[1] ای ساحئل‌لر، منی اِشئدئن! ای اوزاقدا یاشایان خالقلار، قولاق آسین! رب منی آنا بطنئندن چاغیردی، آنامین قارنیندان منه آد قویدو.
[2] آغزیمی ائتی قیلینج کئمی ادئب، اَلئنئن کؤلگه‌سی آلتیندا منی گئزلَدئب، او منی سِچمه اوخ دا ادئب اؤز اوخدانیندا ساخلاییب.
[3] او منه بویوردو: «قولومسان، ای ائسرایئل، من سنده شؤوکتئمی گؤرسده‌جیم.»
[4] آمّا من ددئم: «من بوش یِره چالیشمیشام، گوجومو هدر یِره تؤکموشم. لاکئن حله ده حاقّیم اولان عدالت، ربله‌دئر، اَجرئم تاریملا‌دیر.»
[5] و ائندی رب بویورور، او رب کی، منه آنا بطنئنده قورولوش وردی کی، اونون قولو اولوم، یعقوب نسلئنی اونا طرف قایتاریم، اِله کی، ائسرایئلی اونون حوضورونا ییغیلسین. چونکی من ربّئن گؤزونده حؤرمت قازانمیشام، و قودرتئم تاریمدیر.
[6] او دیئر: «یعقوب قبئله‌لرئنئن برپاسی اوچون، ائسرایئلئن صاغ قالانلارینین گری قاییتماسی اوچون، قولوم اولماغین چوخ کئچئک بئر شی دئر. من سنی مئلّتلره نور دا اده‌جیم کی، خئلاصیم دونیانین لاپ اوزاق یِرلرئنه یاییلسین.»
[7] ائسرایئلی ساتین آلان و اونون موقدّسی اولان رب آداملارین حقارتله باخدیغی شخصه، مئلّتئن نئفرت اتدئیی، و حؤکمدارلارین قولو اولان شخصه بله دیئر: «پادشاهلار گؤروب قالخاجاقلار، امئرلر ده تعظئم اده‌جکلر، چونکی ائسرایئلئن موقدّسی، وفالی رب سنی سِچئبدئر.»
[8] رب بله دیئر: «موناسئب واختدا سنه جاواب ورمئشم، خئلاص گونو سنه کؤمک اتمئشم؛ سنی حئفظ اده‌جیم. سنی خالقیم اوچون عهد اده‌جیم کی، داغیلمیش اؤلکه‌نی برپا اده‌سن، ائرث اولاراق گئنه صاحئبلرئنه وره‌سن.
[9] محبوسلارا دیئن: ”چیخین“، ظولمتده اوتورانلارا دیئن: ”اؤزونوزو گؤرسه‌دئن!“ اونلار یول بویونجا قوزو کئمی بَسلَنه‌جکلر، هر چیلپاق تپه‌ده اوتلاق تاپاجاقلار.
[10] اونلار نه آج، نه ده سوسوز قالاجاقلار، قیزمار ائستی و گونش اونلاری وورمایاجاق. چونکی اونلارا مرحمتلی اولان یول گؤرسده‌جک، اونلاری بولاقلارا طرف هئدایت اده‌جک.
[11] من بوتون داغلاریمی یولا دؤندَره‌جیم، یوللاریمی هامار اده‌جیم.
[12] باخ، خالقیم اوزاق یِرلردن، کئمی شئمالدان، کئمی قربدن، کئمی ده سئنئم اؤلکه‌سئندن گله‌جک.»
[13] شادلیقدان هارای چکئن، ای گؤیلر! ای یِر اوزو، فَرَحلَن! ای داغلار، شادلیق نئدالارینا قوشولون! چونکی رب خالقینا تسلّی ورئب، ذلئل اولانلارینا رحم اده‌جک.
[14] آمّا صحیون ددی: «رب منی ترک ادئب، پروردئگاریم منی یاددان چیخاردیب.»
[15] آمّا رب دیئر: «آنا مگر سود اَمن کؤرپه‌سئنی یاددان چیخاردار؟ بطنئندن چیخان اوغلونا مگر رحمسئز اولار؟ آنا اؤز کؤرپه‌سئنی یاددان چیخارتسا بِله، من سنی اصلا یاددان چیخارتمارام.
[16] باخ، من سنئن آدینی اوووجلاریمدا حَکّ اتمئشم، دووارلارین همئشه گؤزومون قاباغیمدادیر.
[17] اوغوللارین تَلَسئب یانینا گله‌جکلر، سنی وئران اِدنلر، سنی قارت ادنلر چیخیب-گده‌جکلر.
[18] قالدیر باشینی، باخ اطرافینا: اونلارین هامیسی ییغیلیب یانینا گلئرلر. رب اعلان ادئر: من رب وارلیغیما آند ائچئرم کی، اونلارین هامیسی سنئن اوچون بَر-بَزَک اولاجاق، بئر گلئن کئمی اونلاری تاخاجاقسان!
[19] خارابالیغا، وئرانه‌لئیه دؤنموشدون، اؤلکَن یِرله بئر اولموشدو. آمّا ائندی بو تورپاق ساکئنلرئن اوچون دار اولاجاق، سنی خارابا قویانلار سندن اوزاقدا دوراجاقلار.
[20] سنئن اسئرلئکده دوغولموش اؤولادلارین سَسئنی اوجالدیب بله دئیه‌جکلر: ”بو یِر بئزئم اوچون دار گلئر، یاشاماق اوچون بئزه یِر ور.“
[21] او واخت سن قلبئنده دئیه‌جکسن: ”آخی بونلاری منئم اوچون کئم دوغدو؟ چونکی اؤولادلاریمی ائتئرمئشم، سونسوزام، اسئر و سرگردانام. بس بونلاری کئم بؤیودوب؟ باخ، من تک-تنها قالمیشدیم، بس بونلار هارادان گلئب-چیخدی؟“»
[22] پروردئگار رب بله دیئر: «باخ، من اَلئمی مئلّتلره قالدیراجاغام، بایراغیمی خالقلارا قالدیراجاغام. اونلار سنئن اوغوللارینی قوجاغیندا، قیزلارینی چئیئنلرئنده گتئره‌جکلر.
[23] پادشاهلار سنه آتالیق، ملکه‌لر سنه آنالیق اده‌جکلر. اوزو اوسته یِره سَرئلئب سنه سجده اده‌جکلر، آیاقلارینین توزونو یالایاجاقلار. او واخت بئله‌جکسن کی، من ربّم، منه بِل باغلایانلار اوتانمایاجاقلار.»
[24] مگر گوجلونون اَلئندن قنئمت آلینا بئلر؟ قدّارین اَلئندن اسئرلر قورتولا بئلر؟
[25] آمّا رب بله دیئر: «بلی، گوجلونون اَلئندن اسئرلر ده آلیناجاق، قدّارین اَلئندن قنئمت ده گؤتوروله‌جک، سنئنله چکئشنله من چکئشه‌جیم، سنئن اؤولادلارینی من قورتاراجاغام.
[26] سنه ظولم ادنلره اؤز اَتلرئنی یِدئرده‌جیم، اؤز قانلاری ائله مست اولوب شئرئن شراب ائچَنلرئن حالینا دوشه‌جکلر. بله‌جه بوتون بشر بئله‌جک کی، سنی قورتاران رب، منم. سنی ساتین آلان، یعقوبون قودرتلی تاریسی، منم.»