[1] رب دیئر: «ساکئت اولون حوضورومدا، ای ساحئللر! قوی خالقلار تزه گوج آلسینلار، قوی یاخینلاشسینلار، قوی دانیشسینلار، قوی حؤکم اوچون بئرلئکده ییغیشاق.
[2] کئم شرقدن او آدامی قالدیردی؟ کئم اونو صالحلئکده خئدمت اوچون چاغیردی؟ مئلّتلری اونون ائختئیارینا قویور، پادشاهلاری موطئع ادئر. او اؤز قیلینجی ائله اونلاری تورپاغین توزونا چِوئرئر، کامانی ائله گؤیه سوورولان سامانا دؤندَ‌رئر.
[3] او اونلاری تعقئب ادئر، آیاقلارینی باسمادیغی یولدان صاغ-سالامات کچئر.
[4] بونلاری کئم ادئب، کئم تاماملاییب؟ ازلدن بَری نسئل‌لری چاغیران کئمدئر؟ من، رب، بئرئنجئیَم و آخیرینکیلارلا دا من اولاجاغام.»
[5] ساحئللر بونو گؤروب قورخورلار، دونیانین اوجقار یِرلری لرزه‌یه دوشور. اونلار یاخینلاشیرلار، گلئبلر،
[6] هر کس قونشوسونا کؤمک ادئر، قارداشینا «جسور اول!» دیئر.
[7] صَنَتگَر زرگری اورَکلَندئرئر، دمئری چکوجلا دوزله‌یَن، سندانی وورانا اورَک ورئر، «لَحئم یاخشی اولدو» دیئر. میخلاری بَرکئدئر، اِله کی، بوت یِرئندن لاخلاماسین.
[8] لاکئن سن، ای قولوم ائسرایئل، سِچدئیئم یعقوب نسلی، دوستوم ائبراهئمئن اؤولادلاری!
[9] سنی دونیانین اوجقار یِرلرئندن ییغمیشام، لاپ اوزاق یِرلردن سَسله‌مئشم، دمئشم: «سن منئم قولومسان، سنی سِچمئشم، ردّ اتمه‌مئشم.»
[10] قورخما، چونکی من سنئنله‌یم، دهشته گلمه، چونکی تارین منم. سنی قووّتلَندئره‌جیم، سنه دوغرودان کؤمک اده‌جیم. صالح صاغ اَلئمله دوغرودان سنی توتاجاغام.
[11] باخ، سنه حئرصلَنَنلرئن هامیسی خجالت چکئب بی‌آبیر اولاجاقلار، سنه ضئدّ چیخانلار هِچه چیخیب تلف اولاجاقلار.
[12] سنئنله ساواشانلاری آختاراجاقسان، آمّا تاپا بئلمیه‌جکسن، سنئنله ووروشانلار هچ اولاجاقلار، تاپیلمایاجاقلار.
[13] چونکی تارین رب منم، او کی، سنئن صاغ اَلئندن توتوب او کی، سنه «قورخما، سنه کؤمک اده‌جیم» دیئر.
[14] ای تورپاق قوردو اولان یعقوب نسلی، ای ائسرایئل اَهلی، قورخما! رب اعلان ادئر: «سنه کؤمک اده‌جیم.» سنی ساتین آلیب قورتاران ائسرایئلئن موقدّسی‌دئر.
[15] باخ، سنی تزه، دئشلری ائتی، خرمن دؤیه‌نی اتمئشم. سن داغلاری دؤیوب اَزه‌جکسن، تپه‌لری سامان چؤپو کئمی سوووراجاقسان.
[16] سن اونلاری سوووراجاقسان، یِل ده اونلاری آپاراجاق، طوفان اونلاری داغیداجاق، آمّا سن ربده سِوئنه‌جکسن، ائسرایئلئن موقدّسی ائله فخر اده‌جکسن.
[17] مظلوملار و مؤحتاجلار سو آختاریرلار، آمّا تاپمیرلار، دئل‌لری سوسوزلوقدان قورویور. من، رب، اونلارا جاواب وره‌جیم. من، ائسرایئلئن تاریسی، اونلاری ترک اتمیه‌جیم.
[18] لوت تپه‌لرئن باشیندا چایلار آچاجاغام، دره‌لرئن اورتاسیندا سو بولاقلاری آچاجاغام. صحرانی گؤلمَچه‌یه، قوراق تورپاغی سو چشمه‌لرئنه چِوئره‌جیم.
[19] صحرادا سئدر آغاجی، اَقاقئیا، مَرسئن و زیتون آغاجی اَکه‌جیم. قورو تورپاقدا شام، چئنار و سرو آغاجینی بئرلئکده سالاجاغام.
[20] اِله کی، ائنسانلار گؤروب بئلسئنلر، فئکئرله‌شئب باشا دوشسونلر کی، بونو ادن ربّئن اَلئدئر، بونو یارادان ائسرایئلئن موقدّسی‌دئر.
[21] رب دیئر: «داعوانیزی آچین، لاپ قووّتلی موباحئثه‌‌لرئنئزی ادئن.» بونو یعقوبون پادشاهی دیئر.
[22] بوتلرئنئزی گتئرئن و قوی اونلار نه اولاجاغینی بئزه بئلدئرسئنلر، اولوب کِچَنلری بئزه نقل اتسئنلر، اِله کی، اونلاری درئندن دوشونوب آخیرینی اؤیره‌نَک. و یا گله‌جیی بئزه خبر ورسئنلر.
[23] ای بوتلر، بوندان سونرا باش ورن حادئثه‌لردن بئزه دانیشین، اِله کی، سئزئن تاری اولدوغونوزو بئلک! دوغرودان دا یاخشیلیق یا دا پئسلئک ادئن کی، هامیمیز قورخوب واهئمه‌یه دوشَک.
[24] باخ، سئز هِچنه‌سئنئز، عمل‌لرئنئز ده هِچدئر. سئزی سِچَن ائیرنجدئر!
[25] شئمالدان بئرئنی قالدیرمیشام و گلئب؛ او، گونشئن چیخدیغی یردن آدیمی چیغیراجاق. کوزه‌گر گئلی تاپدالایان کئمی، او، حؤکمدارلاری پالچیق کئمی تاپدالایاجاق.
[26] کئم بونو باشلانیشدان اعلان ادئب کی، بئز بئلک، یا دا قاباقکی زامانلاردان کی، بئز «او حاقلی‌دیر» دئیک؟ قطعن بونو اعلان ادن یوخ ائدی، قطعن بونو بئلدئرن یوخ ائدی، قطعن سؤزلرئنئزی اشئدن ده یوخ ائدی.
[27] من قاباقلار صحیونا «باخ گلئرلر» ددئم. اورشلئمه «موژده گتئره‌نی گؤندَ‌رئرم» ددئم.
[28] لاکئن باخدیغیم زامان، هچ کئم یوخدور، آرالاریندا هچ مصلحت ورن یوخدور کی، سوروشدوغومدا جاواب وره‌بئلسئن.
[29] باخ، هامیسی دَیَرسئزدئرلر، اتدئکلری ائشلر ده هِچدئر، ائنسانلارین تؤکمه بوتلری فقط یِلدئر، بوشلوقدور.