[1] Ibeenki daawti Beentekos soomarte ka, 'doo'd Kiriisto tuumman intoo kalday kasoourure.
[2] Koloo kalday on riiriitoo i'di hafari buure iyeedo goobi Waakh kayimiyye, minki kootte icho goya fiddiyaan tuumman buuhiche.
[3] Wohoo i'di 'dabi bolkhee argeen. Wahaas la seley goggoweene, yimaateene, eti intaas kijire tuumman koorronteen.
[4] Icho tuumman Rubeyti Munyee buuhisse, saggi Rubeyti Munyee igargaartuu la afi icho idaagin kaayyeedin sookhabteen.
[5] 'Doo'di Ya'huude Waákh karooro ilal tuumman kayimiy la, ilkerengeetti weene Yeerusaleem a kajira.
[6] Chirri icho hooyaas daageen ka urureen. Jeenteti ebba 'doo'd Kiriistoki aficho kaayyeedo idaaguu girmeesteen.
[7] Weyti girmeesteene wihi icho isworsateen, “'Doo'da tuummane yeyyeedo 'doo'di boroofenhi Gaalilaaya menya?
[8] 'Deerka saggoh eteenyo ba saggi icho afi ilassi nah kadelanne ikaayyeedaan idaagna?
[9] Bal yaafohi inno nahe yeya, yaafti Baa'diya ichoow ti Meediya ichoow ti Eelam ichoow ti ili Messabotaamiya ichoow ti ili Ya'huudiya ichoow ti ili Kabadookiya ichoow ti ili Boontus ichoow ti boroofenhi Aassiya,
[10] ichoow ti Furiijiya ichoow ti Bambiiliya ichoow ti Miissiri ichoow yaafti ili Kureene haggeenye Liibiya layadeeh ichoow martiti ilkerengeetohi Rooma katimiy. Martitaas gaasoo
[11] a 'doo'di Ya'huud ichoow ki wihi Ya'huud wahti iurgiye. Gaaseenyokoo laka Kireete ichoow ili Araabo kayimiy. I'daasenyi nah ichohi girmohi Waakh yeele afeenyo ka cheeko a daagna!”
[12] Iche tuumman girmeysatte il fooliis waayte, “Iche waha a mehe?” isworsatte.
[13] I'daasenyi enenyet gaasiiskoo a kachaarta, “'Doo'da farsoti sabiibe buurenye khaatte!” iche essa.
[14] 'Deerka Beetero ergaanoti addane tomon ichoow koowe khabaayi tolossate riire, wihi us urur iyidah, “Yaafteeyti Ya'huud, ichoow atinhi ilkerengeetti weene Yeerusaleem taalliin tuumman, alleya waha a atin idowdowo. Wihi an eldi mujjum nabah isuda.
[15] 'Doo'da farso mee khaatte, i'di maanta atin ielattaan u, a mehe il toolla a saha'd seyyahti chirdeereet on.
[16] I'daas menye, waha atin agarteen a wihi goorat eti Waákh íyeyyeedo Yoowel layadeeh cheeke,
[17] “ ‘Ibeenneti 'da'ddaboot, iche Waakh essa, Rubeyteey weeli enenyet tuumman a kakhuba. Yeeletiin ichoow albehiin wori Waakh a kaayyeedaan. Mejeliinki nunnugul fooltabcho a arga. Mejeliinki araarrinyee issilloyyo issilloota.
[18] Falfayyoheey, wihi mejele ichoow wihi deyyah laka maanassaas Rubeyteey a isookhuba, woreey kaayyeedaan.
[19] Inti saraat ka an girmo yeela, harra ka wahanyeyyohi miigti Waakh tuso yeela, diig a khubta, 'dab ichoow uunki buure la harra ka kahaan.
[20] Geeddi ibeenki Kamure khummane toro girmee iitaahan, orrah a luurgiyicha mug'di tateehe, yeyyah laka gu'duutta koo diige yateeh.
[21] Eti tuummane, magahi Kamur waho la a lariba.’ ”
[22] Beetero toro wihi us yidah, “'Doo'di Issiraayeloow, bal yeeda nabah isuda! Waakh Yeessohi Naasaret ka wihi weeli enenyet yeelin iubaa'dan ichoow girmo ichoow wahanyeyyohi miigti Waakh tuso a atin tuse. I'daakka Yeesso rumanka antohi Waakh khabo a atin tuse. Atin la wahaas a garattaan.
[23] Waakh saggi goorat us igooche us 'hor igartuu, Yeesso dahanohiin a soogesse. Atin la gargaari 'doo'di uskeel leh ka usu massalaaba kakaahteene tigaaseen.
