[1] ای بوتون سوسوزلامیشلار، گلئن سولار یانینا! ای پولو اولمایانلار، گلئن، آلین و ییئن! گلئن، شرابی و سودو پولسوز آلین، عوضسئز آلین!
[2] نه اوچون پولونوزو چؤرک اولمایان شیلره، قازاندیغینیزی سئزی دویدورمایان شیلره خَرجله‌یئرسئنئز؟ منی دئقّتله اِشئدئن، یاخشی اولانی ییئن، جانینیز بوللوقدان لذّت آپارسین.
[3] قولاق آسین، منئم یانیما گلئن، قولاق آسین کی، یاشایاسینیز. من داوودا گؤرستدئیئم صادئق مرحمتلره موطابئق، سئزئنله ابدی بئر عهد باغلایاجاغام!
[4] باخ، من اونو خالقلارا شاهئد اتمئشم، خالقلارا باشچی و حؤکمدار قویموشام.
[5] باخ، تانیمادیغینیز بئر مئلّتی چاغیراجاقسینیز. تارینیز ربّه گؤره، ائسرایئلئن موقدّسئندن اؤتری، سئزی تانیمایان مئلّت قاچا-قاچا یانینیزا گله‌جک. چونکی رب سئزه عئزّت ورئب.
[6] تاپماق فورصتی اولارکن ربّی آختارین، او یاخین ائکن اونو چاغیرین.
[7] قوی پئس آدام اؤز یولونو، شر آدام اؤز فئکئرلرئنی بوراخسین. قوی ربّه ساری دؤنسون و اوندان شَفقَت آلاجاق. قوی بئزئم تاریمیزین طرفئنه دؤنسون، چونکی بول-بول باغیشلاناجاق.
[8] «چونکی منئم فئکئرلرئم سئزئن فئکئرلرئنئز دیئل، سئزئن یوللارینیز دا منئم یوللاریم دیئل.» رب بویورور.
[9] «چونکی گؤیلر یر اوزوندن نه قدر اوجادیر، منئم یوللاریم دا سئزئن یوللارینیزدان، منئم فئکئرلرئم ده سئزئن فئکئرلرئنئزدن او قدر اوجادیر.
[10] نجه گؤیدن یاغان یاغیش و قار تورپاغی سولامادان، یری محصولدار ادئب اَکئن بئتمه‌دن، اَکئنچئیه توخوم، یئیه‌نه چؤرک ورمه‌دن گؤیلره قاییتمیر،
[11] آغزیمدان چیخان کلمه ده بله‌دئر: بوش یِره یانیما قاییتماز، ائسته‌دئیئمی یرئنه یتئرمه‌یئنجه، اونو گؤندَردئیئم ائشی باشا چاتدیرمایینجا یانیما قاییتماز.
[12] سِوئنجله چیخاجاقسینیز، باریشلا موشایئعت اولوناجاقسینیز، داغلار و تپه‌لر قاباغینیزدا شادلیقلا اوخویاجاق، چؤلده‌کی بوتون آغاجلار اَل چالاجاق.
[13] تئکانلی بوتا عوضئنه شام آغاجی، قانقال عوضئنه مَرسئن آغاجی بئته‌جک. بو، رب اوچون یادئگار اولاجاق، پوزولمایان ابدی بئر علامت اولاجاق.»