[1] پادشاه خئزقئیا بونو اشئدنده پالتارینی جیردی و چولا بورونوب ربّئن معبدئنه گئردی.
[2] سونرا سارای ریئسی اِلیاقئمی، مئرزه شِبنانی و کاهئنلرئن آغساقّال‌لارینی چولا بورونموش حالدا آموص اوغلو پیغمبر اِشَعیانین یانینا گؤندَ‌ردی.
[3] اونلار اِشَعیایا ددئلر: «خئزقئیا بله دیئر: ”بو گون دارلیق، تحقئر و روسوایچیلیق گونودور، چونکی اوشاقلارین دوغولما واختی چاتیب، آنجاق دوغماغا گوج یوخدور.
[4] بلکه سنئن تارین رب رَبشاقِه‌نئن سؤزلرئنی اِشئدَر، او آدامین سؤزلرئنی کی، اونون آغاسی آشور پادشاهی اونو گؤندَ‌رئب کی، یاشایان تارینی تحقئر اتسئن. بلکه تارین رب، اشئتدئیی سؤزلری توبئخ اِدَر؛ اونا گؤره ده قالانلار اوچون دوعا ات.“»
[5] بله‌جه خئزقئیا پادشاهین نؤکرلری اِشَعیانین یانینا گلنده
[6] اِشَعیا اونلارا ددی: «آغانیزا دیئن کی، رب بله دیئر: ”اشئتدئیئن آشور پادشاهینین نؤکرلرئنئن سؤزلرئندن کی، اونونلا منه کوفر اتدئلر، قورخما.
[7] باخ، من اونون ائچئنه اِله بئر روح قویاجاغام کی، بئر خبر اشئدئب اؤز اؤلکه‌سئنه قاییداجاق و اؤز اؤلکه‌سئنده اونو قیلینجلا اؤلدورتدوره‌جیم.“»
[8] رَبشاقِه گری قاییدیب آشور پادشاهینین لئبنا اوستونه هوجوم اتدئیئنی گؤردو. چونکی لاکئشدن پادشاهین گری چکئلدئیئنی اشئتمئشدی.
[9] آشور پادشاهینا خبر چاتدی کی، «کوش پادشاهی تئرحاقا سنئن اوستونه ووروشماغا گلئب.» او بونو اشئدنده خئزقئیانین یانینا قاصئدلر گؤندَ‌رئب ددی:
[10] «یهودا پادشاهی خئزقئیایا بله دیئن: ”قویما بِل باغلادیغین تارین سنی آلدادیب دسئن: اورشلئم آشور پادشاهین اَلئنه ورئلمه‌یه‌جک.“
[11] باخ، اشئدئبسن کی، آشور پادشاهلاری بوتون اؤلکه‌لره نه ادئبلر، اونلاری نجه وئران ادئبلر. مگر سن قورتولا بئله‌جکسن؟
[12] آتالاریمین محو اتدئکلری مئلّتلرئن حتّا گوزانین، خارانین، رِصِفئن و تِلَسّاردا اولان عِدِنلی‌لرئن آللاهلاری اونلاری مگر قورتاردیلار؟
[13] هانی خَمات پادشاهی، اَرپاد پادشاهی، لاعئرئن، سِفَروَیئمئن پادشاهی، هِنَعئن و عئوّانین پادشاهی؟»
[14] خئزقئیا مکتوبو قاصئدلرئن اَلئندن آلیب اوخودو. او، ربّئن معبدئنه قالخیب مکتوبو ربّئن قاباغیندا یِره سَردی.
[15] خئزقئیا ربّه دوعا ادئب ددی:
[16] «ای کَرّوبلار اوستونه اوتوران قوشونلار ربّی اولان ائسرایئلئن تاریسی! بوتون دونیا پادشاهلیقلارینین تاریسی آنجاق سنسن. گؤیو و یری سن یارادیبسان.
[17] یارب، قولاق ور و اشئت. گؤزلرئنی آچ و گؤر، یارب. سَنخِرئبئن بوتون سؤزلرئنه قولاق آس کی، وار اولان تارییا کوفر اتمک اوچون گؤندَ‌رئب.
[18] یارب، دوغرودور؛ آشور پادشاهلاری بوتون اؤلکه‌لری و اونلارین تورپاقلارینی محو ادئبلر.
[19] آللاهلارینی اودا آتدیلار. چونکی اونلار تاری دیئلدئلر، ائنسانلار اونلاری آغاج و داشدان دوزَلتمئشدئلر. اونا گؤره ده آرادان گتدئلر.
