[1] تارینیز دیئر: «تسلّی ورئن خالقیما، تسلّی ورئن!
[2] اورشلئمه سؤزلر دانیشین! اونا دیئن کی، اسئرلئک دؤورون باشا چاتیب، تقصئرلرئنئن جزاسی ورئلئب، بوتون گوناهلارینا گؤره ربّئن اَلئندن ائکی‌قات جزا آلیب.»
[3] بئر نفرئن نئدا سَسی گلئر: «صحرادا ربّئن یولونو حاضیرلایین، چؤلده تاریمیزین کچه‌جیی یِرلری هامار ادئن.
[4] قوی هر دره اوجالدیلسین، هر داغ و تپه آشاغی اِندئرئلسئن، قوی یولداکی اَیرئلئکلر دوزَ‌لسئن، کَله-کؤتور یِرلر هامار ادئلسئن.
[5] او واخت ربّئن شؤوکتی آشکار اولوناجاق، بوتون بشر بونو بئرلئکده گؤره‌جک. چونکی ربّئن آغزی دانیشیب.»
[6] سَس دیئر: «نئدا ات!» جاواب وردی: «نه‌یی نئدا اِدئم؟» «بوتون بشر اوتا بَنزه‌ر، اونلارین بوتون گؤزل‌لئیی چؤل چئچه‌یی کئمئدئر.
[7] رَب، نفسئنی اونلارین اوستونه اوفوره‌نده، اوت قورویار، چئچک سولار، حقئقتن، بو خالق اوتا اوخشار.
[8] اوت قورویار، چئچک سولار، آمّا تاریمیزین سؤزو ابده کئمی قالار.»
[9] ای صحیون، یاخشی خبرلری موژده گتئرن، اوجا داغا چیخ! ای اورشلئم، یاخشی خبرلری موژده گتئرن، اوجالت سَسئنی، جار چک، قالدیر سَسئنی، قورخما. یهودا شهرلرئنه دِه: «بودور تارینیز!»
[10] باخ، پروردئگار رب قودرتله گله‌جک، او، قودرتله حؤکم سوره‌جک، باخ، پاداشی اونونلادیر، غرامتی قاباغیندادیر.
[11] او اؤز سوروسونو چوبان کئمی اوتاراجاق، قوزولاری قوجاغینا آلاجاق، باغریندا داشییاجاق، اَمزئکلی‌لری یاواش سوره‌جک.
[12] کئم دهنزلری اووجو ائله، گؤیلری ده قاریشی ائله اؤلچوب؟ یِرئن تورپاغینی اؤلچو ائله، داغلاری قاپانلا، تپه‌لری ده تَره‌زی ائله چکئب؟
[13] ربّئن روحونو کئم هئدایت ادئب؟ یا دا کئم اونا مصلحتچئسی اولاراق، مصلحت ورئب؟
[14] او کئمدن مصلحت آلیب و کئم اونا فهم ورئب؟ کئم اونا عدالت یولونو گؤرسه‌دئب، معرئفت اؤیرَدئب؟ کئمدئر اونا فهم یولونو آنلادان؟
[15] باخ، مئلّتلر وِدره‌ده بئر دامجی سو کئمئدئر، تَره‌زئده توز ذرّه‌سی کئمی ساییلار، باخ، جزئره‌لری ده توز کئمی گؤیه سووورور.
[16] قوربانلاری یاندیرماق اوچون لوبنان مِشه‌سی کئفایت دیئل، یاندیرما قوربانلار اوچون اوراداکی حیوانلار بس دیئل.
[17] ربّئن قاباغیندا بوتون مئلّتلر هچ بئر شیدئر، هچ بئر شیدن ده آشاغی‌دیر، هچ نه‌یه دَیمَز.
[18] بس اوندا تارینی کئمه بَنزه‌ده‌جکسن؟ اونو نه‌یه اوخشاداجاقسان؟
[19] لاکئن بوته باخ، بئر صَنَتگَر اونو تؤکور، اوستونو زرگر قیزیللا اؤرتور، گوموش زنجئرلرله ده اونو بَزه‌یئر!
[20] بله تقدئمی گتئره بئلمه‌یَن یوخسول آدام چورومه‌یَن بئر آغاج سِچئر، اؤزونه اوستا بئر صَنَتگَر تاپیر کی، یِرئنده مؤحکم دوران بئر بوت دوزَلتسئن.
[21] مگر بئلمئرسئنئز؟ مگر اشئتمه‌یئبسئنئز؟ مگر باشلانیشدان بَری بونو سئزه بئلدئرمه‌یئبلر؟ دونیانین بونؤوره‌سی قویولدوقدان بَری مگر بونو درک اتمه‌یئبسئنئز؟
[22] ربدئر کی، یِر قوبّه‌سئنئن یوخاریسیندا اوتورور، یِر اوزونده یاشایانلار چَیئرتکه کئمئدئرلر. گؤیلری پرده کئمی آچیر، اونلاری یاشاماق اوچون چارداق کئمی آچیر.
[23] ربدئر کی، اَمئرلری هچ ادئر، دونیانین حؤکمدارلارینی هِچه اِندئرئر.
[24] اونلار تزه اَکئلمئش، تزه سَپئلمئش، و تزه کؤک سالمیشدیلار، گؤوده‌لری تزه‌جه کؤک سالمیش آغاجلارا بَنزه‌ر. ربّئن نفسی اونلاری قورودار، طوفان اونلاری سامان چؤپو کئمی سووورار.
[25] «بس منی اوندا کئمه بَنزه‌دئرسئنئز کی، من اونا تای اولوم؟» دیئر موقدّس اولان.
[26] باشینیزی گؤیلره قالدیرین، گؤرون بو اولدوزلاری کئم یارادیب؟ او کی، اونلارین فوجلارینی سیرایا دوزوب چیخاردیر، اونلارین هامیسینی آدلاری ائله چاغیریر. قودرتئنئن عظمتئنه گؤره، گوجونون قودرتئنه گؤره، اونلاردان هچ بئری ده اَسکئک اولماز.
[27] ای یعقوب نسلی، ای ائسرایئل، نه اوچون دیئرسن: «رب باشیما گلنلری گؤرمور، تاریم منئم حاقّیم اولان ائنصافی گؤزوندن قاچیردیر؟»
[28] مگر سن بئلمئرسن؟ مگر اشئتمه‌یئبسن؟ ابدی تاری، رب، بوتون دونیانی یارادان، نه یورولور، نه ده طاقتدن دوشور، اونون آغلی درک ادئلمَزدئر.
[29] او، یورغونلارا گوج وِرَر، طاقتسئزلرئن قووّتئنی آرتیرار.
[30] حتّا جاوانلار یورولارلار، طاقتدن دوشَرلر، ائگئدلر ده ییخیلارلار.
[31] لاکئن ربّه اومئد باغلایانلار تزه قووّت آلارلار، قاناد آچیب قارتال کئمی اوجالارا اوچارلار، قاچاندا طاقتدن دوشمَزلر، یول گدئب یورولمازلار.