[1] Inkoo Baawulo lakhabte ibeen chane kutte ka, kuhaanihi weyti weene Anaaniya layadeeh, ewweenkoo Ya'huud ichoow etoo af kaatahe Tertullo layadeeh khabaayi ilkerengeetti Kaaysareya yimiy. Gaafana ortiis yimaateene, Baawulo cheekteen.
[2] Chirri Baawulo lawahe ka, Tertullo wihi Baawulo lakacheekti i'duu Feelig ortiis ka cheeke, “Eti weenoow, weynaantaah ka, geeddi deere nebey khabne, wihi tuummane yaafteen deef ikeeno la a layeele.
[3] Feelighi weyti weenoow, meel tuumman ka ichoow jitassi ittaawe ka, gargaara ka kala'ddi buurenye kisoolaabna.
[4] I'daasenyi anihi ki'harcho ma 'doono, a kidaahe gaabi ka wihi nah kisoocheekanni uuri 'dabakhe ka daganso.
[5] “Eta wihi nah kaagarre, a etoo weyti sina keeno. Harra tuumman ka etane 'doo'di Ya'huud goyaka ururi il baabulo sootukkicha. Rabitti suujenye eti Naasaret raahto laka usu matakkichee.
[6] Usu minki Waakhe buure laka a bi'dirroon leheete 'deerka khabanne.
[8] Wihi at usu wowworsatti ka ati rubeytaah waha tuummane nah kacheekanni runtiche a abatta.”
[9] 'Doo'di Ya'huud tuumman af isgele, waha tuumman a rum yidah.
[10] Chirri gaafana dahan ka Baawulo yeyyeed iyidah ka, Baawulo wihi us ilaabe, “Saggi at gu'hassi ittaawe eti yaafta hukkumo ieheet a garda, 'deerka an weyti hamaada chirri an ortaah ka isiyeyyeedo.
[11] An ibeen tomon ichoow lamma kutte on ilkerengeetti weene Yeerusaleem irde Waakhe wahdaa. Chirri at goya yeyte, dowwa on runtiis abatta.
[12] 'Doo'di Ya'huude ani icheekti, anihi minki Waakhe buure goyaka etoo leeiriiro ma iargine, ommos anihi minassi weysiite Ya'huud goyaka ommos ilkerengeet goyaka urur sootukkicho ma i'helin.
[13] Wihi toolla icho ortaah ka ikacheektaan laka runticho tusin ma yabuu'diin.
[14] Wahane kisoocheeka, Jita toolla icho a ki rabitti suuje kidowaan, iche an Waakh aacchinyeteenyo kawahda. I'daasenyi wihi tuummane Chiirnaanneti Amurre ichoow ti 'doo'di Waákh íyeyyeedo kachiiran a israahaane a rummeesda.
[15] Khajjeeli icho awtichuu Waakh kakhabaan, annaka a khaba. Khajjeelaas la a ki 'doo'd tuumman omoot ka lasookahcho, ki fiffissan eheetteey ommos ki sussuuje eheetteey ka ba.
[16] Anna jeentetaase kol tuumman Waakh ortiis ichoow weeli enenyet ortiis ka hol idowa, rubeyti suujoon ikacheekan ikhaba.
[17] “Inkoo an gu'hassoo tuumman khar kijire ka ilkerengeetti weene Yeerusaleem isoonokhde, yaafteeyti Ya'huude miskiine chilimme ikeene, sadakha laka bahche.
[18] Chirra icho anihi wahaas yeelo uranti minki Waakhe buure ka i'heleen, an Daawti Dikhaaleet a massiche. Urur ileejire mele, walah uskulaate la mele.
[19] I'daasenyi 'doo'doo Ya'huude boroofenhi Aassiya kayimiy intaas a kajire. Ani ka, icho laka kootte intane kijiraane awtichuu chirri icho wohoo ikakhabaan kisoocheektaan.
[20] Chi'iche i'daas ieheynan, 'doo'da inta kajiro, maanti an Jaldaabti Weene Ya'huud orche toolle, amuri an jebche a kisoocheekeen.
[21] Kolossoo a waha kaldache an goycho ka tolossade an riire an idah, ‘Wihi kaldache maalinka liikahukkumo, a jeenteti ani saggi 'doo'di tuume toro isookaho irummeesdi.’ ”
[22] Feelig wihi 'doo'di Jiti Kamur raaho rummeesti a garta, tol hide. Wihi us yidah, “Maanti eti iskar tuumman itoollo Luusiyas layadeeh inta yimiy, iche yeediin goocha.”
[23] Feelig eti koobbintoo iskareet itoollo amur ibahche, 'dee Baawulo latoorriba, i'daasenyi ma lahido toro aalassiiski wohoo iyeelin 'doono ma lajeycho.
[24] Inkoo ibeennetoo kutte ka, Feelig makhaabassiisti Durasilla layadeehe inanti Ya'huude khabaayi yimiy. Ulla Baawulo enenyet i'diiche, chirra us kakhuufnaanki Yeesso Kiriisto lakakhuufo miinsan kayeyyeedo ka dagansate.
[25] Chirra Baawulo wori wihi fissane layeelo ichoow isjeyin ichoow hukkunnaanki ibeenki 'da'ddaboote Waakh enenyet soohukkumo kayeyyeedo ka, Feelig weyti roorro gesse, Baawulo, “A geeddaas on maanta! A geeddi at iratti on. Maanti ileehaaggan a kiwaha,” iyidah.
[26] Ulla Baawulohi chasti chilimmetoo siicho khajjeela, 'deerka geeddi buure 'doo'd ergate, Baawulo liisowahe, leehawwooche.
[27] Inkoo gu'h lamma kutte ka, eti Boorkiyo Feestas layadeeh meel Feelig gele. I'daasenyi Feelig usuhi 'doo'di Ya'huud jilhaati 'doona, Baawuló jeela goya katabe.