ወንጌል ማቴዎስ 4
[1] ብድኅርዙይ መንፈስ ቅዱስ ንኢየሱስ ብዲያብሎስ ክፍተን ናብ በረኻ ወሰዶ።
[2] ኣርብዓ መዓልትን ኣርብዓ ለይትን ጾመ፤ ድኅርዙይ ጠመየ።
[3] እቲ ዝፍትኖ ድማ ቐሪቡ ወዲ እግዚኣብሔር እንተ ዄንኻስ እዘን ኣእማን እዚአን እንጀራ ይኹና በል በሎ።
[4] ኢየሱስ ግና ሰብ ካብ ኣፍ እግዚኣብሔር ብዝወፅእ ኲሉ ቓል ደኣ እምበር ብእንጀራ ጥራሕ ኣይነብርን እዩ› ዝብል ጽሑፍ ኣሎ ኢሉ መለሰሉ።
[5] ሽዑ ዲያብሎስ ናብታ ቕድስቲ ኸተማ ወሲዱ ኣብ ላዕለዋይ ጫፍ ቤተ መቕደስ ኣቖሞ።
[6] ወዲ እግዚኣብሔር እንተ ዄንኻስ እግርኻ ብእምኒ ኸይትዕንቀፍ በእዳዎም ክፆሩኻ ንመላእኽቱ ምእንታኻ ይእዝዞም› ዝብል ጽሑፍ ኣሎ እሞ እስኪ ዘሊልካ ንታሕቲ ተወርወር በሎ።
[7] ኢየሱስ ድማ ንእግዚኣብሔር ኣምላኽካ ኣይትፈታተኖ› ዝብል ጽሑፍ ኣሎ በሎ።
[8] መሊሱ ዲያብሎስ ኬርና ነዊኅ ናብ ዝኾነ እምባ ወሲዱ መንግሥታት ኲሉ ዓለምን ክብሮምን ኣርኣዮ እሞ ተደፊእኻ እንተ ሰጊድካለይ እዝ ዂሉ ኽህበካ እየ በሎ።
[10] ሽዑ ኢየሱስ ንእግዚኣብሔር ኣምላኽካ ስገድ፤ ንእኡ በይኑ ድማ ኣምልኽ› ዝብል ጽሑፍ ኣሎ እሞ ኪድ ሰይጣን ካባይ ረሓቕ በሎ።
[11] ድኅርዙይ ዲያብሎስ ኃደጎ፤ እንሆ ድማ መላእኽቲ መጺኦም ኣገልገልዎ።
[12] ኢየሱስ ዮሓንስ ከም ዝተኣሰረ ምስ ሰምዐ ናብ ኣውራጃ ገሊላ ኣግለሰ።
[13] ንናዝሬት ኃዲጉ ድማ ኣብ ምድሪ ዛብሎንን ንፍታሌምን ኣብ ጥቓ ባሕሪ ናብ ዘላ ቅፍርናሆም መጺኡ ተቐመጠ።
[14] እዙይ ኸዓ እቲ ብነቢይ ኢሳይያስ፦
[15] ምድሪ ዛብሎንን ምድሪ ንፍታሌምን መንገዲ ባሕሪ ማዕዶ ዮርዳኖስ ኣሕዛብ ዝነብሩሉ ገሊላ
[16] ኣብ ጸልማት ዝነብር ሕዝቢ ዓብዪ ብርሃን ረአየ፤ ነቶም ኣብ ጸልማትን ኣብ ጽላሎት ሞትን ዝነብሩ ድማ ብርሃን ወጸሎም ዝተብሃለ ምእንቲ ኽፍጸም እዩ።
[17] ኢየሱስ ካብታ እዋን እቲኣ መንግሥተ ሰማያት ቀሪባ እያ እሞ ንስሓ እተዉ እናበለ ኽሰብኽ ጀመረ።
[18] ኢየሱስ ኣብ ጥቓ ባሕሪ ገሊላ እናተመላለሰ እንተሎ ኽልተ ኣኅዋት ጴጥሮስ ዝተብሃለ ስምዖንን እንድርያስ ሓዉን ኣሥገርቲ ዓሣ ስለ ዝነበሩ መርበቦም ናብ ባሕሪ እናደርበዩ ረአየ።
[19] ኢየሱስ ከዓ ኣነ ኣሥገርቲ ሰብ ክገብረኩም እየ ንዑ ተኸተሉኒ በሎም።
[20] ሽዑ ንሽዑ ድማ መርበቦም ኃዲጎም ተኸተልዎ።
[21] ካብኡ ቑሩብ ኅልፍ ኢሉ ኻልኦት ክልተ ኣኅዋት ያዕቆብ ወዲ ዘብዴዎስን ዮሓንስ ሓዉን ምስ ዘብዴዎስ ኣቦኦም ኣብ ጃልባ መርበቦም ከተዓራርዩ ርእዩ ጸውዖም።
[22] ንሳቶም ከዓ ነታ ጃልባን ነቦኦምን ኃዲጎም ሽዑ ንሽዑ ተኸተልዎ።
[23] ኢየሱስ ድማ ኣብ ኲላ ገሊላ ኣብ ናይ ኣይሁድ ኣብያተ ጸሎት እናመሃረ ብሥራት መንግሥቲ እግዚኣብሔር እናሰበኸ ኣብ ሕዝቢ ዘሎ ዂሉ ዓይነት ሕማም እናሕወየ ይዘዋወር ነበረ።
[24] ዝናኡውን ኣብ ኲላ ሶርያ ተሰምዐ ኲሎም ሕሙማት በብዓይነቱ ሕማምን ቃንዛን ዘለዎም ኣጋንንቲ ዝኃደርዎም በብወርኁ ዝለዓል ሕማም ዘለዎምን መፃጕዓትን ኣምጽኡሉ፤ ንሱ ድማ ኣሕወዮም።
[25] ካብ ገሊላን ካብ ዓሠርተ ከተማታትን ካብ ኢየሩሳሌምን ካብ ይሁዳን ካብ ማዕዶ ዮርዳኖስን ከዓ ብዙኃት ሕዝቢ ተኸተልዎ።