[1] مئصئر باره‌ده ائخطار: باخ، رب سورعتله گِدن بولودون اوستونه مئنئب مئصئره گلئر. مئصئر بوتلری اونون قاباغیندا تئتره‌‌یه‌جک، مئصئرلی‌لرئن اورَکلری ائچلرئنده اَرئیه‌جک.
[2] رب دیئر: «من مئصئرلی‌لری مئصئرلی‌لرئن ضئدّئنه قالدیراجاغام، قارداش قارداشلا، قونشو قونشو ائله، شهر شهرله، اؤلکه اؤلکه ائله ووروشاجاق.
[3] او واخت مئصئرلی‌لرئن اورَکلری ائچلرئنده اوزوله‌جک؛ نئیّتلرئنی بوشا چیخارداجاغام. اِله کی، اونلار بوتلردن، اؤلولرئن روحلاریندان، جئندارلاردان، روح‌چاغیرانلاردان مصلحت ائستیه‌جکلر.
[4] بوندان علاوه، مئصئرلی‌لری قدّار بئر آغایا تسلئم اده‌جیم، قووّتلی بئر پادشاه اوستلرئنده حؤکم سوره‌جکدئر.» قوشونلارین رب تاریسی بله اعلان ادئر.
[5] نئلئن سولاری آزالاجاق، چای چکئلئب قورویاجاق.
[6] کانال‌لاری ائیلَنه‌جک، مئصئرئن آرخلاری بوشالیب قورویاجاق، قامیشلار و قارغیلار چورویه‌جک.
[7] نئل کناریندا، چایین قیراغینداکی قارغیلار، نئل بویونجا اَکئلمئش زَمئلر قورویاجاق، سوورولوب یوخ اولاجاق.
[8] بالیقچیلار یاس توتاجاقلار، نئله تئلوو آتانلارین هامیسی آغلایاجاقلار، سویا تور آتانلارین هامیسینی قوصّه بورویه‌جک،
[9] بوندان علاوه، نازئک کتان اوستونده ائشله‌یَنلر، آغ بِز توخویانلار اومئدلرئنی ائتئره‌جکلر.
[10] مئصئرئن سوتونلاری قیریلاجاق، بوتون موزدلو ائشچئلر روحدان دوشه‌جک.
[11] صوعَن شهرئنئن باشچیلاری نجه ده آخماقدیرلار! فئرعونون حئکمتلی مصلحت ورنلرئنئن مصلحتی آخماقلیقدیر. سئز نجه فئرعونا دئیه بئلرسئنئز: «من حئکمتلی‌لرئن، قدئم پادشاهلارین نسلئنده‌نَم!؟»
[12] بس سنئن حئکمتلی آداملارین هارادادیر؟ قوی سنه بئلدئرسئنلر، قوی آنلاسینلار کی، قوشونلار ربّی مئصئرئن ضئدّئنه نه حاضیرلاییب.
[13] صوعَنئن باشچیلاری آخماق اولوبلار، نوف ریئسلری آلدانیبلار، مئصئر قبئله‌لرئنئن باشچیلاری، مئصئری یولدان آزدیریبلار.
[14] رب گئجلئک روحونو مئصئرئن ائچئنه قاتیب. اونلار مئصئری، بوتون اتدئکلرئنده آزدیریبلار، بئر کِفلی کئمی کی، اؤز قوسدوغونون اطرافیندا هِل‌له‌نئر.
[15] مئصئرده هچ کئم هچ بئر ائش گؤره بئلمه‌یه‌جک: نه باش، نه قویروق و نه خورما بوداغی، نه ده قامیش.
[16] او گون مئصئرلی‌لر آروادلارا بَنزه‌یه‌جکلر و قوشونلار ربّئنئن اونلارین ضئدّئنه قالخان اَلئنئن قاباغیندا تئتره‌یئب دهشته گله‌جکلر.
[17] یهودا تورپاغی مئصئرلی‌لری دهشته گتئره‌جک. قوشونلار ربّئن مئصئرئن ضئدّئنه حاضیرلادیغی نئیّته گؤره، یهودانین آدینی اشئدن هر کس ولوله‌یه دوشه‌جک.
[18] او گون مئصئرده بش شهر اولاجاق کی، کَنَعان دئلئنده دانیشیب قوشونلار ربّئن آدینا آند ائچه‌جک؛ اونلارین بئری هلاک شهری چاغیریلاجاق.
[19] او گون مئصئر اؤلکه‌سئنئن اورتاسیندا ربّه بئر قوربانگاه قورولاجاق، سرحدئنده ده اونا سوتون تئکئله‌جک.
[20] بو، مئصئر تورپاغیندا قوشونلار ربّئن علامتی و شهادتی اولاجاق؛ چونکی اونلار ظالئملردن قورتولماق اوچون ربّه فریاد اده‌جکلر. و او، مئصئرلی‌لره بئر قورتاریجی و قهرمان گؤندَ‌رئب اونلاری قورتاراجاق.
[21] بله‌جه رب اؤزونو مئصئرلی‌لره تانیتدیراجاق، اونلار دا او گون ربّی تانییاجاقلار. مئصئرلی‌لر ربّه قوربانلار و تقدئملرله پرستئش اده‌جکلر، ربّه نذر-نئیاز ادئب، یرئنه یتئره‌جکلر.
[22] رب مئصئرلی‌لری ووراجاق و سونرا شفا وره‌جک. بله‌جه اونلار ربّه طرف دؤنه‌جکلر. رب اونلارین یالواریشینا جاواب وره‌جک و اونلاری صاغالداجاق.
[23] او گون مئصئردن آشورا بؤیوک بئر یول اولاجاق. آشورلولار مئصئره، مئصئرلی‌لر ده آشورا گدئب گله‌جکلر. مئصئرلی‌لرله آشورلولار بئرلئکده پرستئش اده‌جکلر
[24] او گون ائسرایئل مئصئر و آشورون یانیندا اوچونجو اؤلکه اولاجاق. اونلار یِرئن اورتاسیندا برکت اولاجاقلار.
[25] قوشونلار ربّی اونلارا برکت ورئب دئیَر: «خالقیم مئصئر، یاراتدیغیم آشور، ائرثئم ائسرایئل برکتلی اولسون.»