[1] Urur Kiriistoki ilkerengeetti Antiyookhiya kijiro 'doo'doo Waákh íyeyyeedo ichoow 'doo'doo Yeedi Waakh 'doo'd abcho goya a kijire. Icho la a Barnaba ichoow Siimiyonhi Nigeer layadeeh ichoow Luukiyohi ili Kureene kayimiy ichoow Manaayenhi gaafanahi 'Herood Antiiba layadeeh weyneeste ichoow Saawulo.
[2] Geedda icho Kamur wahtaane icho af hiitaan, Rubeyti Munyee wihi iche itidah, “Barnaba ichoow Saawulo ba hili an icho iwahe isoobahcha.”
[3] 'Deerka inkoo icho af hiiteene Waakh wahteen ka, dahano korcheene iweesteene ergeen.
[4] Lammache ichehi Rubeyti Munyee ergatte, irteene ilkerengeetti Seluukiya ikhubteene, intaas ka kooban geleene kurti bicche dahcho kajirto Kuuburo layadeeh irteen.
[6] Kurtetaas tuumman dah kagoocheene Wori Haaggan cheekeene ichoowka ilkerengeetti Baabos eleeleen. Intaas ka etoo Ya'huude moreenye eti Waákh íyeyyeedo iskaayyeelo Bar Yeesso layadeeh 'heleen.
[7] Ulla eti kurtetaas iweene Sergiyo Baawulo layadeehe kharee iche aaliis yahe. Etaas ween Barnaba ichoow Saawulo wahe Yeedi Waakhe kadaagin 'doonaa.
[8] I'daasenyi Eelimaashi moree icho tirrime. Eta magahiis moro miinsanyahe. Usu etaas ween kakhuufnaanki us Yeesso kakhuufo kalaabine 'doone.
[9] Saawulohi magahoo ka Baawulo layadeehe Rubeyti Munyee buuhisse Eelimaas indo katoolliche wihi us iyidah,
[10] “Weeli Seytaan! At a chiiytanki wihi haaggan tuumman 'dii'do. At a eti ekkeysi lehe, toro wihi suuje tuummane rubeytaah buuha. At la kol tuumman jiti Kamure fissane khollokkhissa.
[11] Toolla la dahanti Kamur a kigu'dubta, indo waayta, geeddoo banayhi orraheet argiwwaayta.” Chirraas on 'duubat ichoow mug'di ba usu indo ankubeene, dahano ka il 'da'ddaarre eti angaamicho yowte.
[12] Etaas ween chirri us wihi yitah arge ka Kamur rummeeste, a mehe wori Kamur miinsane laabche a kagirmeeste.
[13] Baawulo ichoow wahalhiis ba kooban ka ilkerengeetti Baabos kakaheene ilkerengeettoo Beerga layadeehe boroofenhi Bambiiliya kajirto irteen. Intaas ka Yoohanahi magahiiskoo Marko layadeeh icho kanokhte ilkerengeetti weene Yeerusaleem inokhte.
[14] Ilkerengeetti Beerga kakaheene ilkerengeetti Antiyookhiya boroofenhi Bisiidiya kijirto irteen. Seeri Lanaso ka minki weysiite Ya'huud geleene orronteen.
[15] Inkoo Chiirnaanneti Amurre ichoow ti 'Doo'di Waákh Íyeyyeedo lasoome ka, 'doo'di minki weysiit itoollo icho waheene wihi icho iyidaaheen, “Yaafeey, chirri atin yeedoo enenyet uur miigoocho khabtaan, kaaleya cheeka.”
[16] Baawulo tolossate dahanti miigeet okkhiche leeyeede wihi us yidah, “'Doo'di Issiraayeloow ichoow atinhi yaafti Issiraayel ieheynane Waakh karoortaane inta kajirtaan, idagansada.
[17] Waakkhi 'doo'di Issiraayel wahti goorat aacchinyeteen a soobahsate. Maanti iche ili Miissiri iche kayeelantahe kajirto ka yaafohi buure kayeele. Waakh la toro miigtiisti buure on ka icho ilaas kasoobahche.
[18] Waakh geeddi gu'h tomon affar icho hidaad ka a woywoye.
[19] Yaaf teeba ili Kaanaan kajirte baabiiche, 'doo'diis la ilaas dahal ka siiche.
[20] Waha tuumman la geeddi gu'h kud affar ichoow gu'h tomon chan iche khaateen. “Waha 'dubicho ka Waakh icho 'doo'di dakhti siiche ichoowka eti Waákh íyeyyeedo Saamuwel layadeeh hiliis gele.
[21] Saahka yaafti Issiraayel Waakh karnat daahte, Waakh la icho eti Saawulo layadeehe aabbahiis Kiich layadeehe, yaaftiis la Beenjameen tahe, siiche. Ulla gu'h tomon affar ba karnat iyitah.
[22] Inkoo Waakh Saawulo bahche ka, Dawuud karnati yaafohi Issiraayel kayeele. Wihi Waakh cheeke Dawuud miinsan kallaayo, ‘Inam Yeessehi Dawuud layadeeh a eti wihi uureey 'doono raaho, wihi an usuhi yeelo 'doono tuumman a yeela.’
[23] “Waakh la hiiy Dawuud ka, i'di goorat us iayyichuu, Yeesso 'Doorribehi yaafohi Issiraayel kayeele.
[24] Geeddi Yeesso hiliis isookhaban, Yoohanahi Enenyet Baattissiyo iche yaafohi Issiraayel tuumman Yeedi Waakh icheeke, icho uskeeliin kasoonokhda toro a atin labaattissiyo iche idowe.
[25] Chirra Yoohana hiliis soomassicho ka wihi us yidah, ‘Kamalda bal, atin ayyo ikoogtahiin? An ki atin sugtaan mee. Yeya, eti 'dubeey ka yamiit, an falfihi kobtiissa an jalkhicho ma mu'dan.’
