[1] قالخ، ائشیقلان، چونکی نورون گلئب، ربّئن شؤوکتی سنئن اوستونه ساچیر!
[2] باخ، دونیانی قارانلیق، خالقلاری ظولمت بورویه‌جک. آمّا رب سنئن اوستونه نور ساچاجاق، شؤوکتی سنی اَحاطه اده‌جک.
[3] مئلّتلر سنئن نورونا، پادشاهلار اوستونه چؤکَن آیدینلیغا طرف گله‌جکلر.
[4] قالدیر باشینی، باخ اطرافینا، اونلارین هامیسی ییغیلیب یانینا گلئرلر! اوغوللارین اوزاقدان گله‌جک، قیزلارین قوجاقدا گتئرئله‌جک.
[5] او واخت بونو گؤروب اوزون نور ساچاجاق، اوره‌یئن سِوئنجدن تِز-تِز چیرپیناجاق. چونکی دهنزئن وار-دؤولتی سنه گتئرئله‌جک، مئلّتلرئن ثروتی سنه گله‌جک.
[6] دَوه سورولری، مئدیانین، عِیفانین جمّازلاری تورپاقلارینی دولدوراجاق. بوتون شِبا خالقی گلئب قیزیل و کوندور گتئره‌جک، و ربّئن حمدلرئنئن خوش خبرئنی اعلان اده‌جک.
[7] قِدارین بوتون سورولری سنئن یانینا ییغیلاجاق، نِبایوتون قوچلاری سنه خئدمت اده‌جک، قوربانگاهیمدا منه مقبول اولان قوربانلار اولاجاقلار، و من عئزّتلی اِوئمی داها دا عئزّتلَندئره‌جیم.
[8] کئمدئر بونلار کی، بولود کئمی، یووالارینا یاخینلاشان گؤیرچئن کئمی اوچوب گلئرلر؟
[9] قطعن ساحئل‌‌لر منه اومئد باغلایاجاقلار؛ تَرشئش گَمئلری اوّل گله‌جکلر کی، سنئن اؤولادلارینی قیزیل و گوموشلری ائله اوزاقدان گتئرسئنلر؛ تارین ربّئن آدی اوچون، سنی عئزّتلَندئرَن ائسرایئلئن موقدّسی اوچون.
[10] اجنبئلر دووارلارینی تئکه‌جکلر، پادشاهلاری سنه خئدمت اده‌جکلر. چونکی قضبئمده سنی ووردوم، و لوطفومده سنه شَفقَت گؤرسدمئشم.
[11] دروازالارین همئشه آچیق قالاجاق، نه گجه، نه ده گوندوز قیفیل‌لاناجاق کی، مئلّتلرئن ثروتی سنه تقدئم اولسون، پادشاهلاری یانینا گتئرئلسئن.
[12] چونکی سنه خئدمت اتمک ائستمه‌ین مئلّت و یا سلطنت محو اولاجاق، بلی، او مئلّتلر کامئل یوخ اولاجاقلار.
[13] شام آغاجی، چئنار و سرو آغاجلاری کی، لوبنانین شان-شؤهرتی‌دئر، سنه گتئرئله‌جک کی، موقدّس مکانیمداکی یری گؤزل‌لَشدئرسئن، و آیاق قویدوغوم یری شؤوکتلَندئرئم.
[14] سنی ذلئل ادنلرئن اؤولادلاری گلئب قاباغیندا تعظئم اده‌جکلر. سنه حقارتله باخانلارین هامیسی آیاقلارینا دوشوب سنه سجده اده‌جکلر. سنه ربّئن شهری، ائسرایئلئن موقدّسئنئن صحیونو دئیه‌جکلر.
[15] گرچی سنی ترک ادئب سندن نئفرت اتدئلر، یانیندان هچ کئم کچمئردی، آمّا ائندی من سنی ابدی بئر فخر، نسئل‌لر بویو بئر شادلیق اده‌جیم.
[16] مئلّتلر و پادشاهلار بئر آنا کئمی سنه سود وره‌جکلر. او واخت بئله‌جکسن کی، من سنی قورتاران ربّم، سنی ساتین آلان، یعقوبون قودرتلی تاریسی.
[17] سنه بورونج عوضئنه قیزیل، دمئر یرئنه گوموش، آغاج یرئنه بورونج، داش عوضئنه دمئر گتئره‌جیم. اَمئن-آمانلیغی حؤکمدارین، صالحلئیی ده باشچیلارین تعیئن اده‌جیم.
[18] سنئن تورپاغیندا بئر داها قدّارلیق اِشئدئلمیه‌جک، سرحدلرئنئن آراسیندا هلاکت و وئرانه‌لئک خبری اولمایاجاق. دووارلارینی «خئلاص»، دروازالارینی دا «حمد» آدلاندیراجاقسان.
[19] آرتیق گوندوز گونش ائشیغین اولمایاجاق، گجه آی سنه آیدینلیق ورمه‌یه‌جک. چونکی رب ابدی نورون، تارین دا سنئن شؤوکتئن اولاجاق.
[20] گونشئن بئر داها باتمایاجاق، آیین گئزلَنمیه‌جک، چونکی رب ابدی نورون اولاجاق، سنئن یاسلی گونلرئن قورتاراجاق.
[21] او واخت بوتون خالقین صالح اولاجاق، تورپاغی همئشه‌لئک مولک آلاجاقلار. اونلار اَکدئیئم بوداقدیر، اَلئمئن ائشی کی، اونونلا عئزّتله‌نئم.
[22] لاپ کئچئک عایئله‌دن بؤیوک نسئل عمله گله‌جک، آز سایلی نسئل قودرتلی مئلّت اولاجاق. من رب بونو اؤز واختیندا تِز اده‌جیم.