[1] Inkoo nah icho kagoone ka, beyti buure kadihne anki kurti bicche dahcho kajirto Koos layadeeh miinsanne. Ibeenki kaas sooraaho ka kurti bicche dahcho kajirto Roodo layadeeh gelle, saahka ilkerengeetti Baatara nimiy.
[2] Intaas ka koobanhi boroofenhi Foniikiya isohti 'helle, korre iranne.
[3] Chirri nah kurti bicche dahcho kajirto Kuuburo layadeeh agarre ka, anki gurro tabne, ili Siiriya isohannaa. Inti ilkerengeetti Tiiro layadeeh ka iranne, bicche aficho tolossanne, koobane intaas ka meeh yagchaa.
[4] Intaas ka abatti 'helle, teebatoo leefiddiine. Icho la miigti Rubeyti Munyee ka Baawulo hawwaasteen uus ilkerengeetti weene Yeerusaleem iran.
[5] I'daasenyi maanti ibeenkeenyo massate ka kahne, orey isohanne. 'Doo'd tuumman la deyyehoticho ichoow nyaakhut khabaayi nah sooraahe, ilkerengeet nah kaleebahe. Bicche aficho ka nah tuumman icho khabnaayi jilbo il kagu'dubne, Waakh wahanne.
[6] Inkoo nah bariito iskakhaatanne ka, nah kooban gelle, icho la goobassicho inokhteen.
[7] Inkoo nah ilkerengeetti Tiiro kakahne ka, sohanne ichoowka ilkerengeetti Tollemayo gelle. Intaas ka 'doo'di Kiriisto rummeeste bariitinne ibeenkoo leefiddiine.
[8] Ibeenki kaas sooraaho ka, kahne ilkerengeetti Kaaysareya iranne, kooban kasooyegne. Intaas ka minki eti Wori Haaggan taa'hicho Fiilif layadeeh fiddiine. Fiilif la a etoo 'doo'di goorat teebeenye Yeerusaleem ka lasoobahsate golol 'doo'd gise.
[9] Ulla inám affar idisneynane wori Waakh kaayyeeddo iche khaba.
[10] Inkoo nah ibeennetoo intaas fiddiine ka, eti Waákh íyeyyeedo Agaabo layadeeh ili Ya'huudiya kayimiyye intaas yimiy.
[11] Ulla nah iyimiyye, saab Baawuloki dabar khaate, luhlohiis ichoow dahanohiis iskahide, wihi us yidah, “Rubeyti Munyee wahane elatta. ‘Eti saaba leh saggane ilkerengeetti weene Yeerusaleem ka 'doo'di Ya'huud ihida, dahanohi 'doo'di Waakh igaran igessa.’ ”
[12] Chirri nah yeeda daagne ka nah ichoow 'doo'di addan ba Baawulo hawwaassanne uus ilkerengeetti weene Yeerusaleem iran.
[13] Baawulo wihi us ilaabe, “A i'doh i'duu iooytaane uur iuskulaassaan? An hiinaanki liihido kalday menye, anihi ilkerengeetti weene Yeerusaleem ka jeente Yeessohi Kamure amuut laka ma 'dii'do!”
[14] Chirri saggi nah usu isoolaabno waayne ka, “Wihi Kamur 'doono a yitaaheen,” nidahye, 'diinne.
[15] Inkoo nah geeddoo intaas fiddiine ka tannabanne, ilkerengeetti weene Yeerusaleem ikahne.
[16] Abattitoo ilkerengeetti Kaaysareya ka nah raahte, eti 'dee nah minkiis fiddiino Muunason layadeeh goobiis nah geesse. Ulla a etoo ili Kuuburo kayimiyye, abattiti oraat kichokoowe.
[17] Inkoo nah ilkerengeetti weene Yeerusaleem soogelle ka, 'doo'di Kiriisto rummeeste hamaad ka nah martiiste.
[18] Ibeenki kaas sooraaho ka, Baawulo ichoow nah tuumman iranne, Yaakoobo sooagarre, ewweenki urur Kiriisto woyo tuumman la intaas a kajire.
[19] Baawulo la icho bariitiche toro wihi tuummane Waakh yaafohi Ya'huud ieheynan hiliis ka iyeele 'doo'd tuum idowdowe.
[20] Inkoo icho waha daageen ka, Waakh saa'deen. 'Deerka wihi icho Baawulo iyidaaheen, “Baawulohaanyaaw, yaafteenti Ya'huude Yeesso rummeysatte saggi iche aliffe igoosso yey. Icho tuumman la weyti amurre Muusa isibahcheen.
[21] 'Doo'da wihi at 'doo'di Ya'huude yaafohi Ya'huud ieheynan goya yaal tuumman abisso 'dee icho amurre Muusa 'diichaane, nyaakhuticho laka ikhandiyine, hugummeti Ya'huud iraahin a liicheeke.
