[1] Etoo Anaaniya layadeeh makhaabassiisti Saffiira layadeeh khabaayi gosiiskoo ororiche.
[2] Chilimme gaasoo laabte, i'daasenyi wihi addan ergaano ikeene. Arantiis laka a leeogtahe.
[3] Beetero la mehe iyidah ya, “Anaaniya, saggoh Seytaan uuraah ibuuhiche, ichoowka Rubeyti Munyee been ikagoosse, chilimmeti gosaah bahe gaasoo ilaabatte?
[4] Gosaas geeddi at iororin kaahha on menya? Inkoo at ororisse la chilimme dahantaahha on menya kijirte? Mehe mali i'dee kigu'dde? At weeli enenyet ma ekkeysanne, i'daasenyi Waakh rubeytiissa ekkeysatte.”
[5] Anaaniya chu'us yeedaas daage ka, il gu'dde, yumuy. 'Doo'di yeedaas daage tuumman weyti roorro gesse.
[6] 'Doo'di nunnugul 'deerka yimiyye, sartiis dafar kaayyube, khaate hawwaale.
[7] Geeddi saha'dohoo seyyahe lafiddiye, arantiis wihi yitah ma garatti soogesse.
[8] Beetero la wihi us iche worsate, “Chilimmeti atin gosiin gatteen tuumman a tan on a?” Iche la wihi iche tidah, “Aa, iche tuumman a geeddaas on.”
[9] Beetero wihi us arám iyidah, “Saggoh ati ichoow makhaabalaah isileegoossaane Rubeyti Kamur ikajjaan? 'Doo'di makhaabalaah hawwaale afafe toolla ati laka kikhaata.”
[10] Chirraas on ortiis ka il gu'dubte tumuy. Reeri nunnugul 'deerka min soogele, saggi iche itumuy arge. Iche laka khaateene makhaabaliche garabiis ka hawwaaleen.
[11] Urur Kiriisto tuumman ichoow 'doo'di yeedaas daage tuumman, weyti nahtime gesse.
[12] Ergaano 'doo'd goyaka wahanyeyyohi ittaawenye miigti Waakh tuso ichoow girmo yeesse. 'Doo'di Kiriisto rummeeste tuumman la orran Oosim Soolomone kakulma.
[13] Chirri enenyet icho weyti inkaanyito laka, et addane goycho leemeet iggo mele.
[14] Eheetteey laka, enenyeti buurenye Kamur rummeeste, mejel ichoow deyyeho liikasookhaye.
[15] Jeenteti wihi ergaano haaggissuu, enenyet 'doo'dichoki khakkhannan jitate keene, siriiro ichoow ilaalle kareeche. I'dane yeeleene, 'dee kolossoo chirri Beetero sohti oosintiis 'doo'doo khakkhannan oosimmoosse, samaataan.
[16] Enenyeti buure ilkerengeetohi Yeerusaleem idow tuumman ka soobahe, 'doo'dichoki khakkhannan ichoow ki ginnayyo dakhtaan sookhaate. Icho tuumman la lasamaache.
[17] Kuhaanihi weyti ween ichoow 'doo'diiski usú raaho rabitti Sadukaayo kijiro ba jeenteti ergaanuu inaaf gele.
[18] Ergaano sookhabatte jeelati ilkerengeeteet ka hidde.
[19] I'daasenyi ibeen ka, hertoo Kamur afafhi jeela furte, ergaano bihisse.
[20] Wihi iche itidah, “Nyaama, minki Waakhe buure irda, enenyet buuhi wora jiroti husub icheeka.”
[21] Ergaano la yeedaas liiyidah raahte, baryo ka, minki Waakhe buure gesse i'di liiyidah u enenyet walah abisse. Kuhaanihi weyti ween ichoow 'doo'diis ba Jaldaabti Weene Ya'huud tuummamba tol iwaheen, iskar ergeene ergaano jeela ka a lasookhaato yidaaheen.
[22] I'daasenyi chi' iskare jeela tamiit, ergaano intaas ma kijirto. 'Deerka iratte cheekte mehe tidah ya,
[23] “Chi' nah jeela iranni, iskarti afaf yaakhisso a tolossa one, min la afaf mujjum on hidanyihiin. I'daasenyi chi' nah furro, nah goya gello, weeli enenyet min goya ma kijiro!”
