. رب منه ددی: «اونون آدینی مَهِر شَلال خاشبَز قوی.
[4] چونکی کؤرپه ”آتام، آنام“ دِمه‌یی اؤیرَنمه‌دن، دَمَشقئن ثروتی و سامئره‌نئن قنئمتی آشور پادشاهینا آپاریلاجاق.»
[5] رب منئمله گئنه دانیشیب بله ددی:
[6] «بو خالق ساکئت آخان شئلواَخ سولارینی ردّ ادئب، رِصئنله رِمَلیانین اوغلونا مِیل سالدیقلارینا گؤره،
[7] باخ، پروردئگار، فَراتین جوشان قودرتلی سولارینی، یعنی آشور پادشاهی و اونون قووّتئنی بو خالقین اوستونه گتئره‌جک. بو سولار اؤز یاتاقلاریندان یوخاری قالخاراق آشیب داشاجاق.
[8] بو سولار یهودانی بورویوب باساجاق، اؤلکه‌نئن بوغازینا قدر چاتاجاق. قانادلارینین آچیلیشی سنئن اؤلکه‌نی باشدان-باشا اؤرته‌جک، ای عئمانواِل!»
[9] قیریلین، ای خالقلار، دارماداغین اولون! ای یِر اوزونون بوتون اوزاق اؤلکه‌لری، اِشئدئن! دؤیوشه حاضیرلاشین و دارماداغین اولون! بلی، دؤیوشه حاضیرلاشین و دارماداغین اولون!
[10] بئرلئکده مصلحتله‌شئن، لاکئن بوشا چیخاجاق؛ ائسته‌دئیئنئز قدر دانیشین، آمّا هچ بئر سؤز دوغرو اولمایاجاق، چونکی تاری بئزئمله‌دئر.
[11] رب گوجلو بئر قووّتله منئمله دانیشیب امر اتدی کی، بو خالقین توتدوغو یوللا گتمه‌یئم. و ددی:
[12] «دِمَیه‌جکسئنئز: بو دسئسه‌دئر! بوتون او شیلر حاقّیندا کی، بو خالق اونو دسئسه چاغیریر. اونلارین قورخدوقلاریندان قورخمایین، لرزه‌یه گلمه‌یئن.
[13] قوشونلار ربّئنی موقدّس سایمالی‌سینیز، سئزئن قورخونوز او اولاجاق، سئزئن لرزه‌‌نئز او اولاجاق!
[14] او، موقدّس مکان اولاجاق، آمّا ائسرایئلئن ائکی پادشاهلیغینا ییخان داش و بودره‌مه قایاسی، اورشلئم ساکئنلرئنه تله و تور اولاجاق.
[15] بئر چوخلاری بودره‌یه‌جکلر، ییخیلیب قیریلاجاقلار، تله‌یه دوشوب اسئر آپاریلاجاقلار.»
[16] شهادتی ساخلا، تعلئمی شاگئردلرئم آراسیندا مؤهورله!
[17] یعقوب نسلئندن اوزونو گئزله‌دن ربّی گؤزلَیه‌جیم؛ اونا اومئدله باخاجاغام.
[18] باخ، من و ربّئن منه وردئیی اؤولادلار، ائسرایئلده قوشونلار ربّئنئن نئشانه‌لر و عجایئبلرئیئک، او رب کی، صحیون داغیندا ساکئندئر.
[19] سئزه بعضی آداملار دئیَنده کی، «پیچیلداییب میرتیلدایان جئندارلارلا، روح‌چاغیرانلارلا مصلحتله‌شئن»، اونلارا بله جاواب ورئن: «مگر خالق اؤز تاریسیندان مصلحت آلمامالی‌دیر؟ دئرئلر باره‌سئنده مگر اؤلولردن مصلحت آلارلار؟»
[20] تارینین تعلئمئنه و شهادتئنه دؤنمَک گرک! اگر اونلار تارینین کلامی موطابئقئنه دانیشماسالار، اونلار اوچون نور شفقی ساچمایاجاق.
[21] اونلار چاره‌سئز و آج قالیب، اؤلکه‌نی دولانیب گَزه‌جکلر. آج قالاندا قضبلَنه‌جکلر، یوخارییا باخارکن پادشاهلارینی و اؤزلرئنئن تاریسینی لعنتلَیه‌جکلر.
[22] سونرا یِره نظر سالاجاقلار، و باخ، سیخینتیدان، قارانلیقدان، و قورخونج پرئشانلیقدان باشقا هچ بئر شی گؤرمه‌یه‌جکلر. قالین ظولمته آتیلاجاقلار.