[1] بئزئم خبرئمئزه کئم ائنانیب، ربّئن گوجو کئمه آشکار اولوب؟
[2] او، ربّئن حوضوروندا بئر بوداق کئمی، قورو تورپاقدا بئتَن کؤک کئمی بؤیودو. اونون نه گؤرونوشو، نه عظمتی وار ائدی کی، اونا گؤز دئکَک. نه گؤزل‌لئیی وار ائدی کی، اونو آرزو اِدَک.
[3] ائنسانلار طرفئندن تحقئر اولوندو، ردّ اولوندو، او قوصّه‌لر آدام ائدی، عذابین نه اولدوغونو بئلئردی، ائنسانلارین اوز چِوئردئیی بئری کئمی خور گؤرولدو. بئز اونا دَیَر ورمه‌دئک.
[4] اصلئنده ناخوشلوقلاریمیزی او چکدی، قوصّه‌لرئمئزی اؤزو داشیدی. بئز آمّا اونون تاری طرفئندن جزالاندیریلدیغینی، تاری طرفئندن وورولوب ذلئل اولدوغونو ظنّ اتدئک.
[5] لاکئن بئزئم تقصئرلرئمئزه گؤره اونون بدنی دِشئلدی، شر عمل‌لرئمئز اوزوندن او اَزئلدی، رئفاهیمیز اوچون گرکلی اولان جزا اونا ورئلدی، و اونون یارالاری ائله بئز شفا تاپیریق.
[6] هامیمیز قویون کئمی یولو آزمیشدیق، هر بئرئمئز اؤز یولوموزلا گِدئردئک. لاکئن رب هامیمیزین شر عمل‌لرئنئن یوکونو اونون اوستونه قویدو.
[7] اونا ظولم اتدئلر، اونو ذلئل اتدئلر. آمّا گئنه ده آغزینی آچمادی. کَسئلمیه آپاریلان قوزو کئمی، قویون قیرخانلارین قاباغیندا، دئلسئز-آغیزسیز قویون کئمی آغزینی آچمادی.
[8] عدالتسئزلئکله محکوم اولوناراق اؤلومه آپاریلدی. اونون نسلی حاقّیندا کئم دوشوندو کی، خالقیمین عاصئلئیئنه گؤره، او اعدام اولوندو، دئرئلرئن اؤلکه‌سی آراسیندان آتیلدی.
[9] هچ بئر قدّارلیق اتمه‌دئیی حالدا، آغزیندان حئیله‌لی سؤز چیخمادیغی حالدا، اونا پئس آداملارین یانیندا قبئر ورئلدی، آمّا اؤلدویونده دؤولَتلی بئر آدامین یانیندا ائدی.
[10] آمّا رب اونون اَزئلمه‌سئنه، اونون عذاب چکمه‌سئنه مایئل اولدو. اؤز جا‌نینی تقصئر قوربانی تقدئم اتدئکده، او، اؤز نسلئنی گؤره‌جک، عؤمرونو اوزاداجاق، و ربّئن خوش ائسته‌یی اونون اَلی ائله اوغور تاپاجاق.
[11] چکدئیی مَشَقّتئن نتئجه‌سئنی گؤروب خوشنود اولاجاق، منئم قولوم، او صالح اولان، اؤز بئلئیی ائله چوخلارینا برائت قازاندیراجاق، اونلارین شر عمل‌لرئنئن یوکونو اوستونه گؤتوره‌جکدئر.
[12] بونا گؤره من اونا بؤیوک آداملارین آراسیندا پای وره‌جیم. او، قنئمتی گوجلولرله بؤله‌جک. چونکی او، جا‌نینی فدا اتدی، تقصئرکار اولانلارلا بئر ساییلدی؛ آمّا گئنه ده چوخ آداملارین گوناهینی اوستونه گؤتوردو، تقصئرکارلار اوچون شفاعت اتدی.