ግብሪ ሓዋርያት 14
[1] ከምኡ ድማ ኣብ ኢቆንዮን ጳውሎስን በርናባስን ኣብ ቤተ ጸሎት ኣይሁድ ኣትዮም ብዙኃት ኣይሁድን ግሪካውያንን ክሳዕ ዝኣምኑ ሰበኹ።
[2] እቶም ምእማን ዝኣበዩ ኣይሁድ ግና ነቶም ኣሕዛብ ኣብ ልዕሊ እቶም ኣመንቲ ብጽልኢ ኸም ዝለዓዓሉ ገበርዎም።
[3] ጳውሎስን በርናባስን ግና ብዛዕባ ጐይታ ብትብዓት እናተዛረቡ ንነዊኅ እዋን ኣብኡ ተቐመጡ። ጐይታ ኸዓ በቲ በእዳዎም ክገብርዎ ዝህቦም ዝነበረ ምልክትን ተኣምራትን ነቲ ናይ ጸጋኡ ቓል የጽንዖ ነበረ።
[4] ደቂ እታ ኸተማ ኸዓገሊኦም ምስ ኣይሁድ ገሊኦም ድማ ምስ ሓዋርያት ኮይኖም ኣብ ክልተ ተኸፈሉ።
[5] ኣሕዛብን ኣይሁድን ከዓ ምስ መራሕቶም ኮይኖም ከሳቕይዎምን ብእምኒ ቐጥቂጦም ክቐትልዎምን ተልዓሉ።
[6] ሓዋርያት ድማ እዙይ ምስ ረአዩ ናብ ሊቃኦንያ ልስጥራን ደርቤን ዝበሃላ ኸተማታትን ናብ ከባቢአን ዘሎ ሃገርን ሃደሙ።
[7] ኣብኡ ኸዓ ወንጌል ይሰብኩ ነበሩ።
[8] ኣብ ልስጥራን እግሩ ዝሰለለ መፃጕዕ ኮይኑ ዝተወለደ ፈጺሙ ክወሳወስ ዘይኽእል ሓደ ሰብ ተቐሚጡ ነበረ።
[9] እዝ ሰብዙይ ጳውሎስ ክዛረብ እንተሎ ይሰምዕ ነበረ። ጳውሎስ ከዓ ኣተኲሩ ጠመቶ ክሓዊ እምነት ከም ዘለዎ ርእዩ ድማ
[10] ብዓብዪ ድምፂ፦ ቀጥ ኢልካ በእጋርካ ደው በል! በሎ። ሽዑ ንሽዑ ኸዓ ብድድ ኢሉ ኸደ።
[11] ሽዑ እቶም ሕዝቢ ነቲ ጳውሎስ ዝገበሮ ምስ ረአዩ ድምፆም ዓው ኣቢሎም ብቛንቋ ሊቃኦንያ ኣማልኽቲ ሰብ ተመሲሎም ናባና ወሪዶም በሉ።
[12] ንበርናባስ ድያ ንጳውሎስ ድማ ዋና ተዛራቢ ስለ ዝነበረ ሄርሜስ ኢሎም ሰመይዎም።
[13] ካህን ናይታ ኣብ ማዕዶ ኸተማ ዝነበረት ቤተ መቕደስ ድያ ድማ ኣብዑ ርን ጕንጕን ዕምበባን ናብቲ ኣፍ ደገ ኣምጺኡ ምስቶም ሕዝቢ ኾይኑ ኽሥውዐሎም ደለየ።
[14] እንተኾነ እቶም ሓዋርያት በርናባስን ጳውሎስን እዙይ ምስ ሰምዑ ኃዚኖም ክዳውንቶም ቀደዱ እናእወዩ ድማ ናብቶም ሕዝቢ ኣቢሎም ጐየዩ
[15] ከምዙይ ከዓ በልዎም፦ ኣቱም ሰባት! ስለምንታይ ከምዙይ ትገብሩ? ንሕናውን ከማኻትኩም ሰብ ኢና ነዝ ኸንቱ ነገር ኃዲግኩም ናብቲ ሰማይን ምድርን ባሕርን ኣብኣቶም ዘሎ ዂሉን ዝፈጠረ ሕያው እግዚኣብሔር ክትቀርቡ ወንጌል ንሰብከልኩም ኣለና።
[16] ብዝኃለፈ ዘመናት እግዚኣብሔር ንዂሎም ኣሕዛብ በብዝደለይዎ መንገዲ ክኸዱ ኃደጎም።
[17] ምስዙይ ከዓ ጽቡቕ እናገበረ ካብ ሰማይ ዝናምን ዘመን ፍርያትን እናሃበኩም ብምግብን ብሓጐስን ንልብኹም እናጽገበ ሕያው ከም ዝኾነ ንባዕሉ ብዘይ ምስክር ኣይኃደገን።
[18] እዝ ዂሉ ተዛሪቦምውን እቶም ሕዝቢ ኸይሥውዑ ሎም ብግዲ ኸልእዎም።
[19] ኣይሁድ ግና ካብ ኣንጾኪያን ካብ ኢቆንዮንን መጺኦም ነቶም ሕዝቢ ኣስድዕዎም። ንጳውሎስ ከዓ ብእምኒ ቐጥቀጥዎ፤ ዝሞተ መሲልዎም ድማ ጐቲቶም ካብታ ኸተማ ኣውፅእዎ።
[20] እቶም ደቀ መዛሙርቱ ኣብ ዙርያኡ ደው ምስ በሉ ኸዓ ብድድ ኢሉ ናብ ከተማ ኣተወ ንጽባሒቱ ድማ ምስ በርናባስ ናብ ደርቤን ከደ።
[21] ጳውሎስን በርናባስን ኣብ ደርቤን እናሰበኹ ብዙኃት ደቀ መዛሙርት ኣፍረዩ፤ ናብ ልስጥራንን ናብ ኢቆንዮንን ናብ ኣንጾኪያን ተመልሱ።
[22] ናብ መግሥቲ እግዚኣብሔር ክንኣቱ ዝግብአና ብብዙኅ መከራ እዩ እናበሉ ነቶም ደቀ መዛሙርት ኣጸናንዕዎም ኣብ እምነቶም ጸኒዖም ክነብሩውን ኣተባብዕዎም።
[23] ኣብ ነፍስ ወከፍ ቤተ ክርስቲያን መራሕቲ ምስ ሸሙሎም ድማ ብጾምን ብጸሎትን ናብቲ ዝኣመንዎ ጐይታ ኣማዕቖብዎም።
[24] ብጲስድያ ኃሊፎም ናብ ጵምፍልያ ኸዱ።
[25] ኣብ ጴርጌ ነቲ ቓል ምስ መሃሩ ናብ ኣጣልያ ወረዱ።
[26] ካብኣ ኸዓ ናብ ኣንጾኪያ ናይ ሶርያ ብመርከብ ተሳገሩ፤ ኣንጾኪያ ነቲ ዝፈጸምዎ ሥራሕ ንጸጋ እግዚኣብሔር ኃደራ ዝተወፈዩላ ዓዲ እያ።
[27] ናብኣ ምስ በጽሑ ምእመናን ቤተ ክርስቲያን ኣኪቦም እቲ እግዚኣብሔር ዝገበረሎም ዂሉን ነሕዛብ ከዓ ኣፍ ደገ እምነት ከም ዝኸፈተሎምን ነገርዎም።
[28] ምስቶም ደቀ መዛሙርት ድማ ብዙኅ መዓልቲ ጸንሑ።