[1] Kuhaanihi weyti ween la wihi us Isiteefano worsate, “Waha lakaacheekti a rum a?”
[2] Waha ka wihi us laabe, “Yaafeey idagansada. Waakkhi weynaane tiis tahe, aabbaheenki Aburaaham layadeeh geeddi goorat archiiy us ilkerengeetti weene Haaran igelin, ili Messabotaamiya ka a isoobahe.
[3] Waakh wihi us Aburaaham iyidah, ‘Ilaah ichoow 'doo'daah kaguure ili an kidowdowo iro.’
[4] “Aburaaham la ilaas kaguure ili Haaran furte. Inkoo aabbahiis buje ka, Waakh ilaas kaguuriche ila toolla atin taalliin furte.
[5] Waakh harratoo rucchule us alaassati ma siin, i'daasenyi chirri Aburaaham weel ikhabin laka, harrataas usu ichoow nyaakhut nyaakhutiis alaal ka a igooche.
[6] Waakh wihi us Aburaaham iyidah, ‘Nyaakhutaah 'dee berri iloo yeelane gela, ilaas ka la gu'h kud affar iche bow'da yateehe weyti la sina lakawaaricha.
[7] I'daasenyi an ili icho bow'daticho keeheet sina tusa. Yomboka ilaas a kasoobahaane, yamiitiine inta ka ani iwahtaan.’
[8] 'Deerka ayyinti Waakh Aburaaham igooche a ti mejel lakhandiyo. Aburaaham la Isakh dele ibeenki siyyeennaatteet ka khandiye. Isakh la Yaakoobo dele Yaakoobo la yaafoheenki tomon ichoow lammee uume.
[9] “Aacchinyeteentaas la walaalichoki Yuussuf layadeeh inaafte ili Miissiri iororisse, ilaas ka bow'da yitah. I'daasenyi Waakh Yuussuf a leejire,
[10] sinayyohiis tuumman karibe. Waakh la Yuussuf khara siiche Faraawohi karnati ili Miissiree jilhaache, 'deerka ili Miissiri ichoow urantiis tuumman iweynaache.
[11] “Maantooka abaare 'deerka ili Miissiri ichoow ili Kaanaan leekahte, sina buuraatte, aacchinyeteen laka golol waayte.
[12] Maanti Yaakoobo saggi golol ili Miissiri ikajiro daage ka, yeeletiisti aacchinyeteene kolooraat ili Miissiri ierge.
[13] Maanti lammaatteete iche toro ili Miissiri imuu'dde ka, Yuussuf walaalinyetiis isicheeke, Faraawo laka Yuussuf goobicho abte.
[14] Waha 'dubicho ka Yuussuf aabbahiiski Yaakoobo layadeeh ichoow minkicho tuumman ili Miissiri isoowahe. Ichohi sooguure isgoya a et tomon teeba ichoow et chan.
[15] Yaakoobo 'deerka goobiis tuumman khabaayi ili Miissiri ikhubte. Intaas ka usu ichoow aacchinyeteen yumaateen.
[16] Sarticho lakhaate inti ilkerengeetti Cheekem layadeeh ka, go'ddi goorat Aburaaham yeele Haamor kasoogatte lakahawwaale.
[17] “Maanti ibeenki Waakh ayyinti us Aburaaham igooche buuhicho soodowwaate ka, 'doo'deen ili Miissiri ka weyti kakhayme.
[18] Karnatoo addane Yuussuf ichoow wihiis tuumman igaran la ili Miissiri ka soobahe.
[19] Ulla aacchinyeteen weyti sina kawaariche, toro ekkeeste, nyaakhutichoki ladele icho khar isoorogaane 'dee tuumo ihosse.
[20] “Maantaase Muusa desse. Ulla weyti haagganeet. Goobicho ka hay seyyah mujjum lawoywoye.
[21] Maanti khar liisoobahche ka, inám Faraawo khaatte i'di weelichuu weyneysatte.
[22] Muusa la kharati 'doo'di Miissiri laabche, etoo harrab ka ichoow walah tuumman ka atah yitah.
