[1] صحرا و قورو تورپاق سِوئنه‌جک، چؤل شادلاناجاق، نرگئس کئمی چئچکلَنه‌جک.
[2] هر یان گول آچاجاق، شادلاناجاق، سِوئنجدن نغمه اوخویاجاق. لوبنانین شؤوکتی، کَرمِل و شارونون جاه-جلالی اونا ورئله‌جک. ائنسانلار ربّئن عئزّتئنی، تاریمیزین عظمتئنی گؤره‌جکلر.
[3] ضعئف اَل‌لره قووّت ورئن، اَسن دئزلری مؤحکملَندئرئن.
[4] اورَکلرئنده قورخانلارا دیئن: «جسارتله‌نئن، قورخمایین! باخ، تارینیز ائنتئقام آلماق اوچون گلئر، قئصاص آلماق اوچون گلئر. او گلئب سئزه قورتولوش وره‌جک!»
[5] او واخت کورلارین گؤزلری آچیلاجاق، کارلارین قولاقلاری آچیلاجاق،
[6] او واخت آخساقلار مارال کئمی آتیلیب دوشه‌جکلر، لال‌لارین دئلی شادلیقلا نغمه اوخویاجاق، چونکی صحرادا بولاقلار فیشقیراجاق، قورو تورپاقدا چایلار آخاجاق.
[7] قیزغین قوم حوووضا، سوسوز تورپاق سو بولاقلارینا چِورئله‌جک. چاقّاللارین راحاتلادیغی یِرلرده، اوت، قامیش و بوتا بئته‌جک.
[8] اورادا بئر یول اولاجاق، بؤیوک بئر طرئق؛ او یول «موقدّسلئک یولو» آدلاناجاق. نجئس آدام اورادان کچمیه‌جک، او یول، او آدام اوچوندور کی، ربّئن یولو ائله گِدئر. او یولدا یِرئیَنلر، حتّا آغیلسیز دا اولسالار، یولونو اصلا آزمایاجاقلار.
[9] اورادا شئرلر اولمایاجاق، ییرتیجی حیوانلار او یولا چیخمایاجاقلار، بونلار اورادا تاپیلمایاجاقلار. آنجاق قورتولوش تاپانلار او یوللا گده‌جکلر.
[10] ربّئن ساتین آلینمیش آداملاری قاییداجاق، سِوئنجله نغمه اوخویاراق صحیونا گله‌جک. باشلاریندا ابدی شَنلئک اولاجاق، اونلار سِوئنج و شادلیق تاپاجاقلار، کَدَر و قَم-قوصّه یوخ اولاجاق!