[1] ای صالحلئیی آختارانلار، ربّی آختارانلار، منی اِشئدئن! یونولدوغونوز قایایا، چیخاریلدیغینیز چوخورون درئنلئیئنه باخین.
[2] آتانیز ائبراهئمه، دردله سئزی دوغان سارایا باخین! چاغیردیغیمدا تَک بئر کئشی ائدی او، سونرا اونا برکت وردئم، نسلئنی آرتیردیم.
[3] دوغرودان دا رب صحیونا تسلّی وره‌جک اونون بوتون خارابالیقلارینا تسلّی وره‌جک. صحرالارینی عدنه، چؤل‌لرئنی ربّئن باغینا دؤندَره‌جک. اورادا سِوئنج و شادلیق تاپیلاجاق، شوکورلر، نغمه‌لر اوخوناجاق.
[4] ای منئم خالقیم، منه قولاق آسین، ای منئم مئلّتئم، منی اِشئدئن! چونکی قانون مندن چیخاجاق، عدالتئمی نور کئمی خالقلارا احسان اده‌جیم.
[5] صالحلئیئم یاخیندیر، قورتولوشوم گلئر، منئم قولوم خالقلاری موحاکئمه اده‌جک. ساحئل‌نشئن خالقلار منی گؤزلَیه‌جکلر، منئم قولوما تَوَقّعله اومئد باغلایاجاقلار.
[6] باشینیزی قالدیریب گؤیلره نظر سالین، سونرا آشاغی‌یا، یِر اوزونه باخین. چونکی گؤیلر توستو کئمی داغیلاجاق، یر اوزو پالتار کئمی کؤهنَله‌جک. یِر اوزونون ساکئنلری مئلچک کئمی قیریلاجاقلار. لاکئن منئم خئلاصیم همئشه‌لئک اولاجاق، صالحلئیئمئن آخیری اولمایاجاق.
[7] ای صالحلئکدن خبردار اولانلار، قانونومو قلبلرئنده ساخلایان خالق، منه قولاق آسین! آداملارین مزمّتئندن قورخمایین، اونلارین سؤیوشلرئندن دهشته دوشمه‌یئن.
[8] چونکی گووه اونلاری پالتار کئمی یئیه‌جک، قورد اونلاری یون کئمی یئیه‌جک. لاکئن منئم صالحلئیئم همئشه‌لئک اولاجاق، قورتولوشوم نسئل‌لر بویو دوراجاقدیر.
[9] اویان، اویان، گوجلَن، ای ربّئن قولو! قدئم زامانلارداکی کئمی اویان، اوّلکی نسئللرئن واختیندا اولدوغو کئمی! سن رَحَبی پارچا-پارچا اتمه‌دئن مگر؟ سو اژداهاسینی تئکه-تئکه اتمه‌دئن مگر؟
[10] دهنزی، درئن سولاری قورودان سن دیئلدئن مگر؟ ساتین آلینان خالقین کچمه‌سئندن اؤتری دهنزئن درئنلئکلرئنی یولا چِوئرَن سن دیئلدئن مگر؟
[11] ربّئن ساتین آلینمیش آداملاری قاییداجاق، سِوئنجله نغمه اوخویاراق صحیونا گله‌جک. باشلاریندا ابدی شادلیق اولاجاق، اونلار سِوئنج و شَنلئک تاپاجاقلار، کدر و قم-قوصّه یوخ اولاجاق.
[12] رب دیئر: «سئزه تسلّی ورن منم، بلی منم. سئز کئمسئنئز کی، فانی ائنساندان قورخورسونوز؟ اوت کئمی سولان بشر اوغلوندان؟
[13] سئزی یارادان، گؤیلری سَرَن، دونیانین پایالارینی قویان ربّی نجه یاددان چیخاردیبسینیز کی، ظالئمئن قضبئندن بوتون گون دایانمادان قورخورسونوز، او ظالئم کی، اؤزونو سئزی محو اتمک اوچون حاضیرلاییر؟ بس هانی ظالئمئن قضبی؟
[14] ذلئل‌لر تزلئکله آزاد اولاجاقلار، سئاهچالدا اؤلمه‌یه‌جکلر، چؤرکلری ده اَسکئک اولمایاجاق.
[15] چونکی تارینیز رب منم. دهنزی گور شپه‌لرله چالخالایان منم. اونون آدی قوشونلار ربّی‌دئر.
[16] من سؤزلرئمی سنئن آغزینا قویموشام و اَلئمئن کؤلگه‌سئنده سنی گئزلَتمئشم کی، گؤیلری قوروم، دونیانین پایالارینی قویوم، و صحیونا ”خالقیم سنسن“ دِیئم.»
[17] دور آیاغا، دور آیاغا، قالخ، ای اورشلئم! ای سن کی ربّئن اَلئندن قضب پئیالاسینی آلیب ائچدئن. کِفلی‌لئک کاساسینی آخیرا قدر بوشالتدین.
[18] دوغدوغون بوتون اوغوللاردان سنه یول گؤرسه‌دن اولمادی، بؤیوتدویون بوتون اوغوللاردان سنه دایاق اولان اولمادی.
[19] بو ائکی بلا سنئن باشینا گلئب؛ سنه کئم یاس توتاجاق؟ هلاکت، داغینتی، قیتلیق و قیلینج! سنه نجه تسلّی ورئم؟
[20] اؤولادلارین طاقتدن دوشوب، ربّئن قضبی، تارینین مزمّتی اوستلرئنده‌دئر. اونلار تله‌یه دوشموش بئر غزال کئمی چاره‌سئز هر کوچه باشیندا اوزانیبلار.
[21] بونا گؤره ده، ای ذلئل اولموش اورشلئم، ای شرابسیز مست، بونو اشئت!
[22] پروردئگارین رب، اؤز خالقینی مودافئعه ادن تارین بله دیئر: «باخ، کِفلی‌لئک پئیالاسینی اَلئندن آلمیشام. قضبئمئن کاساسیندان آرتیق ائچمیه‌جکسن.
[23] بو کاسانی سنه ظولم ادنلرئن اَلئنه وره‌جیم. اونلارین اَلئنه کی، سنه دیئبلر: ”یِره اوزان کی، اوستوندن کِچک.“ سن ده آرخانی یِر کئمی، یول کئمی ادئردئن کی، کچسئنلر.»