[1] او گون یهودا دئیاریندا بله نغمه اوخوناجاق: «قووّتلی شهرئمئز وار، تاری شهرئن اَمئن-آمانلیغی اوچون دووارلار و سنگرلر قورور.
[2] آچین شهرئن دروازالارینی، قویون وفالی قالان او صالح مئلّت ائچه‌ری گئرسئن.
[3] دوشونجه‌لرئنده پایدار اولان آداملارا، سن کامئل باریش ورئرسن، چونکی اونلار سنه بِل باغلاییرلار.
[4] ربّه همئشه بِل باغلایین، چونکی رب تاریدا، ابدی قایامیز وار.
[5] چونکی او، یوخاری یِرلرده اوتورانلاری، اَل چاتمایان شهری آلچالدیب؛ اونو آلچالدیر، یِرله بئر ادئر، تورپاغا دؤندَ‌رئر.
[6] او شهر آیاق آلتیندا تاپدالاناجاق؛ مظلوملارین آیاقلاری آلتیندا، یوخسول‌لارین قدملری آلتیندا تاپدالاناجاق.
[7] صالح آدامین یولو هاماردیر؛ ای دوروست اولان تاری، صالح آدامین یولونو هامار ات.
[8] دوغرودان دا، یارب، سنئن حؤکملرئنئن یولوندا، بئز سنه اومئد باغلاییریق، سنئن آدین، حتّا سنئن خاطئرَن جانیمیزین ائسته‌یی‌دئر.
[9] قلبئم گجه سنئن اوچون حسرت چکئر، دوغرودان دا، روحوم ائچئمده جهدله سنی آختاریر. حؤکملرئن یِر اوزونده حیاتا کچدئکجه، دونیانین ساکئنلری صالحلئیی اؤیره‌نئر.
[10] پئس آداما رحم ادئلسه ده، او، صالحلئیی اؤیرَنمئر، دوغرولوق اؤلکه‌سئنده حاقسیزلیق ادئر، ربّئن عظمتئنی گؤرمور.
[11] یارب، اَلئنی قالدیریبسان، لاکئن اونلار بونو گؤرمورلر. اؤز خالقین اوچون گؤرستدئیئن قیرتی گؤروب اوتانیرلار. دوغرودان دا، سنئن دوشمنلرئنی اود اوداجاق.
[12] یارب، بئزه باریش ورن سنسن، اونا گؤره کی، بوتون ائشلرئمئزی سن بئزئم اوچون عمله گتئرئبسن.
[13] ای تاریمیز رب، سندن باشقا آغالار اوستوموزده حاکئم اولوبلار، لاکئن بئز فقط سنئن آدینی ائقرار ادئرئک.
[14] اؤلولر یاشامایاجاقلار، آیریلمیش روحلار قالخمایاجاقلار، چونکی سن اونلاری جزالاندیریبسان، محو ادئبسن، اونلار حاقّیندا هر بئر خاطئره‌نی یوخ ادئبسن.
[15] آمّا سن بو مئلّتی چوخالدیبسان، یارب! بو مئلّتی چوخالدیبسان، سن شؤوکتلی‌سن. هر طرفه اؤلکه‌نئن سرحدلرئنی گِنئشلَندئرئبسن.»
[16] یارب، اونلار بلایا دوشَنده سنی آختاردیلار. آنجاق یاواشجا بئر دوعا اده بئلردئلر، سنئن تَنبِهئن اونلارین اوستونده ائدی.
[17] حامئله آرواد دوغوش واختینا یاخینلاشاندا، آغری چکئب قوورولاراق نجه قیشقیرار، بئز ده سنئن حوضوروندا اِله ائدئک، یارب!
[18] بئز ده سانکی بویلو ائدئک، قوورولاراق آغری چکئردئک، لاکئن یِلدن باشقا بئر شی دوغمادیق. دونیایا قورتولوش گتئره بئلمه‌دئک، دونیا ساکئنلرئنی حیاتا چاتدیرا بئلمه‌دئک.
[19] آمّا سنئن اؤلولرئن یاشایاجاق، بدنلری دئرئله‌جک. ای تورپاق آلتیندا یاتانلار، اویانین، سِوئنج نغمه‌سئنی اوخویون، چونکی سنئن شِحئن سحر شِحئنه بنزه‌یئر، تورپاق آیریلمیش روحلاری دئرچَلده‌جک.
[20] ای خالقیم، گلئن، گئرئن اوتاقلارینیزا، قاپیلاری آرخانیزدان اؤرتون، ربّئن قیضی کِچَنه‌جک، قیسا بئر زامان گئزله‌نئن!
[21] چونکی باخ، رب یِر اوزونون ساکئنلرئنی، قباحتلری اوزوندن جزالاندیرماق اوچون، اؤز مسکنئندن گلئر. یِر اوتدوغو قانی اوزه چیخارداجاق، اؤلدورولَنلری آرتیق گئزلَتمیه‌جک.