[23] “Maanti us gu'h tomon affar eleele ka, 'doo'diiski Issiraayele us idaahicho gooche.
[24] Etoo Miissiri koo Issiraayel il itakho arge, 'deerka ki Issiraayel igele, aal gutte ki Miissiri yigis.
[25] Muusa kol 'doo'diis saggi Waakh usú isooerge, usu icho iribo ikaso koogyahe, i'daasenyi icho ma kasin.
[26] Ibeenki kaas sooraaho ka, Muusa reeroo lammeenye Issiraayele isjaho arge, isineybin leheete, ‘Era, atin a walaal, a i'doh isgaameerin i'doontaan?’ iyidah.
[27] “I'daasenyi eti kootte ki addan gaameero Muusa 'dol itakhe, ‘Ayyo eti nah iween ichoow eti nah hukkumo kaayeele?’ iyidah.
[28] ‘Saggi at chele eti Miissiri itigisye ani laka ogoos i'doonta?’
[29] Chirri Muusa yeedaas daage ka, ili Miidiya ifirde. Inkoo us intaas geeddoo fiddiye ka ínam lamma dele.
[30] “Inkoo gu'h tomon affare kutte ka, herti Waakh Muusa hidaaddi Hali Sinnaay ka isoobahte. Saggi iche ikasoobahte la a geeyi 'dab kabolkho toro 'dab iumhan.
[31] Muusa chirri us waha arge ka wahaas kagirmeeste. Chirra us meel isohti, us mujjum fiiricho ka, hooyi Kamur daage.
[32] ‘Ani a Waakh aacchinyetaahha, a Waakh Aburaaham ichoow Isakh ichoow Yaakoobo.’ Muusa nahtim ka harme intaas yeyin laka karoore.
[33] “Kamuri Waakhe 'deerka wihi us Muusa iyidah, ‘Kobohaah duumi, a mehe inta at tolosso a harrati lagan.
[34] Rumanka sinati ili Miissiri ka 'doo'deey lakawaaricho a arge, ooytinticho la a daage. Toolla la a isooyage icho riba. Toollaka kaale ati ili Miissiri toro kiergadaa.’
[35] “Waha a Muusahi goorat icho 'dii'deene, icho, ‘Ayyo eti nah iween ichoow eti nah hukkumo kaayeele?’ idoween. Herti Waakhe geeyi gubti goyaka isoobahte ka, Waakh rubeytiis usu a ergate eti icho iween ichoow eti icho soofuro kayeele.
[36] Muusahaase 'doo'd ili Miissiri kasoobahche. Usuhaas on gu'h tomon affar tuummamba girmo ichoow wahanyeyyohi miigti Waakh tuso ili Miissiri ka ichoow Beyti Buurenye Guu'ddan ka ichoow hidaad ka haaggiche.
[37] “Muusaha a ki goorat 'doo'di Issiraayel, ‘Waakh 'dee berri etiinkoo Waákh íyeyyeedo i'deye a atin isooerga,’ iyidah.
[38] Maanti 'doo'di Issiraayel hidaad ka iskafurte, Muusahaase leejire. Muusahaase Hali Sinnaay ka, Waakh i'di herti Waakh u isoobahe, leeyyeede. Ulla Waakh ichoow aacchinyeteen dahcho kajire. Muusa la Yeedi Waakhe jirtuu tuumman imassan Waakh ka'hele inno laka inno isookucche.
[39] “I'daasenyi aacchinyeteen Muusa a daagiwwaayte, usu 'dii'dde uurassicho ka ili Miissiri iche inokhatti dowdowte.
[40] Aacchinyeteen wihi iche Haruun itidah, ‘Iyookkoyyohi waakkhi orteenyo raaho nah ihaaggi. I'di tahe wihi Muusahi goorat ili Miissiri nah kasoobahche kayitah ma garanni.’
[41] Maantaase iyookkotoo i'di maartoo u haaggicheene, iyookkotaas soorriyo igoorraheen. Wihi icho dahanohicho ka haaggicheen inkaanyiteene kahamaadeen.
