[1] Baawulo ichoow Siila orey isohteene, ilkerengeetohi Amfifooli ichoow Aboolloniya dah kagoocheene, ilkerengeetti 'Dessaloonika minki weysiite Ya'huud kajiro geleen.
[2] Baawulo la i'di orran us yeeluu irte, minki weysiit irte. Intaas ka teeba seyyah issoorahto Seeri Lanaso tuummamba leejire, wihi Chiirnaanneti Waakh tadeeh idowdowe,
[3] wihi massan, Ki Lasubhe sina lakawaaricha, toro omoot kasookaha. “Yeessoha an atin idowdowo iche Ki Lasubhee,” iyidah.
[4] 'Doo'doo Ya'huud la yeedaas rummeeste, Baawulo ichoow Siila ikhayeen. 'Doo'doo ittaawenye Ya'huud ieheynane Waakh karooro ichoow deyyehoti ittaawenye magah khabto laka Kamur rummeeste.
[5] I'daasenyi 'doo'di Ya'huud inaaf gele, 'deerka 'doo'doo sussuuje sokko ka soobaayicheene, ururi suuje yitaaheene ilkerengeet tuumman wereericheen. Minki etoo Yaason layadeeh dihte, kol Baawulo ichoow Siila minkaas kijiraane koogyihiine, 'dee reeraas khaatta enenyet igeessa.
[6] I'daasenyi chirri icho waayeen ka, Yaason ichoow 'doo'doo Kiriisto rummeeste khabteene, il kajiiteene, 'doo'di ilkerengeet iwewween igeecheen. Riireene, “Reera harra tuumman sina a ikeene, toro toolla ilkerengeetteen laka a yimaateen,” yidaaheen.
[7] “Yaason la icho minkiis ka a martiiste. Icho tuumman la amurreti karnati ili Rooma jebchaane, karnatoo addane Yeesso layadeeh a jira, 'doo'd idowaan.”
[8] Chirri icho waha daageen ka, urur ichoow weynaanti ilkerengeeteet weyti wereereen.
[9] 'Doo'di wewween la inkoo us Yaason ichoow 'doo'di usu leejire chilimme geeddi kootte laka'doono icho ka'heleen ka 'diicheene, irteen.
[10] Uus il ibeennowe ka 'doo'di Kiriisto rummeeste Baawulo ichoow Siila ilkerengeetti Beeroya ierge. Chirri icho Beeroya geleen ka minki weysiite Ya'huud irteen.
[11] 'Doo'di ilkerengeetti Beeroya la i'di 'doo'di 'Dessaloonika menye, a 'doo'doo mujjum dogo khabo, weyti wihi liidowo dagansati, Chiirnaanneti Waakh soomo usu wihi Baawulo illeh idoween rum yahiin yeyo.
[12] 'Doo'di Ya'huude ittaawe Kiriisto rummeeste. Deyyehoti ittaawenye magah khabto yaafohi Ya'huud ieheynan ichoow mejeli yaafohi Ya'huud ieheynane ittaawe laka Kiriisto rummeeste.
[13] Chirri 'doo'di Ya'huude ilkerengeetti 'Dessaloonika kajiro saggi Baawulo ilkerengeetti Beeroya ka Yeedi Waakh icheeko abte ka, yimaateene, 'doo'd ururicheene, Baawulo isootukkicheen.
[14] 'Doo'di Kiriisto rummeeste chirraas on Baawulo khaate, beyti buure afiche eleeliche, i'daasenyi Siila ichoow Timooti Beeroya fiddiyeen.
[15] 'Doo'di kootte Baawulo khaate la, Baawulo raahe ichoowka ilkerengeetti Aa'den eleelicheene intaas ka nokhteen. Baawulo Siila ichoow Timooti amur ibahche 'dee dowwa ilkerengeetti Aa'den ka usu a isookhayeen.
[16] Baawulo la ilkerengeetti Aa'den ka Siila ichoow Timooti sugaayi, weyti uur suujowe jeenteti ilkerengeettaas iyookkoyyohi waakkhakh lakayeessi ibuuhaan u.
[17] 'Deerka minki weysiite Ya'huud ka, 'doo'di Ya'huud ichoow 'doo'di Ya'huud ieheynane Waakh karooro laka leehawwooche. Maanti addan la sokko ka 'doo'di us 'hele leehawwooche.
