[1] Chirri nah nebey bicche maahne ka, saggi kurtaas bicche dahcho kajirto Malta liiyadeeh abanne.
[2] 'Doo'di kurtaas yaal la weyti haag nah tuste. Intaas ka la hir a 'deya il la a roffo. 'Doo'daas 'dabi nah dahammoonni nah ibolkhiche, nah tuumman la nah martiisteen.
[3] Baawulo la khorokkoo soobaayiche. Chirra us 'dab kachibo ka, toofoo jeenteti kuleeli 'dab u soobahe dahantiis khaniine, toro dahan kaalloo'de.
[4] Chirri 'doo'di ilaas toofi dahan Baawulo kalolloo'do arge ka, wihi icho isiyidaaheen, “Eta rumanka diige khaba, a mehe chirri us beyti buure goyaka iumaatan laka, waakkheenki Ki Jiti Fissan Ka Enenyet Hukkumo layadeeh usu jiro a tirte.”
[5] I'daasenyi Baawulo toof jillaanjilliche, 'dab goya kalug'de, walah suujenye kayitah la mele.
[6] 'Doo'd la Baawulohi sooyombobo suge ommos omoote kasuge. I'daasenyi inkoo icho geeddi deer sugeene, saggi Baawulo wohoo ikiitaahan icho argeen ka toro maloo addan dowteen. Wihi icho yidaaheen a mehe ya, “Usu a waakkhoo.”
[7] Chiifi kurtaase Baabiliyos layadeeh la gosashiis intaas ma kadeer. Ulla mujjume nah martiiste orrah seyyah tuummamba nah martitiissa on eheet.
[8] Aabba Baabiliyos la a maya, adahe kabahta sare a kuleele a jiifa. Baawulo la min gele usu argaa, dahan korche iweeste samaache.
[9] Inkoo waha tuumman yitaaheen ka, 'doo'di intaas kajiro khakkhannan tuumman iyimiyye, lasamaache.
[10] Icho la weyti nah inkaanyiteen. Maanti nah kahno ka wihi nah jit ka raahno tuumman nah siicheen.
[11] Uu' goorat kooban jejjebeen, hay seyyahe kutte. Koobanhoo ili Alekisaandariya kayimiyye, sumatticho “Waakkhassi Man'daanee,” layadeeh gelle. Koobanha la geeddi hayohi hafari miige jire tuumman Malta on kajireen.
[12] Ilkerengeetti Siirikusaay nimiyye orrah seyyah intaas bariine.
[13] Intaas ka kooban gelle kahne ilkerengeetti Reegiyo layadeeh gelle. Ibeenki kaas sooraaho ka hafar anki gurro kayimiyye, kahne ibeenki lammaatteet ka ilkerengeetti Bottiwoli gelle, kooban kasooyegne.
[14] Intaas ka 'doo'doo Kiriisto rummeeste 'helle, icho la nah waheene teebatoo a leefiddiino. 'Deerka intaas kakahne luhlo ka ilkerengeetti Rooma nimiy.
[15] Geeddi nah Rooma igelin 'doo'di Kiriisto rummeeste saggi nah inamiit daage, yimiyye, Sokkoti Abbiyo ka or nah kasoodowe. Gaasoo la inti Wetteelinyeti Seyyahe layadeeh ka is'helle. Baawulo la chirri us icho arge ka, Waakh kala'd ilaabe weyti uur miigooche.
[16] Chirri nah ilkerengeetti Rooma gelle ka, Baawulo etoo iskareete yaakhicho lalee'diiche, irte awtiis u keley fiddiye.
[17] Inkoo orrah seyyahe kutte ka, Baawulo weynaanti Ya'huud tol iwahe. Chirri icho soourureen ka wihi us iyidah, “Yaaftaay, walah an 'doo'deen ichoow hugumme aacchinyeteen miinsane an tirrime mele, eheetteey laka a liikhabte, ilkerengeetti weene Yeerusaleem ka liihide, toro liisookhaate dahanohi sirgaali Rooma ilaas kajiro liigesse.
[18] Icho a ihukkumeene ifurin 'dooneen. A mehe walah omoot liikagoocho icho ikaargaan mele.
[19] I'daasenyi chirri ewweenki Ya'huud i'daas 'dii'do ka iholisse, ani Kaaysar iooye. I'daasenyi walah an yaafteey kacheekdi mele.
[20] Wihi an atin iwahe a wahaas. Innohi isabanni toro isleehawwoonno 'doona. An toolla biingoyyoha ikahidan a jeenteti khajjeeli innohi 'doo'di Issiraayele tuumman khajjeello.”
[21] Wihi icho ilaabeen, “Nah khadaab woraah cheeko nah ili Ya'huudiya ka'helle mele. Toro et yaafteenenye ilaas kayimiyye woraah keene ommos uskeelaah keene mele.
[22] I'daasenyi nah ati malaah daagin 'doonna, i'di tahe saggi meel tuumman ka rabitta at kajirto woricho baabul liikaayyeedo a garanna.”
[23] Ibeenki icho Baawulo 'helaan goocheene, toro la 'doo'di inti us fiddiyo yimiy weyti buuraate. Ulla uus chirdeer ichoowka geleb wori dakhi Waakh miinsan idowdowe toro icheeke. Chiirnaanneti Amurre ichoow ti 'doo'di Waákh íyeyyeedo idowdowe wori Yeesso miinsane icho isoojiitaa.
[24] 'Doo'd gaasoo yeediis raahe, i'daasenyi gaasoo yeediis rummeysawwaaye.
[25] Inkoo Baawulo ayta yomboot cheeke ka 'doo'd iswaaye toro kaheen. Baawulo la wihi us yidah, “Geeddoo meheenye Rubeyti Munyee afi eti Waákh íyeyyeedo Isaaya layadeeh ka aacchinyeteen leeyyeedde. Yeediis la kalla,
[26] “ ‘Nyaam 'doo'da mehe itadeeh ya, “Atin walah a dagansattaane, dagansattaane, i'daasenyi jirtuu ma abattaan. Walah a yeytaane, yeytaane, i'daasenyi jirtuu ma atin gelaan.”
[27] A mehe 'doo'da uurassicho a ga'daale, dogohicho la a 'duu'deene, toro la indohicho laka a 'duu'deen. Chi'iche i'daas ieheynan, indohicho a geeddi icho il argaane, dogo la khabaane, rubeyohicho la a geeddi icho walah abtaan, a geeddi icho ani isoourgiyaane anna samaacho.’
[28] “Maantaka waha abda, ribnaanki Waakh 'doo'd ribo, yaafohi Ya'huud ieheynane liierge, icho la daagaan!”
[30] Baawulo la gu'h lamma tuumman minkoo us kireeste fiddiye. Ulla intaas ka 'doo'di argin yimiy tuumman soodowweeste.
[31] Baawulo intaas ka roorro laan wori dakhi Waakh miinsan cheeke, toro wori Yeesso Kiriistohi Kamure miinsan 'doo'd abche, et jeyche la mele.