[1] یارب، سن منئم تاریمسان، سنی اوجالداجاغام، سنئن آدینا حمدلر اوخویاجاغام. چونکی سن قدئمدن بری مؤجوزه‌لرئنی، نئیّتلرئنی کامئل وفادارلیقلا حیاتا کچئردئبسن.
[2] چونکی سن شهری بئر داش ییغینینا، ائستِحکاملی شهری خارابالیغا دؤندَ‌رئبسن. او شهر یاد اِللی‌لرئن سارانی ائدی، اوندان اثر-علامت قالماییب، او بئر داها برپا اولونماز.
[3] بونا گؤره قووّتلی خالقلار سنی عئزّتلَندئره‌جک. قدّار مئلّتلره منصوب شهرلر سندن قورخاجاق.
[4] چونکی سن یوخسولا سیغیناجاق، سیخینتی ائچئنده اولان مؤحتاجا پناهگاه، طوفان واختی چارداق، ائستئلئک واختی کؤلگه‌لئک اولوبسان. چونکی قدّارلارین نفسی دووارا چارپان طوفان کئمئدئر.
[5] یاد اللی‌لرئن نعره‌سئنی چؤل سیجاغی کئمی باسدیریرسان؛ بولودون کؤلگه‌سی، سیجاغی نجه قیریر، قدّار آداملارین نغمه سَسلری اِله قیریلیر.
[6] بو داغدا قوشونلارین ربّی بوتون خالقلار اوچون لذئذ ضئیافت قوراجاق؛ یاغلی یمکلردن، گؤزل شرابلاردان عئبارت ضئیافت وره‌جک، اورادا لاپ لذئذ یمکلر، لاپ دادلی شرابلار اولاجاق.
[7] بو داغدا بوتون خالقلارین اوستونده‌کی اؤرتویو، بوتون مئلّتلرئن اوستونه سَرئلَن توخونما اؤرتویو گؤتوره‌جک.
[8] اؤلومو ابدی اولاراق یوخ اده‌جک، پروردئگار رب بوتون آداملارین اوزوندن گؤز یاشلارینی سئله‌جک، بوتون یر اوزوندن خالقینین روسوایچیلیغینی گؤتوره‌جک. چونکی رب بله دیئب.
[9] او گون دئیه‌جکلر: «باخ، بودور بئزئم تاریمیز کی، نئجاتیمیز اوچون اونا اومئد باغلامیشیق، بودور او رب کی، اونا اومئد باغلامیشیق؛ گلئن، سِوئنَک و بئزه ورن نئجاتیندا شادلیق اِدَک!»
[10] ربّئن اَلی بو داغین اوستونده قالاجاق، آمّا موآب پِیئنلئیه دوشَن سامان کئمی تاپداق آلتیندا قالاجاق.
[11] نجه بئر اوزَن، اوزَرکَن، اَل-قول آتیر، موآب دا پِیئنلئکده اِله اَل-قول آتاجاق، آمّا رب موآبین تکبّورونو اَللرئنئن فَندگئرلئیی ائله بئرلئکده آلچالداجاق.
[12] او، سنئن ائستِحکاملارینی، اوجا دووارلارینی یِره اِندئره‌جک، داغیدیب یِرله بئر اده‌جک.