[26] “Yaafeey, atinhi hiiy Aburaahame ichoow atinhi yaafohi addanenye Waakh karoortaan inno wori saggi Waakh inno iribo a inno liisooerge.
[27] 'Doo'di ilkerengeetti weene Yeerusaleem ichoow weynaanticho ba Yeesso eti us rumanka yahe ma kasin. I'daasenyi maanti icho omoot igoocheen, wihi goorat 'doo'di Waákh íyeyyeedo chiire, Seeri Lanaso tuumman lasoomo buuhicheen.
[28] Chirri icho wihi rumanka Yeesso omoot liikagoocho ikhabin laka, Bilaato Yeessohi layagiise daaheen.
[29] Inkoo iche wihi goorat Chiirnaanneti Waakhe usu miinsan buuhisse ka, Yeesso massalaaba kasooyegisse khaatte, go'ddoo kahawwaasse.
[30] I'daasenyi Waakh usu 'doo'di tuume goyaka sookahche.
[31] Ulla 'doo'di goorat usú boroofenhi Gaalilaaya ka sooraahe ilkerengeetti weene Yeerusaleem leeyimiy geeddi buure a isoobabbahe. Icho la toolla 'doo'deenki Issiraayel gartiis a ilaabaan.
[32] “Nah Wori Haaggane atin icheekna. Wora la a ki Waakh aacchinyeteen iayyiche,
[33] innohi nyaakhutichee, Yeessohi us omoot kasookahche ka inno ibuuhiche. I'di aritti lammaatteete buuggi Sabuur ka liichiiruu, “ ‘At a Weelaaya, maalinka an Aabbahaahha itah.’
[34] Waakh rumanka Yeesso omoot a kasookahche toro jirtuu la ma 'diicho sartiis ma suusahto, i'di Yeedi Waakh liikachiiruu, “ ‘Buuhi munyeenye toro lakakhuufo an Dawuud iayyiche iche atin siicha.’
[35] 'Deerka intoo addan ka mehe chiiran ya, “ ‘Sarti Falfataahti Munyee ma 'diisso ma suusahto.’
[36] “I'di tahe Dawuud kholotiis ka hili Waakh a kajire, yumuyye, aacchinyetiisti goorat orey bujje ikhaye, lahawwaale, sartiis la suusahte.
[37] I'daasenyi ki Waakh omoot kasookahche, sartiis ma suusahin.
[38] “Maantaka yaaftaay wihi an atinhi abattaan 'doono, Yeesso ka, jiti uskeeliin atin liikakuto a atin liicheeke.
[39] Usu ka eti tuummane usu rummeeste, Waakh eti fissane iekkaacha. I'daasenyi amurre Muusati laraaho ka, Waakh etoo kalday laka eti fissan ma iekkaacho.
[40] Yuubsada gi'de uus wihi goorat 'doo'di Waákh íyeyyeedo yidah atin kiitaahane.
[41] ‘Yeya, atinha wihi Waakh yidah suujoon kacheektaan. A girmeysattaane tuuntaan. A mehe wihi an ibeenneta atin jirtaan yeelo, chirri etoo atin isoocheeke laka ma rummeysattaan!’ ”
[42] Chirra Barnaba ichoow Baawulo minki weysiite Ya'huud kabahaan ka, 'doo'd icho wahe 'dee Seeri Lanaso soomaro ka wahanyeyyohoo addan a icheekeen.
[43] Inkoo 'doo'd minki weysiit kabahe ka, 'doo'di Ya'huude ittaawe ichoow ki wihi 'doo'di Ya'huud wahti rumanka iurgiye Barnaba ichoow Baawulo sooraahe. Baawulo ichoow Barnaba la leeyyeedeene, hawwaasteene, 'dee mujjum haaggi Waakhe buure a raaheen.
[44] Seeri Lanaso soomaro ka 'doo'di ilkerengeettaas kajiro buurtiis yimiyye Yeedi Kamur dagansate.
[45] Chirri 'doo'di Ya'huud ururi buure arge ka, inaaf buuhiche, wihi Baawulo essi abaareen.
[46] I'daasenyi Baawulo ichoow Barnaba wihi icho roorro laan soolaabeen, “Wihi nah laka'doono, a nahi Yeedi Waakh kolooraat atin isoocheekno. Jeenteti atin i'dii'ddeene, saggi atin jiroti armaanjireen ikamalin isikeekkaasseen u la, kola yaafohi Ya'huud ieheynane iiranna.
[47] A mehe amuri Kamur nah siiche a kan, “ ‘A kisoobahsade, banayhi yaafohi Waakh igaran kaayeele, 'dee Wori Haaggane ribnaan keeno harra tuumman eleelissa.’ ”
[48] 'Doo'di yaafohi Ya'huud ieheynan chirri icho yeedaas daageen ka weyti hamaadeene, Yeedi Kamur inkaanyiteen. Eti tuummane Waakh soobahsate 'dee jiroti jirtuu imassan 'helo la Yeesso rummeeste.
[49] Yeedi Kamur la ilaas tuumman kataa'he.
[50] I'daasenyi 'doo'doo Ya'huud deyyehoti Waakh karoorto magah khabto ichoow mejeli ilkerengeet ka weynaan leh sootukkicheen. Baawulo ichoow Barnaba sina omhin sookhabteene ichoowka ilicho kariheen.
[51] Ergaano 'deerka ebeeri luhlohicho fuulo wihi iche 'doo'daas kacheekatti tuso ijahte, 'deerka ilkerengeetti Ikooniyo iratte.
[52] Abatti la hamaad ichoow Rubeyti Munyee buuhicheen.