[18] 'Doo'doo wihi etoo Eebikur layadeeh 'doo'd abcho raaho ichoow 'doo'doo wihi rabittoo Siitoyig layadeeh enenyet abisso raaho leehawwooche. Gaasichokoo mehe worsateen ya, “Waha immarah yeyyeedo mehe essaan?” Gaasichokoo la mehe essaan ya, “Waakkhassi 'doo'di yeelane woricho cheeka.” Wihi icho i'daas kayidaaheen la a jeenteti Baawulo Wori Haaggane Yeesso miinsan ichoow saggi Yeesso omoot ikasookahe ikayeyyeedo.
[19] Baawulo khaateene, kurteti Ariyobaag ka jaldaabti tossatti igeecheen. Wihi iche tidah, “Waha husube at 'doo'd abisso iche aban 'doonna.
[20] Waha at nah icheekto, gaasoo a wihi nah injire idaagin, toollaka nahi wihi icho yahiin abanni iche 'doonna.”
[21] 'Doo'di ilkerengeetti Aa'den kajiro ichoow 'doo'di yeelane intaas fiddiyo tuumman ayti husube us dagansati toro us kahawwoocho on menye, walah addane us haaggicho mele.
[22] Baawulo 'deerka 'doo'di kootte Ariyobaag ka tossati ortiis tolossate, “Mejeli Aa'den!” yidah. “Saggi atin jitat tuumman ka 'doo'di waakkhassi ittaawe wahti itahiin a arga.
[23] Wihi tahe, geedda an ilkerengeettiin goya dah kagooche, an wahanyeyyohi atin wahattaan mujjum fiiriche, chalagtoo hoola lakasoorriyoocho waha kachiiranyahiine 'hele, Waakkhi Liigaran. Kaas chirri atin igaran laka atin wahattaan, iche toolla atin isoocheeka.
[24] “Waakkhi harra ichoow wihi tuummane goya kajiro soouume, a Kamuri serey ichoow harra leh. Ulla minassi weysiite dahanohi weeli enenyet diseen goya ma fiddiyo.
[25] Ulla i'doo us wohoo 'doonuu, dahanohi weeli enenyet ma liikafalo. A mehe usu rubeytiissa weeli enenyet tuumman jiro ichoow neebsi ichoow walah tuumman siicha.
[26] Etoo kalday on ka yaafohi harra tuumman soouume 'dee harra tuumman furtaane, toro inti icho furtaan ichoow maanti icho furtaan a gooche.
[27] Ulla i'daas a yeele 'dee icho laka usu yowtaan, 'dee kolossoo yowtaani kasooyegaan. I'daasenyi Waakh eteen us kadeeryahe mele.
[28] ‘A mehe inno goytiissa kajirra, kasohanna, toro kanoolnahe.’ I'di mammahtiintoo tadeeh u, ‘Inno laka a delootiissa.’
[29] “Maantaka inno a nyaakhuti Waakh gone, kol Waakh i'di iyookkoyyohi 'dahabyahe ommos i'di lahaageetyahe ommos i'di dagakki layeele yahe ommos i'di iyookkoyyohi layeelo yahe uus inno koogeynan.
[30] Goorat 'hor Waakh enenyeti aytiis igaran walah us iekkaache mele, i'daasenyi toolla amuri us enenyet tuumman meelbaaw us kijiro ka ibahcho, a ki icho uskeelicho kasoonokhtaan.
[31] A mehe us ibeenki us enenyet tuumman jiti fissan ka eti us soobahsate ka hukkumo a gooche. Waakh la omoottaas us kasookahche ka enenyet tuumman a irummaache.”
[32] Chirri icho Baawulohi omootti lakasookaho kaayyeedo daageen ka, gaasoo kachaarteene, i'daasenyi gaasoo “Atihi waha inokhatti kayeyyeeddo iche daagin 'doonna,” iyidaaheen.
[33] Baawulo geeddaas ka Jaldaab katabe.
[34] 'Doo'doo rucchul la Baawulo raahe Kiriisto rummeeste. Goycho ka, koo a etoo jaldaabti toli Ariyobaagenye Diyoonissa layadeeh ichoow makhaabassoo Daamaris layadeeh ichoow 'doo'doo addan.