[24] Eti iskarti minki Waakhe buure yaakhisso iween ichoow kuhaaniyyohi wewween chi'icho wora daageen ka wihi nool isworsateene, wihi soobaho kamalaleen.
[25] Chirraas on etoo la yimiyye iiyeyye, “Reeri chele atin jeela gelisseen minki Waakhe buurenye goya kijira, enenyet walah abcha.”
[26] Eti iskarti minki Waakhe buure yaakhisso iween, iskartoo khabaayi bahe ergaano toro sookhabte. Iskartaas la ergaano ma tottoganne, afi haaggan on ka soobihisse. Wihi iche karoorte la a 'doo'di 'dee dagah kachibo yagiis.
[27] Ergaano sookhaatte Jaldaabti Weene Ya'huud ortiis keente, 'dee kuhaanihi weyti ween ergaano waha a iyidaahe.
[28] “Nah goorat a katirriinsanne, amur atin ibihinne, uus atin magahi reenkaas ichoow yeediis enenyet abin. I'daasenyi wori Yeesso miinsan ilkerengeetti weene Yeerusaleem tuumman a kataa'hisseene, toro diiggiis nahe nah korin 'doontaan.”
[29] Beetero ichoow ergaanoti addan la mehe soolaabeen ya, “Wihi massan, nah Waakhe yeediis raahna, enenyet mee yeediis raahno.
[30] Inkoo atin Yeesso massalaaba kakaahteene atin tigaaseen, Waákh aacchinyeteen, Yeesso rubey a isoolaabe, omoot kasookahe.
[31] Waakh anki dahantiisti miigeet ka weynaache, Karnat ichoow 'Doorribe kayeele, 'dee yaafohi Ya'huud uskeelicho kasoonokhtaane, Waakh la uskeelicho ikakuta.
[32] Nah ichoow Rubeyti Munyeenye Waakh eti yeediis raaho tuumman siicho a garti waha tuumman.”
[33] Jaldaabe la chi'iche wahaas daagte ka, weyti hollowte, ergaano ogoos 'doonte.
[34] I'daasenyi etoo Farissaayeenye Gamaliyeel layadeehe, enenyet tuumman inkaanyito a jira. Usu a tagaanki amurre. Gamaliyeel Jaldaabti Weene Ya'huud goycho ka tolossatte, amur bahche ergaano i'daaru khar a liibahcho.
[35] 'Deerka wihi us jaldaab iyidah, “Mejeli Issiraayeloow, 'doo'da wihi atin sooyeessaan mujjum kamalda.
[36] Wihi inno orey agarre, Dewuudo a soobahe etoo ween iskayeele. Ullaka geeddi et kud affare raahte. Inkoo usu layigis ka, 'doo'diiskaas ichoow yeediis tuumman ba baabe.
[37] Kaas 'dubiis ka, maanti enenyet leekkaacho ka Yuudahi boroofenhi Gaalilaaya inno gele. Ullaka 'doo'doo usu raaho sirgaal 'dii'do 'hele. Inkoo usu layigis ka 'doo'diis tuumman seley turraa'he.
[38] Maantaka yeeda ka a atin waanicha, 'doo'da wohoo rucchul laka ayeelina! 'Diicha a irti! A mehe chirri wihi icho kamassaan ichoow wihi icho yeelaan weeli enenyet on kasoouummameen a baabaan on.
[39] I'daasenyi chi' yeedicho Waakh kiyimiy, reera koloo kalday laka jeyin ma tabuu'diine, atinhi Waakh rubeytiis 'dii'ddaan on isagartaan.”
[40] Yeed Gamaliyeel malicho urgiyiche. Ergaano min goya iwaheene, lajahe. 'Deerka amur ibahcheen, uus icho yombuu toro magah Yeesso kaayyeedin. 'Deerka la'diiche.
[41] Ergaano Jaldaabti Weene Ya'huud katabte. Weyti hamaadeen a mehe jeenteti icho koo Yeesso iyahiin u sinati lakawaaricho a mu'danyahiin.
[42] Maan dakkhan uranti minki Waakhe buure ka ichoow minan ka Wori Haaggane saggi Yeesso rumanka Ki Lasubhe iyahe iche enenyet abisso toro cheekto ma 'diin.