[42] I'daasenyi Waakh icho adah kakhabte 'diiche, yiyyihimo Waakh kayeesseene, wahteen. Waha ichoow wihi buuggoo etoo Waákh íyeyyeedo chiire a israahaan. “ ‘Minki Issiraayeloow, soorriyoyyohi atin gu'h tomon affar hidaad ka goorrahteen, ani igoorrahteen?
[43] Atin minki waakkhi beenaate Mooleg layadeeh ichoow yiyyihintiinti waakh lakayeessi Reefan layadeeh iche si'ddeen, icho a iyookkoyyohi atin haagsatteene 'dee atin wahattaan. Maantaka an a atin baabiicha ili Baabiloon 'dirihiis atin liibooliya.’
[44] “Aacchinyeteen goorat hidaad ka eemati saggi Waakh ileejiro tusso iche khabte sissi'datte. Eemataas saggi goorat Waakh Muusa ihaaggi iyidah on liihaaggiche, toro iyookkoti goorat Muusa arge on lakahaaggiche.
[45] 'Da'ddaboka aacchinyeteen eemataas ooyenyeticho kakhaatatte. Maanti iche Yoochuwa raahte, ili iche gelaan eemataas a isitteen. Waakh la orcho raahe yaafohi Waakh igaranne ilaas kajire rihe. Eemataas la ichoowka geeddi karnati Dawuud layadeeh jire tuumman ilaas a kasoo'hadde.
[46] Waakh la weyti Dawuud a jilhaate. Dawuud la usuhi Waákh Yaakoobo fiddiito iyeelo daahe.
[47] I'daasenyi Soolomone Waákh min idise.
[48] “I'daasenyi Waakkhi Weyti Ween minki dahanohi enenyet diseen ma fiddiyo, i'di 'doo'di Waákh íyeyyeedo yadeeh u,
[49] “ ‘Sereye a komborteeyti buurenye antoote, harra la a komborteeyti rucchule an luhlo korcho. Minki i'dohenye idissaan? iche Kamur essa. Ommos inti an kanaso a intoh?
[50] Dahanohaaya on menya waha tuumman haaggiche?’
[51] “Atin a matah miig mehe? Uurassiin ichoow dogtiin a i'di wihi 'doo'di Waakh ikakhuufin. Atin a i'di aacchinyetiinna, kol dakkhan Rubeyti Munyeenye tirrintaan.
[52] Eti Waákh íyeyyeedo aacchinyetiin sina iomhin a jira? 'Doo'di emeetti Eti Fissan cheeke laka a bakkisseen. Atin la usu 'dub a goosseene toro la dubunuunu tigaaseen.
[53] 'Doo'di goorat herti Waakh ka amurre liikeene a atine, i'daasenyi atin amurretaas ma raahin.”
[54] Jaldaabe chirri iche waha daagte ka weyti hollowte, ichoowka indo guggu'duutteen.
[55] I'daasenyi Isiteefanohi chirraas Rubeyti Munyee buuhto, goobi Waakh serey iyeye, Waakkhi ababo arge, Yeessohi Waakh anki dahantiisti miigeet toollo arge.
[56] Wihi us yidah, “Yeya, goobi Waakhe furane Ínam Aadam usuhi Waakh anki dahantiisti miigeet toollo a arga.”
[57] Iche la weyti riirte, farro nabho isgelisse. Chi'iche nabho farro isgelisse ka iche tuummamba Isiteefano ioriite,
[58] khaatte, ilkerengeet khariche ijiitte, dagah ka saate. 'Doo'di gar laabe etoo nugule intaas kajire Saawulo layadeeh darfohichoki oroot tuumman ikatabeen.
[59] Geedda Isiteefano dagah lakachibo layagiis, usu Waakh on wahta, wihi us essi, “Yeessohi Kamure, rubeyteey a kitimaate.”
[60] Ulla jilbo il kagu'dde weyti riire, “Kamur! 'Doo'da uskeela aleeraahin” yidah. Uus yeedaas massiche on rubey gooche, yumuy.