[24] I'daasenyi Waakh usu omoot a kasookahche, bolokkhi omooteet kasoofure, a mehe omoote usu jeyin ma tabuu'd.
[25] Wihi usu miinsane karnati Dawuud layadeeh yidah, “ ‘An kol dakkhan Kamur ortaaya kaarga. Jeenteti us garabeey itoolluu, walah isesseehicho mele.
[26] 'Deerka an uureey ka weyti hamaada, harrabeey laka weyti Waakh koolicha. Sarteey laka khajjeel a khabta.
[27] A mehe meessi 'doo'di tuume kijiro goya ma ikatabto, ommos Falfataahti Munyee ma 'diisso ma suusahto.
[28] Jiti jiro lakeelo a itusse, cha'an ortaah toollo la weyti ikahamaadissa.’
[29] “Yaafeey, wihi aacchiheenki karnatenye Dawuud layadeeh miinsan roorro laane atin abcha. Dawuud a yumuyye, lahawwaale. Kaassintiis la ichoow uliba intane inno kaleejirta.
[30] I'daasenyi us eti Waákh íyeyyeedo eheete, ayyinti Waakh usu daato ka igooche 'dee eti hiiyyiise komborti antoot gesso a garte.
[31] Dawuud wihi berri Waakh yeelo iche arge. Saggi Ki Lasubhe omoot liikasookahcho cheeke. Usu i'di 'doo'di tuumuu meessi 'doo'di tuume kijiro goya ma lakatabine, ommos sartiis ma suusahin.
[32] Waakh Yeessoha omoot a kasookahche, nah tuumman la gartaas a laabna.
[33] A laweynaache, Waakh anki dahantiisti miigeet loorrommiche. Waakkhi Aabbahiise Rubeyti Munyeenye us ayyiche ka'hele. Waha buurenye toolla atin agarteene toro la daagteen tuumman la, Rubeyti Munyeenye kayamiitiin.
[34] A mehe Dawuud goobi Waakh ma ikorine, i'daasenyi wihi us yidah, “ ‘Waakkhi Kamure wihi us Kamureey iyidah, “Dabankeeyki miigeete antoot orrommo,
[35] ichoowka chiiytaah tuum dahanohaah a soogesso.” ’
[36] “Maantaka 'doo'di Issiraayel tuumman, waha a abti gi'de! Waakh rumanka Yeessoha atin massalaaba kakaahteen, a soobahsate, Kamur ichoow Ki Lasubhe kayeele!”
[37] Enenyet uus yeedaas daage, yeed rumanka khaniine, wihi us Beetero ichoow ergaanoti addan worsate, “Yaafeey mehe yeello?”
[38] Beetero la wihi us ilaabe, “Etiimba uskeeliis a kasoonokhti, antohi magah Yeesso Kiriisto ka a atin labaattissiyo, 'dee Waakh uskeeliin a atin ikakuto. Waakh la 'dee siinti Rubeyti Munyee a atin siicho.
[39] Ayyintaas atin ichoow nyaakhutiin ichoow enenyeti fogaat ichoow ebbaaw addane Kamuri Waakkheene soowahti iche miinsantahe.”
[40] Beetero toro enenyet yeedassoo addane ittaawenye i'daase katootooche. Toro hawwaaste wihi us iyidah, “Taba 'doo'di wey'dane uskeel leh iskariba.”
[41] 'Doo'di yeediis khaatte labaattissiye. Maalinkaas 'doo'di ururicho isookhaye, a geeddi et elif seyyah.
[42] Icho kol tuumman wihi ergaano abisse raaheene toro kulankoo kalday isleekhabeen. Icho ichoow 'doo'di Kiriisto rummeeste ba isleegolossateene, toro Waakh isleewahteen.
[43] Ergaano girmo ichoow wahanyeyyohi miigti Waakh tuso haaggisse, enenyet tuumman la roorro gesse.
[44] 'Doo'di Kiriisto rummeeste tuumman mujjum isleefiddiye, wihi icho khabeen tuumman laka isleegismeen.
[45] 'Doo'daas hoolahicho ichoow meehichooda ororicheene, ebba geeddi sinatiis tahe u, chilimme lasiiche.
[46] Orrahti sookorto tuumman, uranti minki Waakhe buurenye isikayamiitiine Waakh wahtaan. Toro goobassicho ka, uuri haaggan ka isleegolossataane, hamaadaane,
[47] Waakh koolichaan. 'Doo'd tuumman la icho jilhaate. Maan dakkhan la Kamur 'doo'di us ribo a ikasookhaye.