[20] ائندی، ای تاریمیز رب، یالواریرام، بئزی اونون اَلئندن قورتار و بوتون دونیا پادشاهلیقلاری بئلسئنلر کی، رب آنجاق سنسن»
[21] او واخت آموص اوغلو اِشَعیا خئزقئیایا خبر گؤندَ‌رئب ددی: «ائسرایئلئن تاریسی رب بله دیئر: ”آشور پادشاهی سَنخِرئب باره‌ده منه دوعا اتدئن.“
[22] اونون ضئدّئنه ربّئن ددئیی سؤز بودور: ”باکئره صحیون قیزی سنه خور باخیب لاغ ادئر، اورشلئم قیزی سنئن آرخانجا باشینی تَرپه‌دئب.
[23] کئمی سؤیوب کوفر ادئبسن؟ کئمئن ضئدّئنه سَسئنی قالدیریبسان؟ کئمه لووغالیقلا باخیبسان؟ ائسرایئلئن موقدّسئنه!
[24] قاصئدلرئنئن واسئطه‌سی‌ائله ربّی تحقئر ادئبسن، دیئبسن: چوخلو دؤیوش عارابالاریملا داغلارین زئروه‌سئنه، لوبنانین لاپ اوزاق یِرلرئنه چیخدیم. اوجا سئدر آغاجلارینی، گؤزل شام آغاجلارینی کَسدئم، اوزاق تپه‌لرئنه، ثمره‌لی مِشه‌لرئنه گئردئم.
[25] قویو قازدیم و سولارینی ائچدئم، مئصئرئن بوتون چایلارینی آیاغیمین دابانی ائله قوروتدوم.
[26] مگر اشئتمه‌یئبسن کی، من چوخدان بو ائشی حاضیرلادیم، قدئمدن بَری اونون نقشه‌سئنی چکدئم. ائندی یرئنه یتئرمئشم کی، سن قالالی شهرلری وئرانه‌لئیه چِوئره‌سن.
[27] بونا گؤره بو شهرلرئن ساکئنلری ضعئفله‌دئلر، هراسا، خجالته دوشدولر. یِتئشمه‌مئشدن یاندیریلان چؤل اوتو کئمی، گؤیَرتی کئمی، دامدا بؤیومه‌دن یانیب گِدن اوت کئمی اولدولار.
[28] سنئن اوتوروشونو، گئرئشئنی-چیخیشینی، منئم ضئدّئمه اولان حئدّتئنی بئلئرم.
[29] منئم ضئدّئمه حئدّتلَندئیئنه گؤره، لووغالیغین قولاغیما چاتدیغینا گؤره، حالقامی بورنونا و جئلووومو آغزینا تاخاجاغام، سنی گلدئیئن یوللا گری قایتاراجاغام.
[30] سنئن اوچون علامت بو اولاجاق! بو ائل و گلن ائل اؤزو یِتئشَن بارینی ییئن، آمّا اوچونجو ائل اَکئن ادئن، بئچئن ادئن، اوزوم باغلاری سالیب اونلارین بهره‌سئنی ییئن.
[31] یهودا نسلئندن خئلاص اولوب قالانلار، گئنه آشاغی‌یا طرف کؤک سالاجاقلار، یوخارییا طرف بهره وره‌جکلر.
[32] چونکی قالانلار اورشلئمدن، خئلاص اولانلار صحیون داغیندان چیخاجاقلار. قوشونلار ربّئنئن قِیرتی بونو اده‌جک.“
[33] بونا گؤره رب آشور پادشاهی باره‌ده بله دیئر: ”او بو شهره گئرمیه‌جک، اورایا اوخ آتمایاجاق، موقابئلئنه قالخانلا چیخمایاجاق، قاباغیندا تورپاق قالاغی قورمایاجاق.
[34] آنجاق گلدئیی یوللا گری قاییداجاق، و بو شهره گئرمیه‌جکدئر.“ رب بله بویورور.
[35] ”من بو شهری اؤزوم اوچون، قولوم داوودون خاطئرئنه قورویوب خئلاص اده‌جیم.“»
[36] ربّئن مَله‌یی چیخیب آشور اوردوگاهیندا یوز هشتاد بش مئن نفری قیردی. سحر اِرکَن قالخیب گؤردولر کی، اونلارین هامیسی اؤلدورولوب.
[37] آشور پادشاهی سَنخِرئب گری چکئلئب گتدی و نِینَوادا قالدی.
[38] او اؤز آللاهی نئسروکون معبدئنده پرستئش اِدَرکَن، اوغوللاری اَدرَم‌مِلِکله شَرِ‌سِر اونو قیلینجلا اؤلدوردولر و آرارات اؤلکه‌سئنه قاچدیلار. سَنخِرئبئن یرئنه اوغلو اِسَرخَدّون پادشاه اولدو.