ወንጌል ማቴዎስ 7
[1] -
[2] ብዝፈረድኩምዎ ፍርዲ ኽፍረደኩም ብዝሰፈርኩምዎ መስፈርውን ክስፈረኩም እዩ እሞ ከይፍረደኩም ኣይትፍረዱ።
[3] ኣብ ዓይንኻ ዘሎ ጕንዲ ዘይረአኻስ ንምንታይ ኣብ ዓይኒ ኃውካ ዘሎ መንገፍ እትርኢ?
[4] ኣብ ዓይንኻ ጕንዲ እንተሎስ ከመይ ገይርካ ንሓውካ ካብ ዓይንኻ መንገፍ ከውፅአልካ› ትብሎ?
[5] ኣታ ግብዝ! ቅድም ካብ ዓይንኻ ጕንዲ ኣውጽእ፤ ብድኅሪኡ ኻብ ዓይኒ ኃውካ መንገፍ ንምውፃእ ኣጸቢቕካ ኽትርኢ ኢኻ።
[6] ተመሊሶም ከይነኽስኹም ዝተቐደሰ ነገር ነኽላባት ኣይትሃቡ፤ በእጋሮም ከይረግጽዎ ድማ ዕንቍኹም ኣብ ቅድሚ ሓሰማታት ኣይትደርብዩ።
[7] ለምኑ ኽወሃበኩም እዩ፤ ድለዩ ኽትረኽቡ ኢኹም፤ ማዕጾ ኳሕዂሑ ክኽፈተልኩም እዩ።
[8] ዝለመነ ዂሉ ይቕበል፤ ዝደለየውን ይረክብ፤ ማዕጾ ዝዃሕዂሐ ድማ ይኽፈተሉ እዩ።
[9] እንታዋይ ሰብ እዩ ኻባኻትኩም ወዱ እንጀራ እንተ ለመኖ እምኒ ዝህቦ?
[10] ወይ ከዓ ዓሣ እንተ ለመኖ ተመን ዝህቦ?
[11] እምበኣርከስ ንስኻትኩም እኳ ኽፉኣት እንተለኹም ንደቅኹም ሠናይ ውህብቶ ምሃብ ካብ ፈለጥኩም እቲ ኣብ ሰማይ ዘሎ ኣቦኹም ግዳ ንዝለመንዎ ኽንደይ ኣብዚኁ ሠናይ ነገር ዘይህቦም?
[12] እምበኣር ሕግን ነቢያትን እዙይ እዩ እሞ ከምቲ ሰባት ክገብሩልኩም እትደልይዎ ዂሉ ንስኻትኩምውን ከምኡ ግበሩሎም።
[13] በታ ጸባብ በሪ እተዉ፤ እታ ናብ ጥፍኣት እትወስድ በሪ ገፋሕ መንገዳውን ሰፊሕ እዩሞ እቶም ናብኣ ዝኣትዉ ድማ ብዙኃት እዮም።
[14] እታ ናብ ሕይወት እትወስድ በሪ ግና ጸባብ እያ መንገዳውን ቀጢን እዩ፤ እቶም ዝረኽብዋ ኸዓ ውሑዳት እዮም።
[15] ውሽጣቶም መንጠልቲ ተዃሉ እናሃለዉ ኣባጊዕ መሲሎም ካብ ዝመጹኹም ሓሰውቲ ነቢያት ተጠንቀቑ።
[16] ብፍሪኦም ክትፈልጥዎም ኢኹም፤ ካብ ኣሜከላ ፍረ ወይኒ ወይ ካብ ዳንዴር በለስዶ ይቕንጠብ?
[17] ከምኡ ድማ እቲ ጽቡቕ ኦም ጽቡቕ ፍረ ይፈሪ፤ እቲ ሕማቕ ኦም ከዓ ሕማቕ ፍረ ይፈሪ።
[18] ጽቡቕ ኦም ሕማቕ ፍረ ኽፈሪ ሕማቕ ኦም ድማ ጽቡቕ ፍረ ኽፈሪ ኣይኽእልን እዩ።
[19] ጽቡቕ ፍረ ዘይፈሪ ዂሉ ኦም ይቝረጽ፤ ናብ ሓዊ ድማ ይድርበ።
[20] እምበኣርከስ ብፍሪኦም ክትፈልጥዎም ኢኹም።
[21] ፍቓድ እቲ ኣብ ሰማይ ዘሎ ኣቦይ ዝገብር ደኣ እምበር ጐይታይ! ጐይታይ! ዝብለኒ ዂሉ ናብ መንግሥተ ሰማያት ኣይኣቱን እዩ።
[22] በታ መዓልቲ እቲኣ ብዙኃት ጐይታይ! ጐይታይ! ብስምካዶ ትንቢት ኣይተናገርናን? ብስምካዶ ኣጋንንቲ ኣየውፃእናን? ብስምካኸ ብዙኅ ተኣምራትዶ ኣይገበርናን?› ክብሉኒ እዮም።
[23] ሽዑ ኣነ ኣቱም ገበርቲ ዓመፃ ከቶ ኣይፈልጠኩምን እየ፤ ካባይ ረኃቑ!› ኽብሎም እየ።
[24] ነዘን ቃላተይ ሰሚዑ ዝፍጽመን ኲሉ ገዝኡ ኣብ ልዕሊ ኰዂሒ ዝሠርሐ ለባም ሰብ ይመስል።
[25] ዝናም ዘነመ ወሓይዝ ወሓዙ ንፋሳትውን ነፈሱ ነቲ ገዛ ደፍእዎ፤ ኣብ ኰዂሒ ስለ ዝተመሥረተ ግና ኣይወደቐን።
[26] ነዘን ቃላተይ ሰሚዑ ዘይፍጽመን ኲሉ ኸዓ፤ ገዝኡ ኣብ ልዕሊ ኁፃ ዝሠርሐ ሰነፍ ሰብ ይመስል።
[27] ዝናም ዘነመ ወሓይዝ ወሓዙ ንፋሳት ነፈሱ ነቲ ገዛ ደፍእዎ ወደቐውን ኣወዳድቓኡ ድማ ዓብዪ ኾነ።
[28] ኢየሱስ ነዝ ነገር እዙይ ምስ ወድአ እቶም ሕዝቢ ብትምህርቱ ተደነቑ።
[29] ከም መምህራን ሕጊ ዘይኮነስ ሥልጣን ከም ዘለዎ ኾይኑ ይምህሮም ነበረ እሞ።