[1] 'Deyoofilohaaya, khadaabeeyki oraat ka, an wihi noole Yeesso yeele ichoow wihi us enenyet abche,
[2] ichoowka ibeenki goobi Waakh lageeche, iche kisoochiire. Geeddi serey liigeen, Rubeyti Munyee ka 'doo'di us soobahsate us ergaanotiis kayeesse, amurre ibahche.
[3] Inkoo sina lakawaariche us reera a isoobahe, jitassi ittaawe ka saggi us rumanka ijiro tuse. Geeddi ibeen tomon affar icho a isoobahe, wori dakhi Waakh miinsan kaleeyyeede.
[4] Maantoo leegolossataayi amurane ibahche, “Ilkerengeetti weene Yeerusaleem akabihina, i'daasenyi siinti goorat Aabbaheey atin iayyiche, an woriche kaayyeedo atin daagteen suga.
[5] A mehe Yoohana enenyet bicche kabaattissiye, i'daasenyi maanassa, Rubeyti Munyee ka a atin labaattissiya.”
[6] Saahka maanti icho kulmeen ka wihi icho usu worsateen, “Kamur, antohi yaafohi Issiraayel harraticho kaantaan maanassa on toro ilaabta?”
[7] Yeesso la icho mehe iyidah ya, “Aabbaheey antohiissa on ka maan ichoow chirri walah dakkhan yateehiin gooche. Atin mee maanti icho yateehiin abattaan.
[8] I'daasenyi maanti Rubeyti Munyee atin isooyagte, miig a 'hessaane, atin la weheeyki atin garattaan cheektaan. Ilkerengeetti weene Yeerusaleem ka ichoow boroofenneti Ya'huudiya ichoow ti Saamariya ka ichoow harra tuumman ka cheektaan.”
[9] Inkoo us yeedaas yidah ka, iche 'dey'doossaayi, Yeesso serey liikorche, mirisoo la icho kadagche.
[10] Geedda us serey irti, sereye 'dey'doochaan. Chirraas on reeroo lammeenye darfohoo daddakhan khabo garabicho sootolossate.
[11] “Era atinha boroofenhi Gaalilaaya!” yidah, “A i'doh itolossaane serey i'dey'doossaan? Yeessoha atin lakakhaate serey lageeche, saggaas atin iagartaane us serey iirti on isoonokhta.”
[12] Ergaano 'deerka Hali Geeyohi Oolif kakhubatte, ilkerengeetti weene Yeerusaleem inokhatte. Halaas la Yeerusaleem ka a geeddi kiilomittatoo kalday.
[13] Chi'icho sooeleeleen ka, inti minki saraate iche maanassaas fiddiito ikorte. Ichehi intaas fiddiito a Beetero ichoow Yoohana ichoow Yaakoobo ichoow Andereeya ichoow Fiilif ichoow Toomas ichoow Bar'dolomaayo ichoow Mattaayo ichoow inam Alfaayoki Yaakoobo layadeeh ichoow Siimonhi Yaaftiis'doone layadeeh ichoow inam Yaakooboki Yuuda layadeeh.
[14] Ichohaas tuumman, ichoow oboorrihoo addan ichoow Maariyati abar Yeessee, ichoow walaalinye Yeesso ba kol tuumman a sooururaane Waakh isleewahtaan.
[15] Inkoo ibeennetoo kutte ka, 'doo'di Kiriisto rummeeste soourure. Icho tuumman la a geeddi et kudoo ichoow tomon lamma. Beetero la kahe yeede,
[16] wihi us yidah, “'Doo'd Kiriistokaaw, wihi massan Chiirnaanneti Waakhe Rubeyti Munyee Dawuud afiis leekeente, Yuudahi 'doo'di Yeesso khabti soowoye miinsan a labuuhicha.
[17] Us a keenyokoowe hila Waakh a nah kaleejire.”
[18] Yuuda kala'ddi us jiti khollokkhan ka'hele ka gosoo soogatte. Gosaas goya on ka soodihe, uur desme, mindakharo tuumman sookhubteen.
[19] Enenyeti ilkerengeetti weene Yeerusaleem kijiro tuumman daage, gosaas magah ibahcheene aficho ka Akeldaama yidaaheen. I'daakka la mehe leessa ya, “Gosi Diig.”
[20] Beetero wihi us yidah, “A mehe buuggi Sabuur ka wihi chiiran, “ ‘Goobiis ba a baabo, uus etoo kalday laka jirin.’ Wihi addane chiiran, “ ‘Etoo addan ba meessiisti weynaaneet gela.’
[21] Maantaka wihi massan, etoo geeddi Kamureenki Yeessee nah leefiddiye tuumman nah leejire soobihinno.
[22] Eti uus maanti Yoohana enenyet baattissiyo sookhabte ichoowka maanti Yeesso nah lakakhaate serey lageeche nah leejire a eheetti. A mehe a nah isookhaya 'dee garti saggi Yeesso omoot liikasookahche nah leecheeka.”
[23] 'Deerka et lamma magahenye waheen. Yuussufhi Barsabba layadeehe magahiiskoo Yaasto layadeeh ichoow Mattiyas.
[24] 'Deerka Waakh wahteen, “Kamur, ati uurassi enenyet tuumman a garatta. Maantaka 'doo'da lammatiis ki at soobahsatte,
[25] 'dee hila Waakhe ergaano gelo nah tus. Waha la a meessi Yuuda kabahe, ulla inti imasse irtee.”
[26] 'Deerka magah lammataas ka kura gu'ddeen. Eti 'hele a Mattiyase, 'deerka ergaanoti tomon ichoow koowe ikhaye.