[22] Mehe yeello? Rumanka saggi at itimiy a daagaan on.
[23] 'Deerka wihi nah kidowno yeel. Inta ka et affar daatatte a khabna.
[24] Reeraas khaat gi'de, ati rubeytaah laka daawti dikhaaleet leegele, wihi icho daawtaas kageleen igute, 'dee matahenyeticho a haatteen. I'daakka enenyet tuumman saggi waha liidowo ati kimiinsan tuumman been iyahiin a abta. I'daasenyi saggi at amurre Muusa mujjum iraahto a laarga.
[25] 'Doo'di Kiriisto rummeeste yaafohi Ya'huud ieheynan la orey khadaab a ichiirre wihi nah goonne icheekne, 'dee gololi iyookkoyyohi waakkhakh lakayeessi liisoorriyooche ichoow jidi naffi laluulliche ichoow diig ichoow soho'ddarri a kanokhteen.”
[26] Ibeenki kaas sooraaho ka Baawulo reeraas khaate daawti dikhaaleet isleegeleen. 'Deerka minki Waakhe buure gele, ibeenki daawti dikhaaleet massatti, toro eticho ba soorriyo liibahcho iche kuhaani icheekaa.
[27] Geeddi ibeen teeba kasoomassatti ka, 'doo'doo Ya'huude boroofenhi Aassiya kayimiy Baawulo minki Waakhe buure goyaka arge. Urur tuumman sootukkicheene Baawulo khabteene,
[28] riireene, “Mejeli Issiraayeloow, nah gargaara! Eta a ki enenyet tuumman harra tuumman ka wihi suujenye us abcho ka 'doo'deenki Issiraayel ichoow amurreteen ichoow minka Waakh miinsan kayeyyeedo. Waha kalday on menye, 'doo'di Ya'huud ieheynan iche minki Waakhe buure soogesse, meessa lagan bi'dirrooche,” yidaaheen.
[29] Wihi icho i'daas kayidaaheen la a jeenteti icho Turofiimohi Ya'huud ieheynane ilkerengeetti Efeesso kayimiyye ilkerengeet goyaka Baawulo rarraaho iargeen. Kol Baawulo usu sookhaate uranti minki Waakhe buure keene koogyahiin.
[30] Ilkerengeet tuumman wereerte, 'doo'd tuumman la meel tuumman ka isleesoorye. Baawulo khabteene, minki Waakhe buure khariis ijiiteen. Chirraas on arto lahide.
[31] Chirra urur Baawulo ogoos 'doono ka, eti iskarti Rooma tuumman itoollo saggi ilkerengeetti weene Yeerusaleem tuumman kowdo kalday ititah daage.
[32] Ulla chirraas on nyaame iskartoo wewween ichoow iskartoo addan khaatte urur ikhubteen. Chirri 'doo'd eti iskar tuumman itoollo ichoow iskartiis arge ka, Baawulohi kootte icho jahaan 'diicheen.
[33] Eti iskar tuumman itoollo irte Baawulo khabte, amuri biingo lamma lakahido bahche. 'Deerka eti us yahe ichoow wihi us yeele 'doo'd worsate.
[34] Urur goyaka 'doo'd gaasoo riirit ka wohoo essa, koo la riirit ka wohoo addane essa. Eti iskar tuumman itoollo jeenteti kowduu sag us rum iabti mele. Amuri Baawulo lakhaato uranti iskareet lakageecho bahche.
[35] Chirri Baawulo faaneyyohi min lakakoro sooeleele ka, iskare jeenteti urur weyti iuskulaatuu, usu si'dde.
[36] Icho tuumman la 'dubiis leeyimaateene, riireene, “Agiisa, agiisa,” esseen.
[37] Chirra icho Baawulo minki iskare fiddiito gelin leheet ka, Baawulo yeede, eti iskar tuumman itoollo, “Wohoo ma kisoocheeko?” worsate. Wihi us ilaabe, “At afi Giriig a daagta?
[38] At eti ili Miissiri goorat iskarti elif affarenye bir khabto sookahche hidaad leekeene menya?”
[39] Baawulo wihi us ilaabe, “An a Ya'huude, ilkerengeetti Taarso ili Kiliikiya kijirto liikadele. An a eti ilkerengeetti weyti khumman. A kihawwaasdee, alley bal 'doo'd a leeyyeedo.”
[40] Chirri us amuri eti iskar tuumman itoollo 'hele ka, Baawulo faaneyyo katolossate dahan ka urur leeyeede. Chirri icho tuumman gammadicheen ka Baawulo afichoki Ibiraaniya ka 'doo'd leeyeede.